Ишмурадов шухрат улуғбердиевич

Муаммонинг ўрганилганлик даражаси. Республикамиз шароитида дон ва такрорий экинларини экиш учун тупроқни тайёрлашда унга дискли плуглар билан ишлов бериш жараёни ва параметрларини асослаш бўйича илгари алоҳида тадқиқотлар олиб борилмаган.
Диссертация ишининг илмий-тадқиқот ишлари режалари билан боғлиқлиги. Бу иш 2009-2011 йилларга мўлжалланган ЎзР ФТРМҚнинг ИТД-15 “Саноат, транспорт, қишлоқ ва сув хўжалиги учун илмий ҳажмдор, иш унуми юқори, рақобатбардош, экспортга йўналтирилган технологиялар, машиналар, ускуналар, асбоблар ва эталон воситалари, ўлчаш ва назорат усулларини яратиш” дастурининг ҚХА-15-022 “Тупроққа асосий ва экиш олдидан ишлов бериш учун энергия-ресурстежамкор ҳамда юқори иш унумига эга бўлган машиналар ишлаб чиқиш” лойиҳаси бўйича бажарилган.
Ишнинг мақсади. Дон ва такрорий экинлар экиладиган далаларга асосий ишлов беришда энергия – ресурстежамкорликни таъминлаш, иш унуми ва сифатини ошириш учун дискли плуг ишлаб чиқиш ва унинг параметрларни асослаш.
Тадқиқот вазифалари. Ушбу тадқиқот ишининг асосий вазифаси Республикамиз тупроқ иқлим шароитида дон ва такрорий экинлар экиладиган далаларга ишлов бериш учун дискли плуг ишлаб чиқиш ҳамда унинг параметрлари ва иш режимларини асослашдан иборат. Шунга мос равишда тадқиқот вазифаларига қуйидаги масалаларни ўрганиш киритилди:
- тупроққа ағдариб ишлов бериш усуллари ва уларни амалга оширишда қўлланиладиган ҳар хил турдаги қуролларга оид маълумотлар ҳамда шу йўналишда илгари бажарилган илмий –тадқиқот ишларининг таҳлили;
- дискли плуг иш органини тупроқ билан ўзаро таъсирлашиш жараёнининг математик моделларини тузиш ва шу асосда унинг параметрларини аниқлаш имконини берадиган аналитик ифодалар олиш;
- дискли плуг параметрлари ва агрегат ҳаракат тезлигини унинг агротехник ва энергетик иш кўрсаткичларига таъсирини ўрганиш;
- дискли плуг параметрларининг рационал қийматларини аниқлаш;
- тавсия этилаётган параметрлар бўйича дискли плуг ишлаб чиқиш ва синовларини ўтказиш;
- дискли плугнинг иқтисодий кўрсаткичларини аниқлаш.