Iii. Банк фаолиятини тартибга солиш

ЎЗБЕКИСТОН РЕСПУБЛИКАСИНИНГ
ҚОНУНИ
25.04.1996 й.
N 216-I


БАНКЛАР ВА БАНК ФАОЛИЯТИ ТЎҒРИСИДА

Мазкур Қонунга қуйидагиларга мувофиқ ўзгартиришлар киритилган

ЎзР 27.12.1996 й. 357-I-сон Қонуни,
ЎзР 30.08.1997 й. 485-I-сон Қонуни,
ЎзР 15.04.1999 й. 772-I-сон Қонуни,
ЎзР 20.08.1999 й. 832-I-сон Қонуни,
ЎзР 14.09.2006 й. ЎРҚ-49-сон Қонуни,
ЎзР 10.10.2006 й. ЎРҚ-59-сон Қонуни,
ЎзР 31.12.2008 й. ЎРҚ-197-сон Қонуни,
ЎзР 07.04.2009 й. ЎРҚ-206-сон Қонуни,
ЎзР 22.09.2009 й. ЎРҚ-223-сон Қонуни,
ЎзР 10.04.2012 й. ЎРҚ-321-сон Қонуни,
ЎзР 30.04.2013 й. ЎРҚ-352-сон Қонуни

I. Умумий қоидалар (1 - 6-моддалар)

II. Банклар ташкил этиш ва уларнинг фаолиятини
тугатиш тартиби (7 - 19-моддалар)
III. Банк фаолиятини тартибга солиш. Банкларнинг
ҳуқуқ ва бурчлари (20 - 35-моддалар)
IV. Банкларга васийлик қилиш (36 - 37-моддалар)
V. Банк мижозларининг манфаатларини
ҳимоя қилиш (38 - 40-моддалар)
VI. Банкларда ҳисоб юритиш ва ҳисобот. Банкларни
назорат қилиш (41 - 44-моддалар)
I. УМУМИЙ ҚОИДАЛАР

1-модда. Таърифлар

2-модда. Банк фаолиятининг субъектлари
3-модда. Банклар фаолиятининг ҳуқуқий асоси
4-модда. Банк операциялари
5-модда. Банклар фаолиятини лицензиялаш
6-модда. Фирма номи
1-модда. Таърифлар

Банк - тижорат ташкилоти бўлиб, банк фаолияти деб ҳисобланадиган қуйидаги фаолият турлари мажмуини амалга оширадиган юридик шахсдир:

юридик ва жисмоний шахслардан омонатлар қабул қилиш ҳамда қабул қилинган маблағлардан таваккал қилиб кредит бериш ёки инвестициялаш учун фойдаланиш;
тўловларни амалга ошириш.
Омонат (депозит) - талаб қилиниши биланоқ ёки тўловни амалга оширувчи шахс билан тўловни олувчи шахс ёхуд уларнинг қонуний вакиллари ўртасида келишилган муддатда фоизлар ёки устама ҳақ тўлаган ҳолда ёхуд бундай тўловларсиз ҳаммасини қайтариб бериш шарти билан топшириладиган пул суммаси.
Чет эл банки - чет эл банкининг ўз фаолиятини Ўзбекистон Республикаси ҳудудида амалга оширадиган шуъба банки бўлиб, унинг устав капиталининг ҳаммаси чет эл банки томонидан тўланади.