Magistrlik dissertatsiyasi mavzusi

Muammoning ishlanganlik darajasi:G’ovak muhitlarda bir jinsli boʼlmagan suyuqliklarning muhit sirtida oʼtirib qolishi va qayta suyuqlik oqimiga qoʼshilishini hisobga olgan holda oʼrganish boʼyicha nazariy tadqiqotlar dastlab oʼtgan asrda oʼtkazilgan va T.Ishasakining ishlari bilan bogʼliq. D.M.Mintsning ishlarida tarkibida muallaq zarrachalari boʼlgan suyuqlikning gʼovak muhitda harakati uchun modda balansi tenglamasi tuzilgan. Balans tenglamasiga qoʼshimcha ravishda muallaq zarrachalarning oʼtirib qolishi va qayta suyuqlik oqimiga qoʼshilishi intensivligi tenglamasi qaraladi. Oxirgi yillarda bir jinsli boʼlmagan suyuqliklarning gʼovak muhitlarda sizishi modellarini ishlab chiqish va takomillashtirish, shuningdek ularni sonli yechish usullari quyidagi olimlarning ishlarida qaralgan: K.Ives, M.Sharma, M.Elimelech, J.Bear, Ch.Tien, P.Bedrikovetsky, A.Adin, M.Rebhun, J.Herzig, V.Gitis, G.Barenblat, А.X.Mirzadjanzade, Ye.V.Venetsianov, K.S.Basniev, D.Mixaylov, А.Nikiforov va boshqalar.
Qattiq muallaq zarrachali suyuqliklar sizishi jarayonlari birinchi marta Yu.M.Shextman tomonidan tizimli ravishda tadqiq etilgan. Harakat va uzluksizlik tenglamalari asosida kichik kontsentratsiyali suspenziyalar uchun balans tenglamasi tuzilgan. Ye.V.Venetsianov tomonidan suspenziya sizishi modellarini adsorbtsiya jarayonlari modellariga oʼxshash koʼrinishda tuzish taklif qilingan.
Oʼzbekistonda suyuqlik va gazlarning gʼovak muhitlarda sizishi jarayonlari matematik modellari va hisoblash usullarini ishlab chiqishda F.B.Аbutaliyev, J.F.Fayzullaev N.M.Muxidinov,R.Sadullayev, I.Аlimov, J.Аkilov, B.X.Xoʼjayorov, I.K.Xujayev, N.Ravshanov, Sh.Qayumov, V.F.Burnashev va boshqa olimlarning ulkan hissalari qoʼshilgan. Xususan, B.Xoʼjayorov tomonidan kolmatatsion-suffozion sizish uchun dinamik omillarni hisobga oluvchi yangi kinetika tenglamasi taklif qilingan.
Tadqiqotning maqsadi: dinamik, diffuzion omillar, “eskirish” va “yuklanish” hodisalari hisobidan choʼkma hosil boʼlish jarayonining koʼp bosqichli boʼlishini hisobga olib, suspenziyalarning gʼovak muhitlarda sizishi va modda koʼchishi jarayonining matematik modellarini takomillashtirish va sonli yechishdan iborat.