Mavzu. Bozor sharoitlarida sifat va raqobatbardoshlik. 1 Sifat XXI asr bo’sag’asida raqobatning umumjahon maydoni

Oldi - sotdi shartnomalarning ayrim turlari to'g'risidagi qoidalar, shuningdek, ayrim turdagi tovar (ish, xizmat) larni realizatsiya qilish qoidalari O'zbekiston Respublikasi Hukumati tomonidan tasdiqlanadi.
Tovar (ish, xizmat) lar uchun haq to'lash shakli hamda tartibi iste'molchi bilan sotuvchi (ishlab chiqaruvchi, ijrochi) o'rtasidagi kelishuvga ko'ra belgilanadi. Tovarni kreditga sotish O'zbekiston Respublikasi Hukumati tomonidan tasdiqlanadigan tovarlarni kreditga sotish qoidalari bilan belgilanadigan tartibda amalga oshiriladi.
Oldi - sotdi amalga oshirilganda iste'molchiga kassa yoki tovar cheki beriladi. Tovarni kassa yoki tovar chekini bermasdan sotish taqiqlanadi.
Ishlab chiqaruvchi (ijrochi) ning kafillik majburiyatlari. Uzoq muddat foydalaniladigan barcha turdagi tovarlar va xizmatlarga ishlab chiqaruvchi (ijrochi) kafolat muddatini belgilashi lozim. Kafolat muddati tovar iste'molchiga sotilgan yoki xizmat ko'rsatilgan kundan boshlab hisoblanadi. Agar tovar sotilgan kunni aniqlashning imkoni bo'lmasa, bu muddat mahsulot ishlab chiqarilgan kundan boshlab hisoblanadi.
Ishlab chiqaruvchi (ijrochi) kafolat muddati mobaynida tovar (xizmat) ning, shu jumladan, butlovchi buyumlarning normal ishlashini (qo'llanishini, ulardan foydalanishni) ta'minlashi shart.
Agar qonun hujjatlarida boshqacha qoida belgilanmagan bo'lsa, butlovchi buyumlarning kafolat muddati asosiy buyumning kafolat muddatidan kam bo'lmasligi lozim.
Kafolat muddati tovar (xizmat) ning pasportida yoki tovarni sotish yoxud xizmat ko'rsatish paytida tovar bilan birgalikda iste'molchiga beriladigan boshqa hujjatda ko'rsatiladi.
Ishlab chiqaruvchi kafolat muddati va xizmat muddati mobaynida tovardan foydalanish imkoniyatini ta'minlashi, tovarning ta'mirlanishi va unga texnik xizmat ko'rsatilishini tashkil etishi, tovarni ishlab chiqarish muddati mobaynida hamda u ishlab chiqarishdan olib tashlanganidan keyin tovarning xizmat muddati mobaynida, bunday muddat bo'lmagan taqdirda esa tovar ishlab chiqarishdan olib tashlangan paytdan e'tiboran o'n yil mobaynida yetarli hajmda va turda ehtiyot qismlari ishlab chiqarishi hamda savdo va xizmat tashkilotlariga yetkazib berilishi shart.
Dori - darmon, oziq - ovqat va maishiy kimyo tovarlarida ular ishlab chiqarilgan sana va yaroqlilik muddati hamda saqlash shartlari ko'rsatilgan bo'lishi lozim. Sotuvchilarning yaroqlilik muddati ko'rsatilmaganda yoki bu muddati o'tib ketganda qabul qilishi va realizatsiya qilishi man etiladi.