Мавзу: Бачадон буйини ва танасининг рак олди ва фон касалликлари. Ташхислаш. Текшириш. Дифференциал диагностика ва уаш тактикаси

Ташхислаш: кўзгуда кўрик, кольпоскопия.
Чин эрозия одатда орқа лабда жойлашади, ёрқин қизил рангли, ноаниқ шаклли бўлиб, цервикал каналдан шиллиқ – йирингли ажралмалар келади. 1-2 ҳафта кузатилиб, кейин псевдоэрозияга ўтади. Кольпоскопия ва микроскопик текширувда яллиғланиш белгилари аниқланади.
Микроскопия ва цервикал каналдан бактериологик экма олиш яллиғланиш реакцияси қўзғатувчиси хусусиятини билиш ва кейинчалик тўғри давони танлаш мақсадида ўтказилади.
Псевдоэрозия чин эрозия негизида патологик жараённинг ривожланишидан келиб чиқади. Эктоцервикснинг емирилган юзасига эндоцервикс цилиндрик эпителийси ўсиб келади. Цилиндрик эпителий бачадон бўйнинига чуқур ўсиб кириб, тармоқланган йўллар ва секрет ишлаб чиқарувчи кўплаб кисталар ҳосил қилади.
Мазкур ҳасталик клиник кўриниши учун ( оқчил, оғриқ, ҳайз фаолияти бузилиши ва ҳ. к. ларга) шикоят билдириш хос эмас, одатда бу эрозия ҳамда псевдоэрозия билан бирга келадиган бошқа (кольпит, сальпингоофарит, эндометрит каби ) ёндош касалликларга боғлиқ бўлиб, ушбу касаллик асосан яққол ифодаланмаган белгиларсиз кечади.
Ташхислаш: кўзгуда кўрик, кольпоскопия. Псевдоэрозияларга турли ўлчам, нотўғри шакл, нотекис юза, қизил ранг, киста ва патологик ажралмалар хос бўлади. Касаллик узоқ кечганда, даводан етарлича самара бўлмаганда, рецидивларда, рак олди жараёнларига хос ўзгаришларни аниқлаш имконини берувчи кенгайтирилган кольпоскопияни қўллаш шарт. 5 % ли йод эритмаси билан ювгандан сўнг эрозия оч пушти, энди бошланаётган ўчоқлар – сариқ, атипик жараёнли соҳалар – оқ тусли кўринади. Шубҳали деб ҳисобланган соҳаларда мўлжалли биопсия бажарилади.
Даволаш касаллик ривожланишига олиб келган ёндош ҳасталиклар (кольпит, эндометрит, сальпиногоофарит, эктропион, эндокрин бузилишлар ) ни даволаш билан бирга олиб борилади. Қўзғатувчи хусусияти сезгирлигини аниқлаш учун бактериал экма, ИФА, ПЦР синамалари ёрдамида аниқланади ва қўзғатувчи турига қараб даво ўтказилади.
Даво усули – инфекция турини ҳисобга олган ҳолда антибактериал терапия ва суртмали тампон ёки қин шамчаларини қўллаш билан маҳаллий даво.
Даволашнинг бошқа усули атроф тўқималарга салбий таъсир кўрсатмайдиган куйдирувчи воситалар(ваготил, солковагин)ни қўллаш билан боғлиқ. Шунингдек, яққол дисплазия ва малигнизацияни инкор этиш учун кенгайтирилган кольпоскопиядан сўнг электрокоагуляция (диатермокоагуляция), криокоагуляция, лазеровапорезация қўлланилади. Санаб ўтилган даво усуллари қўлланилгач, аёл диспансер назоратида бўлади.
Лейкоплакия (грек.”оқ доғ” ) маълум соҳа қон томирлари атрофида лимфогистиоцитар инфильтрат шаклланиши билан кўп қаватли ясси эпителийнинг турли даражадаги мугузланиши кечадиган ўчоқли жараённи ифодалайди.