Kimyo fanidan laboratoriya mashg’ulotlari

Ishning bajarilishi

1-tajriba. Metallning kislotada erish protsessiga galvanik juft hosil bo’lishining ta’siri. Burchak hosil qilib egilgan shisha nayga xlorid kislotaning 1.0 n. eritmasidan quying va uning bir tirsagiga ensiz rux plastinkasini tushiring. Reaksiya tenglamasini yozing.

Korroziyani ajralib chiqayotgan vodorod pufakchalariga qarab kuzatish mumkin. Nayning ikkinchi tirsagiga huddi shu eritmaga, rux plastinkasiga tegmaydigan qilib, mis sim tushuring. Mis yuzasida vodorod ajralmayotganiga to’la qanoat hosil qiling. Mis simni, rux bilan tutashguncha, suyuqlikka ko’proq kiriting. Shunda mis yuzasida vodorod pufakchalari paydo bo’ladi. Bu galvanik juftda boradigan protsesslarni tushuntiring. Bundagi katod va anodni tushuntirib bering.

2-tajriba. 2-3 ml mis sulfat eritmasi quyilgan probirkaga rux bo’lakchasini soling. 4-5 min. dan so’ng eritmani to’king va usti mis bilan qoplangan ruxni ehtiyotlik bilan bir necha marta suvda yuving. Ikkita probirkaga 3-4 ml dan xlorid kislota eritmasi quying. Probirkalardan biriga mis qoplangan rux bo’lagini, ikkinchisiga esa mis sulfat eritmasi tasir ettirilmagan rux bo’lakchasini tushuring.

Probirkaning qaysi birida vodorod kuchli ajralib chiqadi? Nima sababdan?