Мавзу: Иммунитет хақида тушунча. Иммунитет турлари. Организмнинг махсус бўлмаган химоя омиллари

4. Ёт моддаларнинг хужайра ичида парчаланиши. Бунда фагосома фагоцит­ларнинг лизосомалари билан қўшилиб, фаголизосомалар ҳосил қилади. Фаго­лизосомалар ичида ёт агентлар лизосомал ферментлар таъсирида парчаланади.
Фагоцитоз икки хил бўлади: агар фагоцитоз қилинган микроблар тўлиқ парчаланса, тугалланган фагоцитоз дейилади. Агар микроблар фаго­цитлар ичида тўлиқ парчаланмаса, бу жараён тугалланмаган фагоцитоз деб аталади. Масалан, токсоплазма ва сил микобактерияси фагоцитоз қилинганда фагосома лизосома билан бирикмайди, гонококк, стафилококк ва стрепто­коккнинг А гуруҳига кирувчилар эса лизосомал ферментлар таъсирига чи­дамли ҳисобланади, риккетсиялар эса эндоцитоздан сўнг фагоцитлар цитоплазмаси ичида узоқ вақтгача сақланиб қолади. Кўпгина факультатив ва облигат ҳужайра ичи паразитлари фагоцитлар ичида кўпайиб, уларнинг ҳужайрасини бу­зиб чиқиб кетади. Яна бир ҳолда эса фагоцитлар қамраб олган микроорганизмларини чиқариб юборади. Бундан ташқари, макрофаглар ташқи муҳитга цитоцид ёки фагоцитоз қи­линмаган микроорганизмларга бактерицид таъсир этувчи моддаларни ажратади.
Кальций, магний тузлари, электролитлар, комплемент, лимфокинлар, опсонин вазифасини бажарувчи антителолар, организм ҳароратини оширувчи пироген моддалар фагоцитозни кучайтирувчи омиллар ҳисобланади. Ўз нав­батида фагоцитозни сусайтирувчи омилларга бактерия токсинлари ва капсуласи, лейкоцидин, кортикостероид, серото­нин, аминазин, холестерин, алкалоид ва бошқалар киради.
Фагоцитларнинг иккинчи вазифаси антигенлар тўғрисидаги ахборотни етказиб бериш (пре­зентация қилиш). Бунда, микробларнинг охиргача парчаланмай қолган асосий антиген детерминантлари (эпитоплари) ҳужайра мембранаси юзига “чиқарилиб”, иммун тизим ҳужайрала­рига презентация қилинади, натижада организмда мувофиқ антиген тутувчи микробларга қар­ши иммун жавоб ривожланади.
Фагоцитоз қилувчи ҳужайраларнинг навбатдаги вазифаси, бу интерлей­кин-I (ИЛ-I), простогландин, лейкотриен, циклик нуклеотидлар каби биоло­гик фаол моддаларни ишлаб чиқаришдир. ИЛ-I Т-лимфоцитларни микроб антигенини таниши учун фаоллаштиради, бундан ташқари, гипоталамуснинг олдинги ядросига таъсир қилиб, гавда ҳароратини оширади. Шу билан бир қаторда фагоцитлар кислород радикаллари (О₂, Н₂О₂), лизоцим, компле­мент компонентлари, интерферон каби моддаларни ташқарига ишлаб чиқа­риб, яқин атрофдаги бактерия, вирусларни ўлдиради.
Агар патоген микроблар юқорида санаб ўтилган “тўсиқ” ва номахсус ҳимоя омилларини енгиб ўтиб, қонга тушса, қонда комплемент, пропердин тизимлари, лизин, эритрин, лейкин, С-реактив оқсил ва интерферон каби номахсус бактерицидлик хусусиятига эга моддалар, моноцит ва табиий кил­лерлар уларни ўлдириб, организмга тарқалмаслигини таъминлайди.