Мавзу. Корхона фаолиятини харажатлари, даромади ва рентабеллиги

15.Корхона фойдасини тақсимлаш ва ундан фойдаланиш тартибини белгиловчи асос нима?

Корхонада фойдани тақсимлаш ва ундан фойдаланиш тартиби унинг низомида белгилаб қўйилади ҳамда ваколатли иқтисодий хизмат ходимлари томонидан тайёрланиб, корхона раҳбарияти томонидан тасдиқланувчи қоидалар ёрдамида аниқланади.

16.Корхоналар фойдасини тақсимлашда амал қилинадиган тамойиллар

• Корхонанинг ишлаб чиқариш ва молиявий фаолият натижасида оладиган фойдаси давлат ва корхона ўртасида хўжалик субъекти сифатида тақсимланади;
• Фойданинг давлатга тўланувчи бир қисми солиқ ва йиғимлар кўринишида бюджетга келиб тушади. Солиқлар таркиби ва фоизи, уларни ҳисоблаш тартиби ва бюджетга тўланувчи бошқа тўловлар қонунчилик томонидан белгиланади;
• Солиқлар тўлангандан сўнг корхона тасарруфида қолувчи фойда миқдори, унинг ишлаб чиқариш ҳажмини ошириш ҳамда ишлаб чиқариш ва молиявий фаолият натижаларини яхшилашдан манфаатдорлигини камайтирмаслиги лозим.

17.Корхоналар соф фойдасининг тақсимотида, уларнинг мулк шакли ўз ифодасини топади

• Акционерлик жамиятида дивидентлар тўлашга ва резерв капиталига ажратма қилинади. Унинг қолган қисми тақсимланмаган фойда кўринишида жамият ихтиёрида қолади ва корхона фаолиятини ривожлантиришда (асосий фондларни кенгайтиришда ва айланма маблагларни шакллантиришда) қатнашади;
• Қўшма корхонада резерв капиталига ажратма қилинади, унинг уставига мувофиқ таъсисчилр ўртасида тақсимланади ёки таъсисчилар қарорига биноан корхона фаолиятини ривожлантиришга ишлатилади;
• Хусусий корхоналарда резерв капиталига ажратма қилинади ва унинг қолган қисми тақсимланмаган фойда кўринишида корхона фаолиятини ривожлантиришда иштирок этади;
• Давлат корхоналарида резерв фондига ажратма қилинади, қолган қисми эса устав фондига қўшилади. Маълумки, корхона устав фонди унинг асосий ва айланма фондларини шакллантиришда муҳим манба ҳисобланади.