Jumamuratova iroda, 192-guruh “Ta’viz ul-oshiqin” devonining 2014-yilgi nashri bilan tanishish / 1

Soʻzingdir oʻzga soʻzlardan ziyoda,

Senga farzand, bizga xonazoda,

deb shoirning zimmasidagi burch alohida ekanligini anglatadi hamda unga, yuqorida ta’kidlanganidek, otalarcha mehr koʻrsatish zarurligini, shoir oʻz soʻzlarini parishonu darbadar, otasiz oʻgʻildek eshikma-eshik sangʻitib qoʻymasligi lozimligini uqtiradi. Ogahiy shoh Feruz tilidan oʻziga soʻz borasida nasihatlar aytishda davom qiladi. Shoirga she’rini yetimdek yigʻlatib, qarovsiz qoldirmaslikni ta’kidlash barobarida, she’rlarini yaxshi yomon deb navlarga ajratib oʻtirmasdan, bir joyga jamlashi zarurligini alohida ta’kidlaydi, oʻz she’rlariga oʻzini ota oʻrnida tutishini uqtiradi. Chunki ota ham oʻz farzandlarini yaxshi-yomonga ajratmay, birdek xolis mehr bilan tarbiyalamogʻi kerak. Shuning uchun ham unga farzandlarini bu tosh, bu gavhar, deb tabaqalashtirib o'tirmoq nojoizdir. Chunki, shoir ta’kidlashicha, farzand jigardan bunyod boʻladi.