Lektsiya teksti Defektologiya (Logopediya) bakalavr ta`lim bag`dari 1-kurs ushin mo`lsherlengen Du`ziwshi

5. Gu`rrin`lesiwge (monolog so`zge) u`yretiw. Balalardı mektepke tayarlawda monolog so`zdi rawajlandırıw og`ada a`hmiyetli. Monolog so`z baladan o`zinin` pikirin tu`sinikli ja`ne izbe-iz aytıwdı talap etedi, bunday so`z tu`rin bala 5-6 jasta iyeley baslaydı. Sebebi, bul jasta logikalıq oylaw rawajlana baslaydı, tildin` grammatikalıq qurılısın iyelep aladı. So`zdin` monolog tu`ri balalarg`a ko`rgen na`rseleri tuwralı ha`r ta`repleme ha`m izbe-iz aytıp beriwge, o`zinin` pikirlerin durıs du`zilgen so`zler arqalı aytıwg`a imkan beredi.

Baylanısqan so`z (monolog so`z) balada basqalardın` gu`rrin`in tın`lawg`a ha`m onı tu`siniwge, qısqa, o`zlerine tanıs bolg`an waqıyanı qaytadan gu`rrin` etip beriwge, ertekte qatnasıwshı qaharmanlardın` so`zlerin tu`sinikli etip aytıp bere alıw sheberliginin` qa`liplesiwine ja`rdem etedi. Mektepke shekemgi ta`rbiya jasındag`ı (u`lken jastag`ı topar) balalar su`wrette ko`rsetilgen zatlar, o`zinin` o`mirine tiyisli waqıyalar tuwralı a`piwayı gu`rrin`ler do`retiwine, ko`rgizbeli quralsız, erkin tu`rde gu`rrin` do`retiwge u`yretiledi. Balalardı gu`rrin`lesiwge u`yretiw olardın` aqıl jag`ınan rawajlanıwına ja`rdem beredi, pikir ju`ritiw ko`lemi ken`eyedi, dıqqatlılıq, oylaw sıyaqlı psixologiyalıq protsessler rawajlanadı, so`zi ta`sirli bolıp baradı, balada o`zin tutıw ha`m ja`ma`a`t aldında so`yley alıw ta`jiriybesi payda boladı.