«veterinariya» ixtisosligi bo’yicha oliy o’quv yurtlari uchun qo’llanma

 
B guruhi gipovitaminozlari
ko’pincha bir kamerali oshqozonli 
hayvonlar orasida qayd etilib, kavshovchi hayvonlar fiziologik jihatdan 
to’la qiymatli rasionlarda boqilganda ularning bu vitaminlarga bo’lgan 
ehtiyojlari vitaminlarning mikrobial sintezi hisobiga qondiriladi. 
Kavshovchilarning sut davrida B guruhi vitaminlari organizmga uviz 
yoki sut orqali tushib turadi. Lekin katta qorinda oziqalar 
hazmlanishining buzilishi, mikrofloralar faoliyatining yomonlashishi, 
oziqalar bilan zamburug’lar toksinlarining tushishi, antibiotiklar, 
sulfanilamidlar va boshqa preparatlarni asossiz tarzda qo’llanilishi 
ularda B guruhi gipovitaminozlariga sabab bo’lishi mumkin. Katta 
qorinning surunkali asidozi va alkalozi, ruminit va boshqa kasalliklar 
paytida ham oshqozon oldi bo’limlarida B guruhi vitaminlarining 
mikrobial sintezi buzilishi mumkin.
B guruhi vitaminlari yetishmovchiligi buzoqlarda ularni barvaqt 
sun’iy sut bilan boqishga o’tkazilishi oqibatida, cho’chqa, itlar, 
quyonlarda hamda parrandalarda mikroorganizmlarning asosan keyingi 
bo’lim ichaklarida yashashi tufayli vitaminlar asosiy qismining 
so’rilmasdan chiqib ketishi oqibatida kuzatiladi. Otlarning B guruhi 
vitaminlariga bo’lgan ehtiyojini asosan yaxshi rivojlangan katta chambar 
va ko’r ichaklardagi mikrobial sintez hisobiga qondiriladi. 
B guruhi gipovitaminozlari ko’p hollarda bir vaqtning o’zida bir 
necha vitaminlarning yetishmovchiligi (poligipovitaminozlar) holida 
kechadi. B guruhi vitaminlari yetishmovchiligi bilan kechadigan 
kasalliklar yosh hayvonlarda nimjon bo’lib tug’ilish, o’sishdan qolish, 
alopesiya va dermatitlar, nerv tizimidagi buzilishlar (polinevritlar, falaj, 
yarim falaj va b.), yurak qon-tomir tizimi, hazm tizimining sekretor, 
peristaltik funksiyalarining buzilishi bilan kechadi. 
 

---

138