Laboratoriyalıq jumıs

Laboratoriyalıq jumıs. Eritpeler
Eritpelerdin’ ulıwma qa’siyetleri. Gidratlar
1. Eritpenin’ diffuziyası a) Probirkag’a kaliy permanganatının’ kishkene kristalın salıp, u’stine probirkanın’ diywalı boyınsha suw quyıp shtativke ornalastırın’. Duz eritpesinin’ to’mennen joqarı ko’teriliwin bayqan’. B) Probirkanı suwg’a toltırıp, tikkesine shtativke bekitin’. Kaliy permanganatın siylege orap probirkanın’ awzına bekitin’. Bunda duzdın’ eritpesi joqarıdan to’men qaray taralg’anın ko’rin’.
Eki probirkadag’ı diffuziya tezligin salıstırın’.
2. Kobalt duzları gidratlarının’ du’ziliwi. Kobalt duzları gidratlarının’ du’ziliwin 1-tablitsada ko’rsetilgendey ha’r qıylı ren’ler boyınsha ko’remiz.

Kobalt dixloridi kristallogidratlarının’ ren’i.

Kristallogidratlar	Ren’i
CoCI2H2O	Jasıl-ko’k
CoCI21,5H2O	Jasıl- qon’ır ko’k
CoCI22H2O	Jasıl –sarg’ısh
CoCI24H2O	Qızıl
CoCI26H2O	Sarg’ısh

Duzlardag’ı gidratlıq suw molekulalarının’ mug’darın qızdırıw arqalı biliwge boladı.

Probirkag’a kobalt dixloridinin’ kontsentratsiyalı 1 ml eritpesin quyıp qızdırın’. Qızdırıwda qızıl ren’li eritpe jasıl-ko’k ren’ge, son’ suwıg’anda qaytadan qızıl ren’ge o’tedi.
Probirkag’a kobalt dixloridinin’ kontsentratsiyalı 1 ml eritpesin quyıp, u’stine kontsentratsiyalı duz kislotasınan tamshılatıp quyıp eritpenin’ ren’inin’ o’zgerisin baqlan’.
Aq qag’azg’a ag’ash tayaqsha menen kobalt dixloridinin’ kontsentratsiyalı eritpesi menen jazın’. Eritpe kepse qag’az betindegi jazıw bilinbeydi. Qag’azdı azg’ana qızdırsan’ız qaytadan jazıw ko’rinedi.
3. Duzlardın’ qurg’atılıwı ha’m suw sin’dirgishligi.
Farfor tabaqshag’a 3-5 g Na₂SO₄10H₂O duzın, al ekinshisine sonday mug’darda suwsız kaltsiy xloridin salın’. Bos eksikatordın’ ishine ekewinde salıp, awzın qaqpaqshası menen jaqsılap bekitip, kelesi jumısqa shekem qaldırın’. Bir neshe ku’nnen keyin ashkanda natriy sulfatının’ amorf poroshokke, al kaltsiy xloridi balqıg’anın ko’remiz.

4. Kristallizatsiyalang’an suw mug’darın anıqlaw.

Farfor tigeldi turaqlı salmaqqa jetkenshe qızdırıp, 0,01 g anıqlıqqa shekem o’lshen’. Tigelge 1-2 g anıqlıqqa shekem CuSO₄5H₂O (mıs kuporosı) duzınan o’lshep salın’. Tigeldi farfor u’shmu’yeshligine qoyıp, gaz gorelkasının’ jalınında qızdırın’. Alg’an duzın’ızdın ren’inin o’zgerisin bayqan’.
Duzdın’ ren’i tolıq ag’arg’annan keyin qızdırıwdı toqtatıp tigeldi eksikatorg’a salıp suwıtıp o’lshen’. Tigeldi tag’ı da 5-10 min dawamında qızdırın’, qaytadan suwıtıp o’lshen’. Turaqlı salmaqqa kelgenshe usı jumıstı qaytalan’.
Ta’jiriybe juwmaqları boyınsha mıs kuporosındag’ı kristallizatsiyalıq suwdın’ mug’darın esaplan’ ha’m mıs(II) sulfatının’ bir molekulasına qansha suw molekulası tuwrı keletug’ının tabın’.
Qaytadan mıs kuporosına suw tamshısın tamızıp ko’k ren’li duzg’a aylandırın’.