Мактаб раҳбарларининг молиявий ва ҳуқуқий саводхонлиги

14-§. ЎҚИТУВЧИ-ДЕФЕКТОЛОГ, ЎҚИТУВЧИ-ЛОГОПЕД
ЛАВОЗИМИНИНГ МАЛАКА ТАВСИФЛАРИ

Тартиб рақами	7292, 7293
Касбларнинг миллий стандарт классификатори бўйича коди	2330
Ходимлар тоифаси	Мутахассис

Лавозим вазифалари:
а) ўқувчиларда (тарбияланувчиларда) ривожланишдан четланишларни иложи борича тузатишга қаратилган ишларни олиб бориш, ўқувчиларни (тарбияланувчиларни) текшириш, уларда мавжуд бўлган нуқсон таркиби ва ифодаланиш даражасини аниқлаш;
б) ўқувчиларнинг (тарбияланувчиларнинг) руҳий-жисмоний ҳолатини ҳисобга олган ҳолда машғулотлар ўтказиш учун гуруҳлар ташкил қилиш, гуруҳлар билан ва индивидуал тартибда ривожланишдаги четланишларни тузатиш, носоз функцияларни тиклаш бўйича машғулотлар ўтказиш;
в) ўқитувчилар ва тарбиячилар билан яқин ҳамкорликда ишлаш, машғулот ва дарсларда иштирок этиш, педагог ходимлар ва ота-оналарни (уларнинг ўрнидаги кишиларни) ривожланишда четланишлар мавжуд бўлган болаларга ёрдам кўрсатишнинг махсус методлари ва усулларини қўллаш бўйича маслаҳатлар бериш, зарур ҳужжатларни юргизиш;
г) шахснинг умумий маданиятини шакллантиришда, унинг ижтимоийлашишида, касбий дастурларни онгли равишда танлаш ва ўзлаштиришда кўмаклашиш, давлат стандартлари доирасида таълим беришнинг турли шакллари, усуллари, методлари ва воситаларини қўллаш, таълим дастурларини амалга ошириш.
д) ўқувчиларни (тарбияланувчиларни) Ўзбекистон Республикасининг “Таълим тўғрисида”ги Қонунида, болалар ҳуқуқлари тўғрисидаги Конвенцияда белгиланган ҳуқуқларга риоя қилиш ва эркинликларини таъминлаш;
е) ўз касбий малакасини мунтазам равишда ошириб бориш, методик уюшмалар фаолиятида ва бошқа кўринишдаги методик ишларда қатнашиш;
ж) ота-оналар (уларнинг ўрнидаги кишилар) билан муносабатни амалга ошириш, меҳнатни муҳофаза қилиш, техника хавфсизлиги ва ёнғиндан муҳофаза қилиш қоида ва нормаларини бажариш, таълим жараёнида ўқувчиларнинг ҳаётини ва соғлиғини муҳофаза қилишни таъминлаш;
з) таълим муассасаси фаолиятига қўйилган санитария-гигиена талаблари, меҳнатни муҳофаза қилиш, техника ва ёнғин хавфсизлиги қоидалари талабларига риоя қилиш;
и) ичимлик суви билан таъминлаш ва болалар учун қўйилган санитария-гигиена талабларига риоя қилиш.
Билиши лозим:
а) Ўзбекистон Республикасининг “Таълим тўғрисида”ги, “Кадрлар тайёрлаш миллий дастури тўғрисида”ги, “Бола ҳуқуқларининг кафолатлари тўғрисида”ги қонунларини;
б) ҳукуматнинг тегишли қарорлари ва фармойишларини;
в) Халқ таълими вазирлигининг буйруқлари, меъёрий, кўрсатма ва ахборот материаллари, таълим бўйича статистик материалларни;
г) болалар ҳуқуқлари тўғрисидаги Конвенцияни;
д) махсус ва ёшлар педагогикаси ва психологиясини;
е) дефектологиянинг анатомик-физиологик ва клиник асосларини;
ж) ўқувчилар (тарбияланувчилар) ривожланишидаги четланишларнинг олдини олиш ва тузатишнинг методлари ва усулларини;
з) ривожланишда четланишлар мавжуд бўлган ўқувчилар (тарбияланувчилар) билан ишлашда қўлланиладиган дастурий-методик адабиётларни;
и) дефектология фанининг энг янги ютуқларини;
й) меҳнатни муҳофаза қилиш, техника хавфсизлиги ва ёнғиндан муҳофаза қилиш қоида ва нормаларини.
Малака талаблари:
а) олий маълумотли дефектолог ёки логопед;
б) иш стажи талаб қилинмайди.