Kitapxana com сайтындағы барлық китаплар тек танысыў ретинде берилген. Китаплар

ВЕНЕРАНЫҢ СКУЛЬПТУРАСЫНА
Сүўретиңди қандай шебер салды екен,
Келбетиңди қайсы ҳаялдан алды екен.
Қанша дәўир, қанша әўлад қылғынып,
Сынған қолың қайсы жерде қалды екен?
Арыўлықта әрман етсе жан нени,
Сулыў тулғаң өз бойына жәмледи.
Қолсыз мынаў журтты ийирип турғаның,
Қолың болса қырасаң ғой ҳәммени.
Май, 1973-жыл, Москва.
ТИГИЛЕМЕН ҚУС ЖОЛЫНА
Tигилемен қус жолына 
Қыял менен көк қанатлы. 
Жулдыз толы уллы дәрья 
Ағып барар салтанатлы. 
Сансыз жулдыз, жалғыз айға 
Мақпал түнде қарайман мен. 
«Жерден басқа және қайда

---

Ибрайым Юсупов - Йош
kitapxana.com
 - Қарақалпақ әдебиятының электрон китапханасы 93
Инсан бар?» деп сорайман мен. 
Бул саўалдың ерте-кешли 
Илим бир жуўабын табар. 
Адамнан да ақыл-если 
Бир мақлуқлар бар да шығар. 
Онда ҳаял-қызлар тегис 
Таққаны қымбатлы шығар. 
Көзи төртеў, қолы сегиз, 
Өзинше сымбатлы шығар. 
Болса болар...Бирақ та мен 
Соған кәмилдур ийманым: 
Сулыўлықта Сениң менен 
Бәслесе алмас олар, жаным. 
Гөззаллықта жоқдур шегиң, 
Теңи-тайың жоқ дүньяда. 
Жуп алақан, қос билегиң 
Сегиз қолдан-ҳәм зыяда. 
Төрт көз бенен телмирте алмас 
Еркеклерди өзине усап. 
Жүреклерди өртей алмас 
Сениң еки көзиңе усап. 
Ол ҳаяллар сендей болып 
Яр ышқында күйе алмас. 
Еркеклери мендей болып 
Шын кеўилден сүйе алмас. 
1971-ж.
ШОЙДАНИЯ
Шойдания – шийрин жаслық дияры! 
Көгершин қанатлы гөззал қыяллар 
Саған ушар, Бирақ та ҳәр сапары

---

Ибрайым Юсупов - Йош
kitapxana.com
 - Қарақалпақ әдебиятының электрон китапханасы 94
Бизди сеннен алыс әкетер жыллар. 
Сениң бостаныңа ким кирсе – шайыр. 
Демек сенде текте шайырлар жасар. 
Ақшам дарақларың силкинген сайын, 
Мийўа орнына гәўҳар жулдызлар шашар. 
Мен ҳәм мәҳәлинди журтларға усап, 
Несип әйлеп бул бостанда йошқанман. 
Жулдызларды «хан қызындай» уўыслап, 
Арзыўлымның аяғына шашқанман. 
Сонда қабағында жуп қумар көздиң 
Ол жулдызлар сөнген әсте мөлдиреп. 
Сол бир тәкирарланбас өспирим гездиң 
Ләззетин еслесе елжирер жүрек. 
Шойдяния – туңғыш муҳаббат бағы, 
Бағда жатқан жөнсиз соқпақлы жоллар. 
Аңсағаным менен барсам деп тағы, 
Бизди басқа жолдан әкетер жыллар. 
*** 
Төбемде гүўилдер бәлент шынарлар, 
Уйқысыз таңларды атырғанымда. 
Не деп гүўилдесип турғанын олар 
Айтып берер едим болсаң жанымда. 
Булақлардың не деп сылдырлағанын, 
Самал жумсақ лебин қайдан алғанын 
Айтып берер едим мен саған, жаным, 
Болағойғаныңда ҳәзир жанымда. 
Шынар гүўилдиси, бүлбүл намасы, 

---

Ибрайым Юсупов - Йош
kitapxana.com
 - Қарақалпақ әдебиятының электрон китапханасы 95
Бәри тәрип етер сени шамасы. 
Бир сырлы ышқының симфониясын 
Бирге тыңлар едик болсаң жанымда. 
Ай жүзер еслетип ақ дийдарыңды, 
Түнги салқын шертер кеўил тарымды, 
Саған болған ышқы сағынышларымды, 
Бәри айтар еди болсаң жанымда. 
1975 ж.
СОҚПАҚ
Бағ ишинде жатқан жөнсиз соқпақта 
Зиңирейип узақ тостым жолыңды. 
Урыдай алдыңды орап тоқтаттым, 
Қарап алдымдағы оңлы-солымды. 
Қумар көзиң үрккен егиз қозыдай 
Жаўтақлады өрден-ыққа жуўырып. 
«Почтальонман, қорықпа қарындасым, ҳәй» 
Деп хат бердим төс қалтамнан суўырып. 
- Почтадан хат келмес мөрсиз, маркасыз, 
Бизиң почтальон сен емес, бөтен. 
- Егер ҳәзир алып қалмасаң сен қыз, 
Хатты усы жерге таслап кетемен... 
Қудай билсин хатта не жазылғанын... 
Ҳәмме оқып, сени сөз қылмаспа екен: 
Жерде адам, көкте жулдыздың бәри, 
Ҳәтте, қоңысыңның ийтине шекем... 

---

Ибрайым Юсупов - Йош
kitapxana.com
 - Қарақалпақ әдебиятының электрон китапханасы 96
Мурныңның ушына шығып ашыўың, 
Аўыр сөзлер айттың, хатты алмадың. 
Питпеди соқпақтан шығып қашыўың, 
Арсыз почтальон да изден қалмады... 
Сол бәҳәрги кешти ойлайман ҳәр ўақ, 
Сонда ҳаслан ойламапбыз-аў биз дым: 
Бағ ишинде жатқан сол заңсыз соқпақ – 
Басы екенин заңлы турмысымыздың... 
1969-ж.