Мавзу: Кўрсаткичлар ва адресс олувчи ўзгарувчилар Асосий саволлар

Мавзу:Кўрсаткичлар ва адресс олувчи ўзгарувчилар

Асосий саволлар

1. 
   Кўрсаткичлар.
   

2. Кўрсаткичга бошланғич қиймат бериш.

3. Кўрсаткич устида амаллар.

4. 
   Адресни олиш амаллари.
   

5. Ўзгарувчан параметрли функциялар

Кўрсаткичлар

Дастур матнида ўзгарувчи эълон қилинганда, компилятор ўзгарувчига хотирадан жой ажратади. Бошқача айтганда, дастур коди хотирага юкланганда берилганлар учун, улар жойлашадиган сегментнинг бошига нисбатан силжишини, яъни нисбий адресини аниқлайди ва объект код ҳосил қилишда ўзгарувчи учраган жойга унинг адресини жойлаштиради.
Умуман олганда, дастурдаги ўзгармаслар, ўзгарувчилар, функциялар ва синф объектлар адресларини хотиранинг алоҳида жойида сақлаш ва улар устидан амаллар бажариш мумкин. Қиймат-лари адрес бўлган ўзгарувчиларга кўрсаткич ўзгарувчилар дейилади.
Кўрсаткич уч хил турда бўлиши мумкин:

• 
  бирорта объектга, хусусан ўзгарувчига кўрсаткич;
  
• 
  функцияга кўрсаткич;
  
• 
  void кўрсаткич.
  

Кўрсаткичнинг бу хусусиятлари унинг қабул қилиши мумкин бўлган қийматларида фарқланади.
Кўрсаткич албатта бирорта турга боғланган бўлиши керак, яъни у кўрсатган адресда қандайдир қиймат жойланиши мумкин ва бу қийматнинг хотирада қанча жой эгаллаши олдиндан маълум бўлиши шарт.
Объектга кўрсаткич. Бирор объектга кўрсаткич (шу жумладан ўзгарувчига). Бундай кўрсаткичда маълум турдаги (таянч ёки ҳосила-вий турдаги) берилганларнинг хотирадаги адреси жойлашади. Объектга кўрсаткич қуйидагича эълон қилинади:
<тур> *<ном>;
Бу ерда <тур> - кўрсаткич аниқлайдиган адресдаги қийматнинг тури, <ном> - объект номи (идентификатор). Агар бир турда бир нечта кўрсаткичлар эълон қилинадиган бўлса, ҳар бир кўрсаткич учун ‘*’ белгиси қўйилиши шарт:
int *i,j,*k;
float x,*y,*z;
Келтирилган мисолда i ва k - бутун турдаги кўрсаткичлар ва j - бутун турдаги ўзгарувчи, иккинчи операторда х - ҳақиқий ўзгарувчи ва y,z - ҳақиқий турдаги кўрсаткичлар эълон қилинган.