ILMIY AXBOROTNOMA UNIVERSITETIMIZ HAYOTIDAN
2016-yil, 2-son
IQTIDORLI OLIM, FAOL JAMOATCHI VA BILIMDON HUQUQSHUNOS
So‘z yuritmoqchi bo‘lganimiz ushbu inson - tavalludining 70 bahorini qarshi olayotgan
Samarqand davlat universiteti fakultetlararo nemis, fransuz va rus tillari kafedrasi professori,
filologiya fanlari nomzodi Muso Muhammadievich Yo‘ldoshev bizning zamondoshimiz, hamkasbimiz
va hamkorimiz bo‘ladilar.
Muso Yo‘ldoshev 1946-yilda Ishtixon (sobiq Mitan) tumanida tavallud topgan. O‘rta maktabni
tugatgach yosh Muso 1963-yilda Samarqand davlat universiteti chet tillar fakulteti talabalari safidan
o‘rin oldi. 1968-yilda universitetni a’lo baholar bilan tugatdi. O‘zining tashkilotchilik qobiliyatini
ko‘rsata olganligi hamda dorilfununni a’lo baholar bilan tugatganligini e’tiborga olib, chet tillar
fakulteti fransuz va lotin tillari kafedrasiga ishga olib qolindi. 1971–1972-yillarda Ukrainaning Lvov
davlat universitetida lotin tili bo‘yicha qayta tayyorlash kursini tugatdi.
Mehnat faoliyati davomida Muso domla 1975-yilda huquqshunoslik fakultetining kechki
bo‘limiga o‘qishga kirib, uni 1981-yilda muvaffaqiyatli tugatdi. Domla 1980-yilda sobiq SSSR Fanlar
akademiyasining tilshunoslik institutiga tadqiqotchi sifatida qabul qilinadi va 1986-yilda mashhur
turkolog olima, professor Ganjieva Ninel Zaynalovna rahbarligida nomzodlik dissertatsiyasini himoya
qilib, filologiya fanlari nomzodi ilmiy darajasining sohibi bo‘ldi.
Mehnat faoliyati jarayonida o‘zini ko‘rsata olgan Muso Yo‘ldoshev dastlab chet tillar fakulteti
sport ishlari bo‘yicha dekan muovini, keyinchalik fakultet kasaba tashkilotining raisi etib tayinlandi.
1986-yildan 2001-yilgacha universitet kasaba uyushmasi qo‘mitasi raisligi lavozimida samarali
ishladi. 1996-yildan Janubiy Qozog‘iston universiteti rahbariyati tomonidan huquqshunoslik
fakultetiga lotin tili va Rim huquqidan ma’ruza o‘qish uchun taklif qilindi. Dars o‘tish jarayonida
fakultet ishchi o‘quv dasturini tayyorlashda uslubiy yordam berganligi va o‘quv qo‘llanmasi yozib
berganligini e’tiborga olib, professor lavozimiga qabul qilindi va keyinchalik beg‘araz ko‘rsatgan
ilmiy, uslubiy yordamlari evaziga professor diplomi bilan taqdirlandi.
2001-yildan boshlab o‘rta maxsus ma’lumotga ega bo‘lgan maktab o‘qituvchilari uchun
ochilgan maxsus sirtqi bo‘lim dekani vazifasiga tayinlandi.
Shuningdek, Muso Muhammadiyevich viloyat miqyosidagi jamoat ishlarida ham faol qatnashib
kelmoqda, Oliy Majlisga deputat saylovida okrug raisi, O‘zbekiston Respublikasi Prezidentligiga
saylovni o‘tkazishda uchastka komissiyasi a’zosi, Mahalla fuqarolari yig‘ini raisligiga o‘tkazilgan
saylovlarda huquqshunos maslahatchisi kabi topshiriqlarni bajarib kelmoqda.
Muso Muhammadiyevich Yo‘ldoshev mehnat faoliyati davomida 120 dan ortiq ilmiy, ilmiy-
uslubiy va ilmiy-ommabop maqolalar chop etdi. Shuningdek, Muso Yo‘ldoshev tomonidan lotin tili
fanidan chop etilgan darslik va o‘quv qo‘llanmalari talabalar uchun zarur o‘quv adabiyotlari vazifasini
o‘tamoqda.
Muso Muhammadiyevich Yo‘ldoshev O‘zbekiston Xalq ta’limi a’lochisi va O‘zbekiston
Respublikasi Mustaqilligining 20-yilligi ko‘krak nishonlari hamda universitetda xizmat ko‘rsatgan
dotsent diplomi bilan taqdirlangan. Hozirgi kunda filologiya fakultetining fakultetlararo nemis, fransuz
va rus tillari kafedrasi dotsenti lavozimida mehnat qilib kelmoqda.
Muso Yo‘ldoshev harakatchan, mehnatsevar, to‘g‘ri so‘zli, boshqalarga ko‘maklasha oladigan,
yurt kezgan, ko‘p tilni biladigan, lotin tili va Rim huquqi mutaxassisi, turkiy tillar genezisining
tadqiqotchisi, tillarning qiyosiy grammatikasi (Yevropa va turkiy tillar) bo‘yicha respublikamizdagi
taniqli mutaxassis, mohir tarjimon, adabiyotshunos va tanqidchi, shirin suhbatdosh, eng asosiysi oddiy
va kamtarin inson.
Xullas, u kishining ilmiy-ma’rifiy, ta’lim sohasiga oid maqolalari, suhbatlari, tarjimalari,
mulohazalari, taqrizlarini iqtidorli olim, roman va turkiy tillarning zahmatkash tadqiqotchisi, mohir
tarjimon, yetuk huquqshunos, filologiya fanlari nomzodi, Janubiy Qozog‘iston va Samarqand davlat
universiteti professori Muso Muhammadiyevich Yo‘ldoshev ilmiy ijodiy faoliyatining ko‘zgusi, desak
bo‘ladi. Ushbu ko‘zguda biz yuqorida sanab o‘tgan Muso Yo‘ldoshevning barcha ijobiy fazilatlari va
xislatlari ko‘rinib turibdi.
Muso Muhammadiyevich oilasi yurtimizdagi ibratli oilalardan biri hisoblanadi.
Do'stlaringiz bilan baham: 
