«materialshunoslik»

Kimyoviy tolalarni olishning asosiy bosqichlari. Tola olish usuli polimerning tabiatiga bog‘liq. Qizdirilganda suyuqlanmay parchalanadigan polimerdan (sellyuloza na uning efirlari, poliakrilonitril, polivinilxloril, polivinilidenxlorid, polivinilspirt) tola olish uchun, ular eritgichlarda eritiladi va hosil bo‘lgan eritma tola olishga tayyorlanadi. Buning uchun polimer eritmasi filtrlanadi va havosizlantiriladi.

Mexanik zarrachalardan tozalash uchun eritma har xil konstruksiyali filtrlar orqali o‘tkaziladi. Eritmalarni bir joydan ikkinchi joyga uzatish, filtrlar orqali o‘tkazish uchun tishli yoki plunjerli nasoslar ishlatiladi.

Eritmalarni havosizlantirish ancha murakkab jarayon hisoblanadi. Chunki havo, azot va boshqa gazlar eritmalar erigan va erimagan holatda bo‘lishi mumkin.

Poliamid, poliefir, poliolefin va boshqa sintetik polimerlar qizdirilganda parchalanmay suyuqlikka aylanadi. Bunday polimerlardan tola olish uchun, suyulish haroratidan 30 - 50°S yuqori bo‘lgan haroratda suyultirib, uning suyultmasi tayyorlanadi. Polimer suyultmasi faqat filtrlanadi, ya’ni suyultirilgan polimer toza kvars-qo‘m yoki nikeldan yasalgan to‘r orqali o‘tkaziladi. Qanday ip yoki tola olishdan qat’iy nazar, tola olishdan oldin eritma filtrlanishi va havosizlantirilishi, polimer suyultmasi esa filtrlanishi zarur.