Konservalash usullari

Pomidor. Hozirgi vaqtda pomidor dunyo bo’yicha ochiq va himoyalangan yerlarda keng tarqalgan asosiy sabzavotlardan biri hisoblanadi. O’zbekiston ham yirik pomidor ishlab chiqaradigan davlatlardan hisoblanadi. 2007 yilda mamlakatimizda uni maydoni 58,47 ming gektarni, mevalarini yalpi hosili 1586,1 ming tonnani tashkil qilgan. Pomidorni ochiq yerdagi jami sabzavot ekinlari maydonidagi xissasi 36,6 foizini, yalpi sabzavot mahsulotlari bo’yicha esa 34,3 foizini tashkil qiladi (Balashev N.N., Zeman G.O., 1981; Zuyev V.I., Abdullayev A.G., 1982).

Pomidor mevalari tarkibida inson uchun zarur turli vitaminlar, organik kislotalar, mineral tuzlar mavjud bo’lib, ular ishtahani ochish, modda almashuvini yaxshilash xususiyatlariga ega bo’lib, mehnat qilish qobilyatlarini oshiradi. Sog’liqni saqlash tashkilotlari tomonidan berilgan tavsiyalarda O’zbekistonda har bir kishi mavsumdan tashqari davrda 6,5 kg sabzavot, shu jumladan 2,5 kg pomidor iste’mol qilishi kerakliligi ko’rsatib o’tilgan. Bu me’yorni ta’minlash uchun issiqxonalarda yetishtiriladigan pomidor hosildorligini oshirish va uni ishlab chiqarishni ko’paytirish maqsadga muvofiq (Zuyev V. va boshqalar, 2010).

Mamlakatimizda himoyalangan va ochiq yerlarda yetishtiriladigan pomidor mevalari yuqori kalloriyali bo’lib nihoyatda muhim oziqalik ahamiyatga ega. U asosan yangiligida iste’mol qilinadi va qayta ishlanadi.