Ishdan maqsad: Ko‘p agentli texnologiyalardan foydalanib taqsimlangan tizimlarda resurslarini boshqarish tamoyillarini o‘rganish. Nazariy ma’lumotlar

11.1- rasm. Taqsimlangan tizimlarda resurslarni dinamik boshqarish masalasi.

Kuzatishlar ko‘rsatadiki, bugungi kunda resurslarni boshqarishda tarmoqda tugunlarining va foydalanuvchilar talablari sonining dinamik o‘zgarishi hisobga olinmagan. Tizimlarda yuklamalar ortib ketgan holatlarda vazifalarni qayta rejalashtirishning optimallashtirilgan mexanizmlari to‘liq qo‘llanilmaydi.

Shu sababli, taqsimlangan hisoblash tizimlarida resurslarni boshqarish samaradorligini oshirish uchun middleware bilan birga ishlovchi yangi intelluktual boshqaruv usullari va vositalari kiritiladi. Grid yoki Cloud hisoblash tizimlarida intellektuallashtirishning asosiy elementi sifatida ko‘p agentli tizim sifatida tavsiflanuvchi va grid-resurslar asosida quriluvchi semantik axborot xizmati qaralishi mumkin. Bu dinamik o‘zgaruvchan muhitda ko‘p agentli tizimlarda o‘z-o‘zini tashkillashtirish va o‘zaro moslashtirish asosida murakkab taqsimlangan tizimlarda resurslardan foydalanish samaradorligi oshirish imkonini beradi.

Taqsimlangan tizimlarda resurslarni boshqarishning qo‘p agentli modellari. Bugungi kunda taqsimlangan va avtonom tizimlarning o‘zaro bog‘lanishi, ularning so‘rovlarga xizmat ko‘rsatish jarayonini tavsiflash va tushuntirish uchun ko‘plab usullar va texnologik yondoshuvlar qo‘llaniladi. Tizimlarning holatlari va ularning dinamik o‘zgarish mexanizmlari, alohida komponentlarning holatlarga moslashuvchanligi va bog‘lanish xususiyatlarini tadqiq qilish uchun ko‘p agentli tizimlar asosidagi yondoshuvlar qo‘llaniladi. Ko‘p agentli tizimlar taqsimlangan tizimlarda komponentlarning va resurslarning holatlarini agentlar yordamida baholash va boshqarish imkonini beradi.

Agent asosida modellashtirish tushunchasi ko‘plab adabiyotlarda turli ta’riflar bilan ta’riflangan, lekin ta’kidlash joizki, agent asosida asosan modellashtirish deganda markazlashtirilmagan, induvidual tizimlarning ishlash prinsiplarini modellashtirish tushuniladi. Agentlar tabiatdagi barcha o‘z xarakteriga va xususiyatlariga ega bo‘lgan narsalar (masalan, odamlar, kompaniyalar, transportlar, shaxarlar, hayvonlar, mahsulotlar, turli tizimlar, hisoblash tizimlari va boshqalar) bo‘lishi mumkin, ularning xarakterlari va xususiyatlari (asosiy tashkil etuvchilari, holatlari, xotiralari, o‘zaro ta’sirlari) aniq bir muhitda bir birlari bilan aloqa o‘rnatish, o‘zaro ta’sirlashishini tavsiflaydi (10.2-rasm). Ko‘p agentli modellashtirishda tizimning global xarakteristikalari ko‘plab induvidual agentlar holatlarining o‘zaro aloqalari natijasi orqali tavsiflanadi.