«muhandislik kommunikatsiyalari qurilishi» kafedrasi

Kirish

Bakalavriat ta’lim yo‘nalishlari o‘quv rejasida ko‘zda tutilgan asosiy fanlardan kurs ishi va kurs loyihalarini bajarish – o‘quv jarayonining zaruriy elementi hisoblanadi.

Talabalarda ilmiy izlanishlar olib borish ko‘nikmalarini tarbiyalash, berilgan topshiriqni mustaqil ravishda chuqur o‘rganish, nazariy bilimlarni amaliyot bilan bog‘lash, ilmiy, nazariy va amaliy xulosalarni shakllantirish va pirovardida yuqori malakali mutaxassislarni tayyorlashda kurs ishlarini bajarish muhim ahamiyatga ega.

Mazkur ko‘rsatma Oliy ta’limning 5340400 – “Muhandislik kommunikatsiyalari qurilishi” bakalavriat ta’lim yo‘nalishi o‘quv rejasida ko‘zda tutilgan, ushbu yo‘nalishning asosiy fanlari qatoridagi “Gaz ta’minoti tizimlari” fanidan kurs loyihasini bajarish bo‘yicha tavsiyalar va tartib-qoidalarni o‘z ichiga oladi.

Kurs loyihasini bajarishdan asosiy maqsad – talabalarda mustaqil ishlashni joriy etish, ilmiy-izlanish ishlarini mustahkamlashdir. Kurs loyihasi ustida ishlash davomida talaba tegishli fandan olgan nazariy bilimlarini mustaqil ravishda kengaytirish va chuqurlashtirishga erishadi, maxsus adabiyotlardan olingan, past va o‘rta bosim gaz tarmog‘ining gidravlik hisob sxemasi, gaz trassasining rejasi va ko‘ndalang qirqimlari to‘g‘risidagi materiallarini o‘rganish asosida to‘plangan, shuningdek, internet manbaalaridan olingan ma’lumotlarni qayta ishlash, umumlashtirish, tahlil qilish va muayyan bir tizimga keltirish bo‘yicha dastlabki bilim va ko‘nikmalarni hosil qiladi.

Qo‘yilgan maqsadning muvaffaqiyatli bajarilishi uchun kurs ishlarini bajarishga quyidagi talablar qo‘yiladi:

– kurs loyihasida mavzuga taalluqli bo‘lgan O‘zbekiston Respublikasi Prezidentining farmonlari, qarorlari, ma’ruzalaridan ma’lumotlar, tegishli qonun hujjatlari, sohaga oid qabul qilinayotgan qonun va qarorlar, qurilish me’yoriy qoidalari sharhi o‘z aksini topishi lozim;

– kurs loyihasi mazmunini ravon adabiy tilda bayon qilish, hisob ishlari natijalarini rasmiy hujjatlarga qo‘yiladigan asosiy talablarga rioya qilgan holda aks ettirish lozim.

Mustaqil O‘zbekiston Respublikasi miqyosida gaz ta’minoti sohasi uchun mutaxassislar tayyorlash eng dolzarb masalalardan biridir, zero respublikamiz gaz mustaqilligi masalasini eng muhim vazifa qatoriga qo‘ygan bo‘lib, uni muvaffaqiyatli amalga oshirmoqda. Respublikamiz hududida mavjud bo‘lgan gaz konlarini qidirib topish, ularni o‘rganish va qazib chiqarib, xalq xo‘jaligi uchun taqdim qilish eng muhim vazafalardandir. Bu murakkab vazifani ilmiy asosda bajarish va uning uddasidan chiqish albatta malakali mutaxassislarga bog‘liq.

Uslubiy ko‘rsatma kafedra va fakultet uslubiy seminarlari yig‘ilishlarida ko‘rib chiqilib va institut uslubiy kengashida ma’qullangan.

Bundan tashqari uslubiy ko‘rsatmada kurs loyihasini bajarish bo‘yicha kerakli ko‘rsatmalar keltirilgan. Jumladan: kirish qismida yoritiladigan masalalar, sanoat korxonalarini hamda aholini gaz bilan ta’minlash, yillik va soatlik gaz sarfi, tarmoqning gidravlik hisoblash bo‘yicha uslubiy tavsiyalar berilgan.

Uslubiy ko‘rsatmani asosiy maqsadi talabalarni «Gaz ta’minoti tizimlari» fanidan olgan nazariy bilimlarini mustahkamlash va ushbu fan bo‘yicha amaliy ko‘nikmalarni hosil qilishdan iborat.