Lekciya №3G Úshinshi áwlad sotalĺ baylanĺs sistemalarĺ Joba

LEKCIYA № 9. 3G ÚSHINSHI ÁWLAD SOTALĺ BAYLANĺS SISTEMALARĺ
Joba:

1. 
   3G sotalı baylanıs sistemaları;
   
2. 
   3G tarmaǵı koncepciyası;
   
3. 
   WCDMA texnologiyası;
   
4. 
   UMTS texnologiyası;
   
5. 
   CDMA-2000 texnologiyası;
   
6. 
   CDMA-2000 1x-EV-DO hám CDMA-2000 1x-EV-DV standartları;
   
7. 
   HSPA texnologiyası.
   

3G sotalı baylanıs sistemaları. 3G ataması menen (angl. third generation
– «úshinshi áwlad») maǵlıwmat uzatıw hám Internet tarmaqlarına joqarı tezlikte mobil jalǵanıw menen birge, maǵlıwmat uzatıw kanalın jaratıwshı radiotexnologiya járdeminde paydalanıwshılarǵa bir qatar xızmetler toplamın usınıwshı sotalı baylanıs sistemaları ataladı.
3G sistemaları mobil baylanıstıń túrli xızmetleri, global rouming hámde multimediyanıń keń múmkinshiliklerin, atap aytqanda: videotelefoniya hám videokonferenciya xızmetleri; Internet hám intranetke (yaǵnıy, ishki tarmaqlarǵa) joqarı tezlikte jalǵanıw; hár túrli biznes, kewil ashar hám ilimiy xızmetlerge baylanıslı maǵlıwmatlardı uzatıw sıyaqlılardı usınadı. Bul sistemalar abonentlerdiń háreketleniw tezligi sheklenbegen jaǵdayında – 64 Kbit/sek., háreketleniw tezligi sheklengen jaǵdayda (piyada júrgende tezlik) – 384 Kbit/sek., abonent háreketlenbegen jaǵdayında bolsa 2 Mbit/sek.qa shekem bolǵan tezliklerde maǵlıwmat uzatıw imkanın beredi. 3G sistemalarınıń ekinshi áwlad (2G) tarmaqlarınan tiykarǵı ózgesheligi hám úlken kólemdegi maǵlıwmatlardı joqarı tezlikte uzatıw múmkinshiliginde bolıp tabıladı. Bul bolsa óz náwbetinde mobil baylanıstı sapalıq jaqtan jańa dárejege kóteredi: bir tárepten abonent Internetke tolıq jalǵanıw, videobaylanıs xızmetleri, joqarı tezlikte maǵlıwmat uzatıw múmkinshiliklerine iye bolsa, ekinshi tárepten - operatorlar ámeldegi baylanıs xızmetlerinen payda kóriw menen birge, hár qıylı qosımsha xızmetlerin kórsetiw esabınan jańa dáramat dereklerine iye boladı. 3G sistemaları - videotelefon baylanısın shólkemlestiriw, mobil telefon járdeminde filmler hámde túrli telekórsetiwlerdi tamasha etiw múmkinshiligin de beredi.
Dúnyada 3G standartlarınıń tiykarǵı eki toparı: W-CDMA (UMTS, FOMA) hámde CDMA-2000 texnologiyaları tiykarındaǵı sistemaları bar. UMTS standartı tiykarınan Evropada, FOMA - YAponiyada, CDMA-2000 bolsa Amerika hám
Aziya kontinentlerinde tarqalǵan. Sonday-aq, tiykarınan Qıtayda tarqalǵan TDSCDMA standartı da 3G texnologiyaları toparına kiredi (9.1-keste).
9.1-keste. 2G áwladınan baslap sotalı baylanıs sistemalarınıń standartları.