Iv bob. Zamonaviy ta’lim tizimida oʻquv jarayonini nazorat qilish va baholash

IV BOB. ZAMONAVIY TA’LIM TIZIMIDA OʻQUV JARAYONINI NAZORAT QILISH VA BAHOLASH


4.1. Zamonaviy oʻquv jarayonida pedagogik nazorat

Talabalar bilimini nazorat qilish va reyting tizimi orqali baholashdan maqsad ta’lim sifatini boshqarish orqali raqobatbardosh kadrlar tayyorlashga erishish, talabalarning fanlarni oʻzlashtirishida boʻshliqlar hosil boʻlishini oldini olish, ularni aniqlash va bartaraf etishdan iborat.

1. 
   Ta’lim jarayonida pedagogik nazoratning asosiy vazifalariga quyidagilar kiradi:
   

• 
  talabalarda Davlat ta’lim standartlariga muvofiq tegishli bilim, koʻnikma va malakalar shakllanganligi darajasini nazorat qilish va tahlil qilib borish;
  
• 
  talabalar bilimi, koʻnikma va malakalarini baholashning asosiy tamoyillari: Davlat ta’lim standartlariga asoslanganlik, aniqlik, haqqoniylik, ishonchlilik va qulay shaklda baholashni ta’minlash;
  
• 
  fanlarning talabalar tomonidan tizimli tarzda va belgilangan muddatlarda oʻzlashtirilishini tashkil etish va tahlil qilish;
  
• 
  talabalarda mustaqil ishlash koʻnikmalarini rivojlantirish, axborot resurslari va elektron manbalardan samarali foydalanishni tashkil etish;
  
• 
  talabalar bilimini xolis va adolatli baholash hamda uning natijalarini vaqtida ma’lum qilish;
  
• 
  talabalarning fanlar boʻyicha kompleks hamda uzluksiz tayyorgarligini ta’minlash;
  
• 
  oʻquv jarayonining tashkiliy ishlarini kompyuterlashtirishga, ya’ni ma’lumotlar bazasini shakllantirishga sharoit yaratish.
  

2. Fanlar boʻyicha talabalar bilimini baholab borish reyting nazorati jadvallari va baholash mezonlari asosida amalga oshiriladi.
3. Fanlar boʻyicha reyting nazoratlari jadvali har bir professor oʻqituvchi tomonidan fan dasturi va xususiyatlaridan kelib chiqqan holda nazorat turi, soni va ularni oʻtkazish muddatlari, baholash mezonlarini oʻz ichiga olgan holda ishlab chiqiladi.
Pedagogik va axborot texnologiyalarining ta’lim jarayoniga joriy etilishi ta’lim vositalarining yangi avlodi va ta’limning soʻnggi turlari koʻrinishida oʻz mohiyatiga ega boʻlishi bilan ahamiyatlidir. Bugungi kunda ta’lim jarayonida foydalanilayotgan an’anaviy oʻqitish usullariga qoʻshimcha oʻquv vositalari deb hisoblangan barcha multimedia oʻquv uslubiy elektron mahsulotlar shular jumlasidandir. Oʻquv-uslubiy elektron mahsulotlarning imkoniyatlari va kiritilgan ma’lumotlar asosida turlarga ajratish mumkin.