Кичик гуруҳ (3-4 ёш)

Жисмоний ривожланиш 
Тарбиячи жисмоний тарбия фаолиятига оид турли усулларни болалар билан 
биргаликда уларнинг ҳоҳишларини ҳисобга олган ҳолда танлаши мақсадга мувофиқдир. 
Уларни жисмоний тарбия бўйича машқларни онгли равишда тушуниб, аниқ ва тўғри 
бажаришга, ҳаракатли ўйинларнинг қоидаларига риоя этишга ўргатиш, енгил юриш ва 
югуришга, юриш вақтида таянчга кучлироқ таяниб итарилиб чопишга, оёқни баландроқ 
кўтариш, қадам оралиғини ошириш учун секин, ўртача тезликда, тез югуришга, югуриш 
вақтида, турли тўсиқлардан сакраб ўтишга ўргатиш. 
Югуриб келиб баландлик ва узунликка сакраш, сакрашнинг турига қараб ерга тушиш, 
тушаётган вақтда ўзини йиғиштириб олиш кўникмаларини шакллантириш, бир қўл билан 
коптокни отиш ва илиб олишга, бирор буюмни қулочкашлаб отишни, ирғитиб ташлаш билан 
бирга қўшиб олиб боришга, тирмашиб чиқиш ва тушишнинг турли хил усулларини
ўргатиш, болани ўз ҳаракатини бажаришга, таҳлил қилишга, ўзга болалар хатти-ҳаракати 
билан қиёслашга, қоматни тўғри тутишга, мускулларни мустаҳкамлашга ёрдам берувчи 
машқларни бажаришга ўргатиш.
Болаларни велосипедда учиш, сузишга оид турли усуллар, ҳар хил спорт ўйинларининг 
қонун қоидаларини қисқача ўргатиб бориш. Ўйинда ўзлаштирилган қоидаларга риоя 
қилишларига ҳам имконият яратиш. Кураш тушишининг айрим усуллари, қоидаларини 
ўргатиш. (Масалан, самбо усуллари). 
Жисмоний сифатларни ўстириш, мувозанат сақлаш, ҳаракатни бошқариш ҳамда фазода 
мўлжалга олишни шакллантиришни давом эттириш лозим. 
Уюшқоқлик, фаоллик, мустақиллик, дўстона муносабатлари ва ўзаро ёрдам кабиларни 
тарбиялаш. Спортнинг турли хиллари билан таништириш машҳур спортчилар билан қисқача 
таништириш уларнинг ҳаётига оид қизиқарли воқеаларни сўзлаб бериш шу орқали болалар 
қалбида спортга нисбатан муҳаббатни уйғотиш. 

---

70