Laboratoriyalıq jumıs

Laboratoriyalıq jumıs. Eriwshen’lik ko’beymesine ta’n ta’jiriybeler
1-ta’jiriybe. Gu’mis duzlarının’ eriwshen’lik ko’beytpesin anıqlaw.
a) Probirkag’a gu’mis nitratı eritpesinen 0.5 ml mug’darında salın’ ha’m onın’ u’stine 0,5 ml ko’lemdegi natriy xloridi eritpesinen quyın’, gu’mis xlorid aq sho’kpesinin’ payda bolıwın bayqan’. Payda bolg’an aq sho’kpe u’stine natriy sulfid eritpesinen tamshılatıp qosın’. Probirkadag’ı aq sho’kpenin’ qarayıw sebebin tu’sindirin’. Reaktsiya ten’lemesin jazın’. Gu’mis xloridi menen gu’mis sulfidinin’ eriwshen’ligi haqqında juwmaq shıg’arın’. Bunın’ ushın eriwshen’lik ko’beytpesi tablitsasınan paydalanın’.
b) Probirkag’a qorg’asın atsetat yamasa qorg’asın nitratı eritpesinen 1 ml salın’ ha’m onın’ u’stine natriy sulfatı eritpesinen tamshılatıp quyıp, qorg’asın sulfattın’ aq sho’kpesin payda etin’. Son’ınan payda bolg’an qorg’asın sulfatı sho’kpesine natriy sulfid eritpesinen tamshılatıp quyın’ ha’m shayqan’. Sho’kpe ne ushın qarayadı? Reaktsiya ten’lemesin jazın’. Qorg’asın sulfat penen korg’asın sulfidtin’ eriwshen’ligin salıstırın’.
v) U’sh probirka alıp, olardın’ birewine 1 ml natriy sulfat, ekinshisine 1 ml natriy karbonat, u’shinshisine kaliy xromat eritpesinen quyın’. Probirkalardag’ı eritpeler u’stine 1 ml den bariy xlorid eritpesinen qosın’. Reaktsiya ten’lemelerin jazın’ ha’m qanday jag’dayda sho’kpe payda bolıyaın tu’sindirip berin’. Bariydın’ qaysı zat penen payda etken sho’kpesi to’men eriwshen’likti ko’rsetedi?
g) Eki probirka alıp, olardın’ ha’r birine 1 ml den 0,001 n qorg’asın nitrat eritpesinen quyın’. Birinshi probirkadag’ı eritpe u’stine kaliy xlorid, ekinshi probirkag’a bolsa kaliy iodid eritpelerinen tamshılatıp qosın’. Ne payda boladı? Alıng’an na’tiyjelerdi duzlardın’ eriwshen’lik ko’beytpesi tiykarında tu’sindirip berin’. Reaktsiya ten’lemelerin molekulyar ha’m ionlı ten’leme tu’rinde jazın’.
2-ta’jiriybe. Sho’kpelerdin’ eriw sha’rtleri.
Eki probirka alıp. olardın’ ha’r birine 1 ml den kaliy xromat eritpesinen quyın’, son’ 1 ml den bariy xlorid eritpesinen qosın’. Ne baykaladı? Payda bolg’an sho’kpeni sharsharg’a filtr qag’azın jaylastırıp, filtrlen’. Probirkadag’ı sho’kpeler-din’ birewinin’ u’stine 2 n duz kislotası, ekinshisine 2 n sirke kislotası eritpesinen 1 ml den quyıp shayqan’ ha’m qaysı probirkada sho’kpenin’ ko’birek eriwin bayqan’. Reaktsiya ten’lemelerin jazın’. Bariy xromattın’ eriwshen’ligin onın’ eriwshen’lik ko’beytpesi arqalı tu’sindirin’.
3-ta’jiriybe. Metallardın’ sulfidlerin payda etiw ha’m olardın’ eriwshen’ligi.
Jeti probirka alıp, olarg’a 1 ml den kaliy xlorid, marganets sulfatı, temir sulfatı, tsink sulfatı, mıs sulfatı, qorg’asın nitratı ha’m kaltsiy xloridi eritpelerinen quyın’. Olardın’ ha’r qaysısına 1 ml a’tirapında ammoniy yamasa natriy sulfid eritpesinen tamshılatıp qosın’. Qaysı birinde sho’kpe payda boladı ? Reaktsiya ten’lemelerin molekulyar ha’m ionlı tu’rinde jazın’. Payda bolg’an sho’kpelerdin’ ren’i qanday ? Sho’kpelerdi filtr qag’azı ja’rdeminde filtrlep alın’. Sho’kpelerdin’ u’stine 2 n duz kislota qosıp eritin’. İslengen ta’jiriybeler na’tiyjesinde metall sulfidlerin suwda jaqsı eriytug’ın, suwda ulıwma erimeytug’ın, biraq kislotada eriytug’ın, suw ha’m duz kislotasında da erimeytug’ın sulfidler dep u’sh gruppag’a bo’lip jazın’. Eriwshen’lik ko’beytpesi ja’rdeminde sho’kpelerdin’ duz kislotasında eriw yamasa erimesligin tu’sindirip berin’.