Mavzu. Boshlang‘ich ta’lim pedagogikasida ta’lim qonuniyatlari, qoida va pirinsiplari. Boshlang‘ich ta’lim metodlari va vositalari reja

Mashqlar metodlarining samarasi qanday shartlar inobatga olinganida ta’minlanadi? Mashqlar metodlarining samarasi quyidagi shartlar inobatga olinganida ta’minlanadi:

• 
  mashqlarni bajarishga nisbatan ongli yondashish;
  
• 
  bajarish qoidasini bilish;
  
• 
  vaqt bo’yicha takrorlanishning to’g’ri taqsimlanishi.
  

Mashqlarni bajarish qanday bosqichlarda kechadi: Mashqlarni bajarish quyidagi bosqichlarda kechadi:

• 
  o’qituvchining faoliyat maqsadi va mazmunini tushuntirishi;
  
• 
  o’qituvchi tomonidan topshiriqni bajarish ketma-ketligining bevosita ko’rsatilishi;
  
• 
  o’qituvchi nazorati ostida o’quvchilar tomonidan o’quv harakatining dastlabki bajarilishi;
  
• 
  zarur ko’nikma va malakalar shakllangunicha o’quv harakatlarning ko’p bor takrorlanishi.
  

Laboratoriya ishlari qanday metodlar sanaladi? Laboratoriya ishlari o’quvchilarga turli jihoz, maxsus uskuna, qurol, texnikaviy qoliplardan foydalangan holda tajribalarni o’tkazish imkoniyatini yaratuvchi metodlar bo’lib, ular ko’proq tabiiy fanlar asoslarini o’rganishda qo’llaniladi. Ushbu metod o’quvchilarda asbob-uskunalar bilan ish ko’rish, o’lchash ishlarini amalga oshirish, ularning natijalariga ishlov berish kabi ko’nikma, malakalarni shakllantirishga xizmat qiladi. Laboratoriya ishlarini bajarish maxsus qurilma, jihoz va materiallarni, vaqtni sarflash hisobiga ularni ishga tayyor holatga keltirishni talab etadi.
Amaliy ishlar metodlari laboratoriya ishlari metodlaridan farqlanadimi?
Amaliy ishlarning laboratoriya ishlaridan farqi shundaki, u o’quvchilarni mavjud nazariy bilimlardan amaliy masalalarni yechishda foydalanishga yo’naltiradi. Metod ta’lim jarayonida o’quvchilarning bilimlarini chuqurlashtirish, bilish faoliyatini nazorat qilish va mavjud kamchiliklarni tuzatish imkoniyatini yaratadi.
Amaliy mashg’ulotlarda bilish faoliyati qanday bosqichlarda tashkil etiladi?
Amaliy mashg’ulotlarda bilish faoliyati quyidagi besh bosqichda tashkil etiladi:
1. O’qituvchining tushuntirishi, faoliyat mohiyatini nazariy jihatdan anglash.
2. Ko’rsatma berish, yo’l-yo’riq ko’rsatish.
3. Tajribani tashkil etish (bunda ikki-uch nafar o’quvchi amaliy harakatlarni bajaradi, qolgan o’quvchilar esa ularning faoliyatini kuzatadilar).
4. O’quvchilarning mustaqil faoliyatlarini tashkil etish (o’quvchilar topshiriqlarni mustaqil bajaradilar, o’qituvchi qiynalgan o’quvchilarga e’tiborni qaratib, ularga yordam ko’rsatadi).
5. Nazorat (o’quvchilarning ishlari qabul qilinib, baholanadi; unda ishning sifati, materialning maqsadga muvofiq tanlanganligi, vaqtni tejash, topshiriqni bajarish tizimining to’g’riligi va samaradorligiga e’tibor qaratiladi).