Kirish,,0'rta asrlar tarixi haqida

Ijtimoiy ziddiyatlarning kuchayishi. 1348- yilda Angliyada qora o`lat - vabo kasalligi tarqaldi. Buning natijasida aholining 1/3 qismi qirildi. Oqibatda ishchi kuchiga bo`lgan talab nihoyatda oshib ketdi. Lordlar o`zlari istagan miqdorda ishchi kuchi topa olmay qolganlar. Ayniqsa, ritsarlar (mayda feodallar) qiyin ahvolga tushib qolishgan. Chunki ishchi kuchining tanqisligi yollanib ishlovchilar uchun to`lanadigan haq miqdorining oshishiga olib kelgan. Ritsarlar va shahar mulkdorlari qimmatbaho ishchi kuchi yollay olmas edilar. Shunday sharoitda qirol farmon chiqargan. Unga ko`ra, yeri, yashash joyi bo`lmagan, yoshi oltmishdan oshmagan barcha erkak va ayollar taklif etilgan ish joyiga borishga majbur edilar. Buning ustiga, farmonda ish haqi kasallik tarqalganiga qadar qancha bo`lsa, shuncha miqdorda saqlanib qolishi ko`rsatilgan edi. Tabiiyki, parlament qirol farmonini tasdiqlagan. Farmonga itoat etmaganlar qattiq jazolangan.

Bu ham yetmaganidek, 1377- yilda „jon solig`i" deb ataluvchi soliq joriy etilgan. Bu Fransiya bilan olib borilayotgan urush (yuz yillik urush) xarajatlarining tobora ortib borishi oqibati edi. Bunday soliq Angliya tarixida hech qachon bo`lmagan edi. Qonunga ko`ra, 14 va undan katta yoshdagi barcha fuqarolar jon solig`i to`lashga majbur edilar. Bu soliqni belgilash chog`ida mulkiy holat hisobga olinmagan. Bu dehqon oilalarini holdan toydirgan. Oqibatda dehqonlar qo`zg`oloni yuz bergan.

Qo`zg`olonning yetilishida kambag`al ruhoniylar targ`iboti ham maTum rol o`ynagan. Ular krepostnoylikka qarshi edilar. Ruhoniylar dehqonlar orasidagi o`z va'zlarida: „Xudo hamma kishilarni teng qilib yaratgan, binobarin, yer-suv hammanikidir", - der edilar. Ular: „Odam Ato yer haydab, Momo Havo charx yigirgan paytlarda kim dvoryan (katta yer egasi) bo`lgan, axir?" - degan qochiriqli so`zlarni ko`p qaytarganlar.