Jo`rayeva A

Nazorat savollari

1. 
   Oqsillarni amfoterlik xossalarini namoyon bo`lishining qanday sabablari bor?
   
2. 
   Izoelektrik nuqta nima?
   
3. 
   Oqsillarning kolloidlik xossalari nimaga bog`liq?
   
4. 
   Osmotik va onkotik bosim nima?
   
5. 
   Oqsillarning erishiga ta’sir etuvchi omillar qaysilar?
   
6. 
   Oqsillarning gel hosil qilish qobiliyati nimaga asoslangan?
   
7. 
   Tuzlanish nima va undan amaliyotda qanday foydalaniladi?
   
8. 
   Denaturatsiya qanday jarayon?
   
9. 
   Denaturatsiyalovchi omillarga qanday omillar kiradi?
   
10. 
    Denaturatsiyalangan oqsillar qanday xossalari bilan tabiiy oqsillardan farq qiladi?
    

1.5. Oqsillarning tasnifi, nomlanishi va vazifalari


Oqsillarning tasnifi va nomlanishi. Turli o`simliklar, hayvonlar va mikrob hujayralaridan, hujayra komponentlaridan, to`qimalar ekstraktlaridan xilma-xil oqsil preparatlari ajratib olingan. Organizmning a’zo va to`qimalarida o`ziga xos oqsillar uchraydi. O`simlik va hayvon oqsillari qaysi turga mansubligiga qarab ham bir-biridan farq qiladi, umuman oqsillarning turga xosligi tabiat qonunidir. Olimlar ularni ayrim guruhlarga bo`lish ustida ko`pdan beri ish olib borsalar ham haligacha qoniqarli tasnif topilgani yo`q. Buning sababi ularning bir xil elementlardan tuzilganliklari, shuningdek xilma-xil struktura variantlari va funktsional xususiyatlaridir. Shunga asosan oqsillarni fizik-kimyoviy, funktsional va struktura belgilari bo`yicha tasniflashga harakat qilinadi.
Fizik-kimyoviy tasniflash – oqsillarni elektrokimyoviy va qutbli xossalariga asoslanadi. Ushbu belgilarga ko`ra oqsillar qutbli yoki gidrofil (tarkibida qutbli guruhlari ko`p, yaxshi eriydigan), qutbsiz yoki gidrofob (tarkibida qutbsiz qoldiqlar bo`ladi, deyarli erimaydi) va amfipatik yoki amfifil (ikki tomonlama belgilarga ega – molekulaning bir qismi qutbsiz, boshqa qismi esa qutbli; asosan membrana oqsillari) guruhlariga bo`linadi.