Магистрлик диссертацияси мавзусининг асосланиши ва унинг долзарблиги

Магистрлик диссертацияси мавзусининг асосланиши ва унинг долзарблиги. Дунё хўжалиги таркибида энг жадал суръатларда ривожланиб бораётган иқтисодиёт соҳаларидан бири туризмдир. Туризм индустрияси кўпгина мамлакатларнинг иқтисодиётида муҳим ўрин эгаллайди, у муҳим макроиқтисодий тармоқлардан бири сифатида жадал ривожланмоқда. Мазкур соҳа дунёдаги кўпгина давлатларнинг асосий даромад манбаи сифатида уларнинг миллий иқтисодиётида муҳим ўрин тутмоқда. Шунингдек у ташқи иқтисодий алоқаларни ҳар томонлама ривожлантиришга, яхши қўшничиликка, турли мамлакатларнинг табиати, халқларнинг маданияти, урф-одатлари, анъаналари билан кенг кўламда танишишга имконият яратмоқда. Ривожланиб бораётган мамлакатларнинг туризм индустрияси асосан табиий ёки экологик туризм ҳисобига амалга оширилмоқда.

Ўзбекистон Республикаси Президентининг 2018 йил 6 февралдаги ПҚ-3509-сон “Кириш туризмини ривожлантириш чора-тадбирлари тўғрисида”ги, 2018 йил 7 февралдаги ПҚ-3514-сон “Ички туризмни жадал ривожлантиришни таъминлаш чора-тадбирлари тўғрисида”ги Қарорлари ҳамда 2020 йил 24 январдаги Ўзбекистон Республикаси Президентининг Олий Мажлисга мурожаатномаси, Вазирлар Маҳкамасининг 2020 йил 27 майдаги 332-сонли “Сурхондарё вилоятининг туризм салоҳиятидан самарали фойдаланиш ва уни ривожлантириш бўйича қўшимча чора-тадбирлар тўғрисида”ги қарори мамлакатимизда, жумладан Сурхондарё вилоятида туризм, жумладан, экотуризм фаолиятини дастурий асосда йўлга қўйишда мустаҳкам асос бўлди.
Экотуризмнинг илмий-назарий асосларини ва унинг табиий географик жиҳатларини очиб бериш, Ўзбекистон табиатини экотуристик имкониятларини аниқлаш, таҳлил қилиш, улардан оқилона фойдаланиш йўлларини кўрсатиш шу куннинг долзарб масалаларидан ҳисобланади. Диссертация мамлакатнинг экологик хавфсизлигини таъминлашга йўналтирилган асосий устивор йўналишларда кўрсатиб берилган табиатдан фойдаланиш жараёнларини мувофиқлигига эришиш мақсадларида олиб борилаётган илмий тадқиқот ишларини режаси билан боғлиқ ҳолда бажарилди.
Тадқиқот объекти. Магистрлик диссертация ишининг тадқиқот объекти сифатида Сурхондарё табиий географик округининг экотуристик объектлари ва ресурслари олинди.