Loyiha matni 49901-(61999)

177-modda. Narx va tariflarni tartibga solish sohasidagi davlat organlarining vakolatlari
Oʻzbekiston Respublikasi Vazirlar Mahkamasi:
narx va tariflarni tartibga solish sohasida yagona davlat siyosati amalga oshirilishini taʼminlaydi;
narx va tariflari davlat tomonidan tartibga solinadigan, shu jumladan vaqtincha tartibga
solinadigan tovar (ish, xizmat)lar roʻyxatlarini tasdiqlaydi;
narx va tariflarni toʻgʻridan-toʻgʻri va bilvosita tartibga solish tartibini tasdiqlaydi;
narx va tariflarni toʻgʻridan-toʻgʻri tartibga solish uchun eng maqbul shaklini tanlash qoidalarini
belgilaydi.
Oʻzbekiston Respublikasi Moliya vazirligi:
narx va tariflarni tartibga solish sohasida yagona davlat siyosatini amalga oshiradi;
narx va tariflarni tartibga solish sohasida, shu jumladan narx va tariflarni tartibga solishni joriy
etish, oʻzgartirish yoki bekor qilish yuzasidan takliflar ishlab chiqadi va Oʻzbekiston Respublikasi
Vazirlar Mahkamasiga kiritadi;
narx va tariflarni tartibga solish sohasida uslubiy rahbarlikni amalga oshiradi va ushbu sohadagi
boshqa vakolatli davlat organlarining faoliyatini muvofiqlashtiradi;
narx va tariflarni tartibga solish sohasida qonunchilik hujjatlari bilan yuklatilgan boshqa
vakolatlarni amalga oshiradi.
Boshqa davlat organlari oʻz vakolatlari doirasida:
narx va tariflarni tartibga solish sohasidagi qoidabuzarliklarni bartaraf etish toʻgʻrisida bajarilishi
majburiy boʻlgan qarorlar qabul qiladi, shuningdek qonunchilikka rioya qilinmagan holda oʻrnatilgan
narx va tariflarni bekor qiladi;
narx va tariflarni tartibga solish sohasida qonunchilik hujjatlari bilan yuklatilgan boshqa
vakolatlarni amalga oshiradi.
15-bob. Tadbirkorlik subyektlarining fuqarolik javobgarligini majburiy sugʻurta qilish
178-modda. Fuqarolik javobgarligini majburiy sugʻurta qilishning maqsadi
Tadbirkorlik subyektlarining inson hayoti, sogʻligʻi hamda jismoniy va yuridik shaxslarning
mol-mulkiga yetkazilgan zararning oʻrnini sugʻurta toʻlovlarini amalga oshirish orqali qoplash majburiy
sugʻurta qilishning maqsadidir.

---