Maktabgacha muassasalar xodimlarini qayta tayyorlash va malakasini oshirish respublika

3-mashg’ulot

Mavzu: Shaxsiy hayot (tajriba)dan hikoya tuzish “Metroda”

Maqsad:

Shaxsiy hayotdan mazmunli izchillikda hikoya tuzishga o’rgatish.

Vazifalar:

Bog’langan nutqni rivojlantirish. So’zlayotganda to’g’ri nafas olishni rivojlantirish.Nutqning ifodaliligini tarbiyalash. O’z nutqida uyushiq bo’lakli gaplardan foydalanish malakasini mustahkamlash. Berilgan rasmlar asosida so’z tuzish, aytilgan so’z, tovushlarni aniq talaffuz etishga o’rgatish.

Kutilayotgan natijalar:

Bolalarning bog’langan nutqi va tovush madaniyati

rivojlanadi. Bolalarda ijodiy, mustaqil fikrlash va buni nutqda ifodalash ko’nikma hamda malakalari shakllanadi. Berilgan rasmlar asosida so’z tuzish, aytilgan so’z, tovushlarni aniq talaffuz etishga o’rganadilar.

Kerakli jihozlar:

“Metro” mavzusida rasm

Transportlarning alohida-alohida tasviri

Mashg’ulotning borishi

Tarbiyachi: “Biz qaerga borganimizda metroga tushgan edik? Metroga yana kimlar bilan tushgansiz? Metroga tushganingizda bekatlari qanday edi? Bekatlar haqida nima deyish mumkin?” (yorug’, ozoda, keng, chiroyli, naqshli).

2. Poezdlar haqida nima deyish mumkin? (tez yurar, ketma-ket).

3. Zinalar qanday edi? (o’ziyurar, baland). Savol – javobdan so’ng tarbiyachi bolalarga hikoya tuzishni taklif etadi: “Bolalar hikoya tuzganingizda hozirgi ishlatgan so’zlardan foydalanishingiz mumkin”.

Tarbiyachining yordamchi savollari:

1. Metroda qaerga borgan edingiz?

2. Pastga –er osti bekatiga nimada tushdingiz?

3. Qaysi bekatni tomosha qildingiz?

4. Bekatda yana nimalarni ko’rdingiz?

Savol – javobdan so’ng tarbiyachi namunaviy hikoya qilishi mumkin.

Onam bilan men qo’g’irchoq teatriga bormoqchi bo’ldik. Metroga onam bilan tushdik. Onam avval jetonlar sotib oldilar. Jetonni o’tadigan joyga tashlab o’tdilar. Men yosh bolalar o’tadigan joydan o’tib ketdim. Biz o’ziyurar zinalar orqali metroning er osti bekatiga tushdik. Bu bekat juda chiroyli va ozoda ekan. Turli naqshlar bilan bezatilgan. Ketma – ket poezdlar keldi. Poezd eshiklari o’zi ochiladi, o’zi yopiladi. Poezd qo’zg’aldi. Biz “Mustaqillik” maydoni bekatida tushdik. Bu bekat juda chiroyli ekan. Yana o’zi yurar zinalar orqali yuqoriga chiqdik va teatr tomon yo’l yurdik (3-4 bolalarning javoblari).

Tarbiyachi: “Bolalar, poezd haydovchisining gapini past-baland, o’rtacha sur’atda aytishga harakat qilamiz”: “Ehtiyot bo’ling, eshiklar yopiladi, keyingi bekat “Paxtakor”. Tarbiyachi yuqoridagi jumlalarni ovoz sur’atini o’zgartirib (ayttirib) aytishga o’rgatadi.

“Klaster” o’yini bo’yicha transport turlarini guruhlash

Bolalarga turli xildagi transportlarning alohida-alohida rasmlari to’plami beriladi. Bolalar transportlarni qaerda harakat qilishlariga qarab guruhlab chiqadilar–erda yuradigan, osmonda uchadigan, suvda suzadigan.

4-mashg’ulot