Lektsiya teksti Defektologiya (Logopediya) bakalavr ta`lim bag`dari 1-kurs ushin mo`lsherlengen Du`ziwshi

4. So`ylesiw tilin (dialogtı) qa`liplestiriw. Balalarg`a bilim ha`m ta`rbiya beriwde so`ylesiw tilin (dialogtı) u`yretiw u`lken a`hmiyetke iye. Mektepke shekemgi ta`rbiya jasındag`ı balalar menen so`ylesiw balalardın` ku`ndelikli ha`reketleri ha`m ha`r qıylı waqıya-ha`diyselerdi baqlawı na`tiyjesinde payda bolg`an tu`siniklerdi anıqlaw ja`ne onı bir sistemag`a salıwda en` za`ru`rli jumıs wazıypası bolıp esaplanadı. Balada so`ylesiw tilin qa`liplestiriw – bul basqalardın` so`zin tın`law ha`m tu`siniw, so`ylesiwdi quwatlaw, sorawlarg`a juwap beriw ja`ne soraw (sorawlar beriw) dan ibarat. Balanın` so`ylewinin` rawajlanıw da`rejesi onın` so`zlik baylıg`ına, tildin` grammatikalıq ta`repin iyelegenligine baylanıslı. Balanı so`ylew tilinge u`yretiw onın` so`ylesiw ma`deniyatın iyelew da`rejesine de baylanıslı. Ma`selen, sa`wbetlesi menen so`ylesip atırg`an waqıtta o`zinin` ha`m sa`wbetlesinin` so`zin hesh qashan bo`lmew, sorawlarg`a qol ko`terip a`deplilik penen, ruxsat berilgennen keyin juwap beriw, «awa» yamasa «joq» dep qısqa juwap bermey, asıqpay, oylap, son` tolıq, durıs juwap qaytarıwg`a u`yretiw kerek.

So`yleskende ortasha dawısta, pikirdi tu`sinikli etip aytıw, so`zdin` unamlı bolıwına itibar beriw, sonday-aq, so`ylep atırg`an waqıtta jerge, a`tirapqa qaramay, al doslarına qarap, eki qolın qaptalg`a tu`sirip, erkin, a`depli so`ylesiwge u`yretiwi ha`m bunı ha`r sabaqta balalardan talap etip barıwı za`ru`r.