Loyiha matni 49901-(61999)

51-modda. Masʼuliyati cheklangan jamiyat
Masʼuliyati cheklangan jamiyat deb bir yoki bir necha shaxs tomonidan taʼsis etilgan, ustav fondi
(ustav kapitali) taʼsis hujjatlari bilan belgilab qoʻyilgan miqdorlardagi ulushlarga boʻlingan jamiyat tan
olinadi. Masʼuliyati cheklangan jamiyatning ishtirokchilari uning majburiyatlari boʻyicha javobgar
boʻlmaydilar va jamiyat faoliyati bilan bogʻliq zarar uchun oʻzlari qoʻshgan hissalar qiymati doirasida
javobgar boʻladilar.
Jamiyatning oʻz hissasini toʻla qoʻshmagan ishtirokchilari jamiyat majburiyatlari boʻyicha har bir
ishtirokchi hissasining toʻlanmagan qismining qiymati doirasida solidar javobgar boʻladilar.
Masʼuliyati cheklangan jamiyatning tuzilishi, faoliyati, qayta tashkil etilishi va tugatilishi
sohasidagi munosabatlar Oʻzbekiston Respublikasining “Masʼuliyati cheklangan hamda qoʻshimcha
masʼuliyatli jamiyatlar toʻgʻrisida”gi Qonuni hamda boshqa qonunchilik hujjatlari bilan belgilanadi.
52-modda. Qoʻshimcha masʼuliyatli jamiyat
Bir yoki bir necha shaxs tomonidan taʼsis etilgan, ustav fondi (ustav kapitali) taʼsis hujjatlarida
belgilangan miqdorlardagi ulushlarga boʻlingan jamiyat qoʻshimcha masʼuliyatli jamiyat hisoblanadi.

---

project.gov.uz
06.06.2022
22
Bunday jamiyatning ishtirokchilari uning majburiyatlari boʻyicha oʻz mol-mulklari bilan qoʻshgan
hissalari qiymatiga nisbatan hamma uchun bir xil boʻlgan, jamiyatning taʼsis hujjatlarida belgilanadigan
karrali miqdorda solidar tarzda subsidiar javobgar boʻladilar. Ishtirokchilardan biri iqtisodiy nochor
(bankrot) boʻlib qolganida uning jamiyat majburiyatlari boʻyicha javobgarligi, agar jamiyatning taʼsis
hujjatlarida javobgarlikni taqsimlashning boshqacha tartibi nazarda tutilgan boʻlmasa, boshqa
ishtirokchilar oʻrtasida ularning qoʻshgan hissalariga mutanosib ravishda taqsimlanadi.
Qoʻshimcha masʼuliyatli jamiyatning huquqiy mavqei, uning ishtirokchilarining huquq va
burchlari Oʻzbekiston Respublikasining “Masʼuliyati cheklangan hamda qoʻshimcha masʼuliyatli
jamiyatlar toʻgʻrisida”gi Qonuni hamda boshqa qonunchilik hujjatlari bilan belgilanadi.