Ilmiy izlanish asoslari

Bitiruv malakaviy ishning mavzusini tanlash. Bitiruv malakaviy ish mavzusini to‘g‘ri tanlash talabaning izlanishlari samaradorligini belgilab boradi, shu sababli kafedra tomonidan mavzularni erkin tanlash imkoniyatlari yaratilishi shart. Mavzuni tanlash kafedra tomonidan ishlab chiqarilgan, institut Ilmiy kengashida tasdiqlangan “Bitiruv malakaviy ish mavzularining ro‘yxati” bo‘yicha amalga oshiriladi. Shuni ham ta’kidlash lozimki, malakaviy bitiruv ishi mavzusini tanlashda talabalar ta’lim jarayonida yozgan kurs ishlari, ilmiy konferensiyalarda qilgan ma’ruzalariga mos keladigan yo‘nalish bo‘yicha mavzuni tanlashi maqsadga muvofiqdir. Chunki, shu nuqtai nazardan tanlangan mavzu bo‘yicha ish bajarish uchun talabada tajriba, bilim va ma’lumotlar darajasi yuqori bo‘ladi. Bu esa o‘z navbatida, malakaviy ishni sifatli va muvaffaqiyatli bajarishga zamin yaratadi.

Bunday imkoniyatlar quyidagilarni bajarish bilan ta’minlanadi:

· Bitiruv malakaviy ishni sifatli va muvaffaqiyatli bajarishda mavzuning talaba tomonidan mustaqil ravishda va to‘g‘ri tanlanishi muhim ahamiyatga ega. O‘quv yilining boshidanoq bitiruvchi kursning talabasi tomonidan to‘liq anglab olingan mavzu doirasida taklifni kafedrada muhokama qilish va tasdiqlash;

· ilmiy rahbar bilan birgalikda mavzuni talaba imkoniyatlarini inobatga olgan holda tanlash;

· talaba amaliyot o‘tgan yoki biriktirilgan tashkilotdagi xo‘jalik faoliyatini boshqarish va tashkil etish bilan bog‘liq muammolaridan kelib chiqqan holda bitiruv ish mavzusini taklif qilish;

· kafedra tomonidan olib borilayotgan ilmiy-tadqiqot ishlari yo‘nalishiga talabani jalb qilish va tegishli mavzuni shunga bog‘lash.

Kafedrada bitiruv malakaviy ishlar taxminiy ro‘yxati bilan barcha talabalar tanishishiga imkoniyat yaratish va undan foydalanishini ta’minlashi zarur. Talaba o‘zining bilim saviyasi va qiziqishini hisobga olib, boshqa mavzuni taklif kilishi mumkin. Talaba o‘ziga ilmiy rahbarni biriktirish va tegishli mavzuni tasdiqlash mazmunida kafedra mudiri nomiga ariza yozadi.

Talabaga bitiruv malakaviy ish mavzusi biriktirilgandan so‘ng kafedra tomonidan (talabani hohishini hisobga olgan holda) ilmiy rahbar belgilanadi. Ilmiy rahbar lozim deb topgan hollarda talabani bitiruv malakaviy ishining alohida bo‘limiga maslahatchi jalb qilishi mumkin. Maslahatchi sifatida institutdagi malakali professorlar, dotsentlar, ilmiy xodimlar va talabalarni ishga qabul qiluvchi korxonalarning yetakchi mutaxassislari tayinlanadi. Talaba tanlagan mavzu va ilmiy rahbarning ismi-sharifi, kafedra tomonidan institut rektori nomiga berilgan taqdimnomasiga asosan institut buyrug‘i bilan rasmiylashtiriladi.