Iii bob. Avtomobillarda yo‘lovchilar tashishni boshqarish тayanch so‘zlar va iboralar

III BOB. AVTOMOBILLARDA YO‘LOVCHILAR TASHISHNI BOSHQARISH


Тayanch so‘zlar va iboralar: nozimlik boshqaruvi, nozimlik xizmati, markaziy nozimlik boshqaruvi, nozimlik tizimi, yo‘l varaqasi, avtobuslar harakati jadvali, kechikish, qatnov vaqtini tezkor oshirish, avtobusni oxirgi bekatda to‘xtatib turish, kechikishni keyingi qatnovda quvib yetish, avtobuslarni oxirgi bekatdan jo‘nash oralig’ini surish, avtobuslarni o‘zgartirilgan interval bo‘yicha jo‘natish, avtobuslarni qisqartirilgan qatnovga jo‘natish, rezervdagi avtobusdan foydalanish, yo‘l varaqasi, hisob-chipta varaqasi, “GPS” tizimi.


3.1. Avtobuslarda tashishning nozimlik boshqaruvi
Avtobuslar harakatini nozimlik boshqaruvi yo‘lovchi tashuvchi avtomobil transportining ishini tashkil etish va boshqarish texnologiyasining so‘nggi bosqichi hisoblanadi.
Nozimlik xizmati ishiga umumiy rahbarlik markaziy nozimlik xizmatining bo‘limi boshlig’i tomonidan amalga oshiriladi. Avtobuslar harakatini bevosita smena katta nozimi boshqaradi. U o‘z smenasida yo‘nalish nozimlari guruhi bilan birgalikda yo‘lovchi tashish holati va sifatiga, harakatni muntazamligiga va avtobuslardan samarali foydalanishga javobgardir.
Nozimlik tizimi avtobuslarni safarga chiqarishga tayyorlash va chiqarishni tashkil qilish, yo‘nalishlarda harakatni boshqarish va o‘z vaqtida saroyga kelishini ta’minlash bilan bog’liq barcha faoliyatlar majmuasini o‘z ichiga oladi. Avtobuslar harakati nozimlik boshqaruvi saroy ichi va yo‘nalish nozimligiga ajratiladi.
Nozimlik hisoboti tahlili ma’lumotlari asosida nozimlik xizmati harakatni tashkil qilish rejasini takomillashtirish bo‘yicha kerakli tavsiyalarni kiritadi. Ushbu tavsiyalar nozimlik yig’ilishlarida muhokama qilinadi.
Nozimlik xizmati ishining sifatini ta’minlash uchun unda ishlayotgan har bir xodimning mansab yo‘riqnomasi ishlab chiqilgan bo‘lishi kerak.
Yo‘lovchi tashuvchi transport ishini ratsional tashkil etish ishlari ikki qismdan iborat bo‘ladi.
1. Birinchisi tashkiliy masalalar, ya’ni yo‘lovchi tashish rejasini ishlab chiqish va asoslash.
2. Ikkinchi boshqaruv masalalari. Bu masalalar o‘z ichiga yo‘nalishlarda transport harakatini nazorat qilish va boshqarish hamda tashish bo‘yicha tasdiqlangan rejani bajarilishini ta’minlashni oladi.
Birinchi masala bilan avtosaroylarninig tasarruf xizmati bo‘limi shug’ullanadi. Boshqaruv masalalari bilan esa nozimlik xizmatchilari shug’ullanadilar.
Nozimlik xizmati quyidagilarni o‘z ichiga oladi:
- avtobuslarni harakat jadvaliga amal qilgan holda saroydan chiqishini ta’minlash va nazorat qilish;
- avtobuslar harakatini yo‘nalish jadvalida belgilangan tartibda kelishini kuzatish va nazorat qilish.
- avtobuslarning harakati yo‘nalish jadvalida belgilangandan farq qilgan holatda uni qayta tiklash.
- yo‘lovchilarga xizmat ko‘rsatish sifatini yaxshilash va avtomobillardan foydalanish samaradorligini oshirish maqsadida avtobuslar harakatini boshqarish.
- harakat muntazamligini ta’minlash va h.k.