Iqtisodiy xavfsizlik

Xufiyona iqtisodiyot va korrupsiya miqyoslarini kamaytirishda davlatning roli

Tarixiy tajribalardan ma’lumki xufiyona iqtisodiyot xo’jalik mexanizmining tarkibiy qismi bo’lib hisoblanadi. Lekin, uning miqyoslarini haddan tashqari kengayib ketishini oldini olish vazifasi aynan davlatning zimmasiga tushadi. Xufiyona faoliyatga davlat tomonidan ta’sir etish masalasi, ayniqsa, jamiyatning bir formatsiyadan boshqasiga o’tish davrlarida, inqirozlar paytida dolzarb bo’lib boradi.

Chunki aynan shunday davrlarda uning miqyoslarini kengayib ketishiga sabab bo’ladigan omillar ta’siri kuchayib boradi. Masalan, bozor iqtisodiyotiga o’tish davrida amalga oshiriladigan iqtisodiy islohotlar natijasida katta korxonalar bozorda o’z o’rnini topa olmay yopilib ketishi yoki mayda korxonalarga bo’linib ketishi mumkin. Bulardan tashqari yangi korxonalar ham vujudga kelishi mumkin.

O’zbekistonda ijtimoiy yo’naltirilgan, ochiq bozor munosabatlariga o’tishning mashhur besh tamoyilining biri bo’lgan davlatning bosh islohotchi ekanligi to’g’risidagi tamoyilga asoslanilganligi respublikada xufiyona iqtisodiyot miqyoslarini haddan tashqari kengayib ketishini oldini olishda muhim omil bo’ldi. “Birinchi navbatda iqtisodiyotning mafkuradan xoli bo’lishi, iqtisodiyotning siyosatdan ustunligida o’z ifodasini topgan pragmatik iqtisodiy siyosat, davlatning bosh islohotchi vazifasini o’z zimmasiga olishi, qonun ustuvorligini ta’minlash, kuchli ijtimoiy siyosat olib borish, islohotlarni bosqichma-bosqich va vazminlik bilan amalga oshirish kabi tamoyillar, ayniqsa, dunyoda avj olib borayotgan moliyaviy va iqtisodiy inqiroz sharoitida o’zining dolzarbligi va hayotiyligini yana bir bor ko’rsatmoqda. Bugungi kunda mamlakatimizni, avvalo, iqtisodiyotimizni isloh etish, erkinlashtirish va modernizatsiya qilish, uning tarkibiy tuzilishini diversifikatsiya qilish borasida amalga oshirilayotgan, har tomonlama asosli va chuqur o’ylangan siyosat bizni inqirozlar va boshqa tahdidlarning salbiy ta’siridan himoya qiladigan kuchli to’siq, aytish mumkinki, mustahkam va ishonchli himoya vositasini yaratdi”.

Lekin, jahon moliyaviy-iqtisodiy inqirozi u yoki bu darajada respublika iqtisodiyotiga ham ta’sir ko’rsatishi mumkin. SHuning uchun ham davlat iqtisodiyotda kechadigan barcha jarayonlarni nazardan qochirmasligi kerak bo’ladi. Xufiyona iqtisodiyot miqyoslarini kengayib ketishini oldini olish chora- tadbirlarini amalga oshirish davlat tomonidan tartibga solish borasidagi bir yo’nalish sifatida e’tiborda bo’lishi kerak.

Xufiyona faoliyatga davlat tomonidan ta’sir etish usullari turlicha bo’lib, adabiyotlarda quyidagi usullar ajratib ko’rsatiladi:

- monetar usul. Bunda xufiyona hisob-kitoblarda faqat naqd pul mablag’laridan foydalanish to’g’risidagi gipotezaga asoslaniladi (naqd pul massasining harakati dinamikasi xufiyona iqtisodiyot hajmlari to’g’risida fikr yuritishga imkon beradi);

- daromad va xarajatlar balansi usuli. Bunda deklaratsiya qilinadigan daromadlar xarajatlar summasi hamda tovar va xizmatlar iste’molining real hajmlari bilan taqqoslanadi;

- ish bilan bandlikning tahlili. hisobga olinmagan ishsizlik darajasining uzoq vaqt saqlanib qolishi xufiyona sektorda band bo’lish imkoniyatlarining mavjudligidan dalolat beradi. (ro’yxatga olinmagan ishsizlarning soni xufiyona iqtisodiyot hajmlaridan dalolat beradi); Bu xufiyona sektor hajmini ekspert baholash imkonini beradi.

