IV. ISH VAQTI VA DAM OLISH VAQTI
47. Tomonlar mehnat qonunlarida ko‘rsatilgan haftalik ish soatidan oshmagan holda 6 kunlik ish haftasi asosida ish tashkil qilishga kelishdilar. Ish kunining davomiyligi, undan foydalanish tartibi, ishning boshlanishi va tugash vaqti, muassasa ichki mehnat tartibidan kelib chiqib belgilanadi.
48. Pedagog xodimlar haftalik ish soati, ish yuklamalari, mehnat taqsimotlari O‘zbekiston Respublikasi Xalq ta’limi vazirligi, O‘zbekiston Respublikasi Bandlik va mehnat munosabatlari vazirligining 2018 yil 27 iyulidagi 9-mx-sonli qarori bilan tasdiqlangan “Umumiy o‘rta ta’lim muassasalarining pedagogik mutaxassisliklari bo‘yicha namunaviy yillik ish rejasini shakllantirish tartibi to‘g‘risidagi yo‘riqnoma”ga muvofiq belgilanadi.
49. Boshqa xodimlar uchun quyidagicha haftalik ish soatlari belgilanadi:
- 16 yoshdan 18 yoshgacha bo‘lgan xodimlar uchun 36 soat;
- zararli sharoitda ishlovchilar uchun (laborantlar, maxsus farroshlar) 36 soat;
- normal sharoitda ishlaydigan xodimlar uchun 40 soat
- I va II guruh nogironlari uchun 36 soat;
50. Pedagogik yuklamani taqsimlashda pedagog xodimlarning quyidagi toifalariga tanlash huquqi birinchi navbatda beriladi:
a) ko‘p bolali ayollarga;
b) I, II-guruh nogironlariga;
v) oilada o‘zidan boshqa boquvchisi bo‘lmagan xodimlarga;
g) oilada nogironi bor xodimlarga.
d) oilada 18 yoshga to‘lmagan 3 va undan ortiq farzandi bor xodimlarga
51. O‘zbekiston Respublikasi Mehnat kodeksining 229-moddasida nazarda tutilgan hollarda, shuningdek quyidagi asoslardan biri mavjud bo‘lganda xodimning iltimosiga ko‘ra unga to‘liqsiz ish vaqti belgilab qo‘yilishi shart:
a) oila a’zolaridan birining betobligi;
b) ishni ta’lim bilan qo‘shib olib borilishi;
v) profilaktik davolanish zaruriyati;
g) texnologiyadagi, ishlab chiqarish va mehnatni tashkil etishdagi o‘zgarishlar tufayli xodimlar soni qisqarishining oldini olish;
d) rasmiy ro‘yxatga olingan dinlarga mansub xodimlar uchun diniy marosimlarni ado etish hamda ro‘za tutish zarurati bo‘lganda.
52. Qorovul va o‘t yoquvchilarning ish vaqti (smena) muddati sutkasiga o‘n ikki soat miqdorida belgilab qo‘yiladi va ish vaqtini jamlab hisobga olish joriy qilinadi. Bunda ish vaqtining choraklik balansiga rioya etiladi.
53. Ish vaqtini jamlab hisobga olish ayrim toifadagi xodimlarni ish vaqtidan tashqari ishlarga jalb etish xususida belgilangan cheklashlarga (O‘zbekiston Respublikasi Mehnat kodeksi 220-moddasining beshinchi qismi va 228, 245-moddalariga) rioya qilgan holda joriy etiladi.
54. Ish vaqti jamlab hisobga olinishi rejimida band bo‘lgan xodimlarga har oyda to‘lanadigan ish haqi miqdori tenglashtirilishi kafolatlanadi (hisobga olinadigan davr yakunlari bo‘yicha to‘g‘irlab qo‘yish sharti bilan). Bunda hisobga olinadigan davr mobayinida ish soatlarining normal miqdoridan ko‘p ishlaganlik uchun ish vaqtidan tashqari ishlar uchun o‘rnatilgan baholarga binoan haq to‘lanadi yoki xodimning hohishiga ko‘ra dam olish kuni beriladi.
Do'stlaringiz bilan baham: |