Maktab o`quv ishlari bo`yicha direktor o`rinbosari: Ganjayeva Z

III bosqich: Yangi mavzu mazmunini tushuntirish jarayoni:

Hokimiyat tarmoqlaridan qaysi biri inson huquqlarini himoya qi­lish borasida eng asosiy ekanligini aniqlash masalasi ustida hech o‘ylab ko‘rganmisiz? Hokimiyat tarmoqlaridan har biri inson huquqlarini himoya qilish vazifasini amalga oshiradi. Ammo ulardan har biriga inson huquqlarini himoya qilishning o‘z usullari va yo‘llari xosdir. Har bir insonning hayoti voqealarga boyligi va turli-tumanligi bilan qiziq. Biroq inson jamiyatda yashar ekan, uning xatti-harakatlari boshqa kishilar huquqlariga zid kelishi mumkin. Asosiy vazifasi davlat manfaatlarini va har bir odamning manfaatlarini muhofaza etishdan iborat bo‘lgan davlat organlari ham kishilar o‘rtasida hakamlik qilishga da`vat etilgandir.

Basharti, qonun chiqaruvchi organlar qonunlarni qabul qilsa, sud organ­lari esa qonunlar asosida odil sudlovni amalga oshiradilar. Shunday qilib, sud hokimiyati tarmog‘ining bosh vazifasi - inson huquqlarini himoya qilish, fuqarolar o‘rtasidagi nizolarni hal etish, aholi va davlat organlarining o‘zlari ham qonunlarni ijro etilishi ustidan nazoratni amalga oshirishdir.

Sud - odil sudlovni amalga oshirishga haqli birdan bir davlat hokimi­yati organidir. Sudyalar hal qiluvchi qarorlar va hukmlarini davlat nomidan chiqaradilar. Bu narsa hal qiluv qarorlari va hukmlar barcha tomonidan, shu jumladan, davlat organlari tomonidan so‘zsiz ijro etilishi shart ekanligini anglatadi.

O‘zbekiston Respublikasida sud hokimiyati konstitutsiyaviy, ma`muriy, fuqaroviy, xo‘jalik va jinoyat sudlovi orqali amalga oshiriladi. Sudlar orasidagi bunday taqsimot sudga tegishlilik, ya`ni ish ko‘rib chiqiladigan konkret sudning belgilanishi deb ataladi.