Кичик гуруҳ (3-4 ёш)

Отиш, илиб олиш ва ирғитиш машқлари. Болага буюмларни узоққа 
ва нишонга ирғитишда бармоқларни кучли ҳаракатлантириб отишга 
ўргатиш. Копток билан хилма хил ва ишонч билан ҳаракат қилишга ўргата 
бориш. Тўпни юқорига (камида 10 марта) отиш ва илиб олиш, худди шу 
машқнинг ўзини чапак чалиб айланиб ва бошқача усуллар билан бажариш; 
коптокни бир қўлдан иккинчи қўлга олиб ерга уриб бажариш. Коптокни 
бир-бирига, пастдан ва бошидан ошириб ирғитиш.
Эмаклаб юриш ва тирмашиб чиқиш машқлари. Эмаклаб юриш 
гимнастика ўриндиғи бўйлаб қоринда ва елка билан ётиб қўлларга таяниб 
ва оёқларни итариб хона бўйлаб эмаклаб юриш, гимнастика ўриндиғи 
устидан қатор қилиб қўйилган тўсиқлар ичидан эмаклаш. Турли усуллар 
билан гимнастика нарвончасига тирмашиб чиқишни машқ қилдириш.
Гимнастика нарвонининг бир зинапоясидан иккинчи зинапоясига ўтиш. 
Нарвонга чиқиб тушиш, ходача бўйлаб тирмашиб чиқишга ўргатиш.
Спорт машқлари. Велосипед ҳайдаш. Икки ғилдиракли 
велосипедни тўғри йўналиш бўйлаб, бурилиб, доира бўйлаб, “илон изи” 
бўйлаб ҳайдаш. 
Сузиш. Галма-гал нафас олиб, нафас чиқариб сузиш, кўкраги ва орқа 
томони билан ўгирилиб сузиш, сувга боши билан шўнғиш, сувда кўзларни 
очиш. Кўкрак билан, елкада сузиш, оёқлар билан ҳаракатлар (юқори, 
пастга) қилиш. Саёз сувда қўлларни ерга тираб олдинга сурилиш. 
Ихтиёрий усулда сузишни ўргатиш.
Умумривожлантирувчи машқлар. 
Қўл ва елка учун машқлар. Дастлабки ҳолат: гавда тик тутилган, 
оёқлар елка кенглигида очилган, қўлларни юқорига, олдинга, ён 
томонларга кўтариш, товонларни жуфтлаб, оёқларни очиб, тик тутган 
ҳолатда оёқ учида кўтарилиш. Қўлларни кўкрак олдида тутган ёки 
елкаларга қўйган ҳолатдан уларни юқорига ён томонга чўзиш. Елкаларни 
кўтариш ва пастга тушириш. Тирсакдан букилган қўлларни олдинга ва ён 
томонларга шахдам ёзиб (бармоқлар мушт қилиб сиқилган), тирсакларни 
орқага букиш (2-3 марта) ва қўлларни кўкрак олдидаги ҳолатдан ён 
томонга чўзиш. Қўллар тирсакдан букилган, бармоқлар елкага теккан 
ҳолда айланасимон ҳаракатларни бажариш. Бир қўлда халқани 
айлантириш; қўллар олдинда, бармоқларни очиш ва ёпиш, бош бармоқни 
букиш ва бармоқларни навбатма-навбат унинг устига букиш.