Adabiyotlarda xufiyona faoliyatga davlat tomonidan ta’sir etishning bir nechta yo’nalishlari mavjudligi ta’kidlanadi. Bulardan birinchisi mamlakatni ijtimoiyiqtisodiy rivojlantirish davlat strategiyasi bo’lib, u milliy xo’jalik modelining asosiy parametrlarini belgilaydi. Xufiyona iqtisodiyot miqyoslarini kengayib ketishini oldini olish borasidagi strategiyaning muhim elementlari quyidagilardan iborat:

- xufiyona iqtisodiyotni minimumga yetkazish – eng asosiy strategik maqsad;

- halol raqobat asosida milliy iqtisodiyotni asosiy makroiqtisodiy parametrlarini shakllantirish; - monopoliyaga qarshi samarali siyosat olib borish;

- xufiyona iqtisodiyotning yo’l qo’yilishi mumkin bo’lgan miqyoslarini belgilash. Xufiyona faoliyatga davlat tomonidan ta’sir etishning boshqa yo’nalishlari ham mavjud bo’lib, ularga quyidagilar kiradi. Mukammal xo’jalik huquqini shakllantirish halol faoliyat olib borish uchun ma’lum rag’batlarni yaratadi.

Mamlakatda aholi turmush darajasini oshirishga va kam ta’minlanganlarni muhofaza qilishga qaratilgan ijtimoiy siyosat olib borish.

Biznes bilan bo’ladigan munosabatlar. Bunda davlat hokimiyatini xususiy biznes bilan o’zaro munosabatlarida asosiy tamoyillarga rioya qilish ko’zda tutiladi.

Davlatning jazolash funksiyalaridan foydalanish. Bunday funksiya davlatning kriminal iqtisodiyotga qarshi kurashi bilan bog’liq.

Davlatning tarbiyaviy funksiyasini qo’llash. Bu ta’lim tizimi va ommaviy axborot vositalari orqali amalga oshiriladi. Uning muhim elementlariga quyidagilar kiradi: qonunlarga itoat etish madaniyatini shakllantirish, zo’ravonlik, narkobiznes, fohishabozlik, pornografiyani qoralash, jamiyatning ma’naviy-ahloqiy tamoyillari asosida milliy g’oyani shakllantirish. Fuqarolik jamiyati institutlari bilan hamkorlikni amalga oshirish. Bunda oila, diniy tashkilotlar, o’z-o’zini boshqarish organlari, mehnat jamoalari, turli ijtimoiy tashkilotlar, ommaviy axborot vositalari, ijodiy uyushmalar kabi ijtimoiy institutlar bilan hamkorlik aloqalarini mustahkamlash ko’zda tutiladi.

Xulosa.

Ijtimoiy – iqtisodiy munosabatlarning globallashuvi insoniyatning yanada taraqqiy etishi uchun yangi imkoniyatlar ochish bilan birga, bir qator sifat jihatdan yangi bo’lgan global tahdidlarni ham keltirib chiqardi. Bugungi kunga kelib xufiyona iqtisodiyot transmilliy xarakterga ega bo’lib bormoqda.

Jahonning turli mamlakatlari va mintaqalarida xufiyona iqtisodiyotning miqyosi va xususiyatlari ulardagi milliy xo’jalik modellari va bozor munosabatlarining takomillashganlik darajasi bilan bog’liqdir. Mana shundan kelib chiqqan holda xufiyona iqtisodiyotning turlarini ajratadilar: rivojlangan mamlakatlarda, rivojlanayotgan mamlakatlarda hamda o’tish iqtisodiyotidagi mamlakatlarda. Ushbu mamlakatlar guruhlarida xufiyona iqtisodiyotning miqyoslari bir – biridan farq qiladi. Mutaxassislarning baholashlaricha rivojlangan mamlakatlarda xufiyona iqtisodiyot YAIMning 12 – 16 foizini, rivojlanayotgan mamlakatlarda 40 – 50 foizini, o’tish iqtisodiyotidagi mamlakatlarda 23 – 25 foizni tashkil etadi.

Foydalangan adabiyotlar:

Asosiy adabiyotlar

1. Karimov I.A. O’zbekiston XX1 asr bo’sag’asida: xavfsizlikka tahdid, barqarorlik shartlari va taraqqiyot kafolatlari. – T.: O’zbekiston, 1997

2. Ortiqov A., Isaxodjaev A., SHestakov A. Xufiyona iqtisodiyot. Toshkent, 2002.

3. Popov YU.N., Tarasov M.E. Tenevaya ekonomika v sisteme rыnochnogo xozyaystva . «DELO», «EKONOMIKA». M., 2005, s.33

4. Yechmakov S.M. Tenevaya ekonomika. Analiz i modelirovanie. – M.:
Finansi i statistika, 2004