Kirish,,0'rta asrlar tarixi haqida

Atamalar mazmunini bilib oling

Parlament (fransuzcha so`z bo`lib, gapirmoq degan ma'noni anglatadi) - davlatning qonun chiqaruvchi hokimiyati. Xartiya (yorliq) - qo`lyozma hujjat.

Yepiskop - cherkovni boshqaruvchi ruhoniy.

27-§. Angliyaning XIV - XV asrlardagi iqtisodiy va ijtimoiy taraqqiyoti

Tayanch tushunchalar: Barshchinaning siqib chiqarilishi. Jon solig`i. Uot Tayler qo`zg`oloni. Qo`zg`olonchilarning talablari. Qo`zg`olonning oqibatlari.

Iqtisodiy taraqqiyot. XIV asrda Angliya iqtisodiy taraqqiyotida katta siljish yuz berdi. Chunonchi, chet davlatlar bilan savdo aloqalari o`sdi. Bu esa ingliz qishlog`ini keng bozor aloqalariga tortdi. Ayni paytda Angliyaning o`zida shaharlarning o`sishi qishloq xo`jalik mahsulotlariga bo`lgan talabni oshirib yubordi. Natijada tovar-pul munosabatlari yanada rivojlandi. Bunday sharoitda lordlar (katta yer-mulk egalari) uchun barshchinani pul solig`i bilan almashtirish afzal bo`lib qoldi. Endi lordlar o`z yerlarini ijaraga bera boshladilar. Ijara haqi pul bilan to`lanadigan bo`ldi. Oxir-oqibatda XIV asrning birinchi yarmida barshchina butunlay siqib chiqarildi. Bu katta ijobiy ijtimoiy hodisa edi. Ayni paytda lordlarning pul solig`i miqdorini orttirib borishi ijarachi dehqonni og`ir ahvolga solib qo`ya boshlagan.

Bundan tashqari, lordlar bekor yotgan yerlarni, shuningdek, dehqonlar foydalanib kelayotgan jamoa yaylovlarini ham egallab olishni davom ettirganlar. Bu omillar dehqonlar noroziligining o`sib borishiga sabab bo`lgan.