Huquqiy madaniyat va huquqiy tarbiya asoslari

Birinchidan, huquqiy tarbiya nazariyasi - ijtimoiy fan. Chunki uning o‘rganadigan sohasi muhim ijtimoiy hodisalar - jamiyat va madaniyat, davlat va huquqdir.
Ikkinchidan, huquqiy tarbiya nazariyasi - yuridik fan. Huquqiy tarbiya ijtimoiy hodisa sifatida bevosita davlat va huquq hayoti bilan bog‘langan. Shuning uchun ham u yuridik fandir. Bundan tashqari, huquqiy tarbiya nazariyasi boshqa ijtimoiy fanlardan farqli o‘laroq, bevosita huquqiy mafkura va huquqiy ruhiyat (psixologiya)ga oid masalalarni urganadi.
Uchinchidan, huquqiy tarbiya nazariyasi - nazariy fan, zero u huquqiy ong va huquqiy madaniyatning umumiy qonuniyatlarini ochib beradi.
To‘rtinchidan, huquqiy tarbiya nazariyasi - falsafiy xususiyatga ega fan. Chunki u huquqiy ong va huquqiy madaniyatning qonuniyatlarini yoritish bilan birga, falsafaning jamiyat va madaniyat, davlat va huquq haqidagi umumiy qonunlarini urganishni ta'minlaydi.
Beshinchidan, huquqiy tarbiya nazariyasi - amaliyotga yo‘naltirilgan fan. Chunki u demokratik huquqiy islohotlarni amalga oshirishda nazariy asos bo‘lib xizmat qiladi. U shaxs, jamiyat va davlat huquqiy madaniyatini yuksaltirishda amaliy ahamiyat kasb etadi.
Oltinchidan, huquqiy tarbiya nazariyasi - o‘quv-tarbiyaviy ahamiyatga molik fan. Chunki u kishilarning ijtimoiy hodisalar to‘g‘risidagi tasavvurini, bilimini kengaytiribgina qolmay, balki ularda huquqiy tafakkur va dunyoqarashini tarkib toptirishga, huquqiy madaniyatning mohiyati, rivojlanishi va istiqbolini tushunib olishga yordam beradi.
2. Huquqiy tarbiya nazariyasi fannning metodlari
Har qanday o‘quv fani muayyan metodga, usulga, ya'ni o‘rganilayotgan hodisalarni anglab yetish vositalariga ega bo‘ladi. Bunday metodlar ikki guruhga bo‘linadi:
birinchisi barcha o‘quv fanlariga xos bo‘lgan metodlar bo‘lib, ularning asosida tabiat, jamiyat va tafakkurning eng umumiy qonuniyatlari yotadi; ikkinchisi maxsus metodlar bo‘lib, ularga sistemali, tarixiy, qiyosiy, sotsiologik va boshqa metodlar kiradi.
Huquqiy tarbiya nazariyasi fanining metodlari - huquqiy tarbiyani olib bori va rivojlanishining qonuniyatlari, hozirgi ahvoli va mohiyati haqida bilim olishga yordam beruvchi usul va vositalar birligidan iborat.
XXI asr bo‘sag‘asida jahonda ro‘y berayotgan barcha jarayonlar "inson o‘lchovlari" orqali baholanadi. Huquqiy madaniyat va huquqiy tarbiya asoslari fanining metodologik asoslarini huquqiy tarbiya masalasiga, birinchidan, insoniylik nuqtai nazaridan yondashish, insonga "barcha narsalarning o‘lchovi" sifatida qarash; ikkinchidan, shaxsga davlat mashinasining bir vinti sifatida qarashga asoslangan mustabid tushunchadan voz kechib, unga (shaxsga) ijtimoiy sub'ekt sifatida qarash tashkil etadi.