Konsullik xizmatlari

61-modda.

Notarial harakatlarni bajarayotgan konsul ushbu notarial harakatlar sirini saqlashi shart.

Bajarilgan notarial harakatlar to‘g‘risidagi ma’lumotnomalar va hujjatlar O‘zbekiston Respublikasining notariat to‘g‘risidagi amaldagi qonun hujjatlariga muvofiq beriladi.

 LexUZ sharhi

Qarang: O‘zbekiston Respublikasi “Notariat to‘g‘risida”gi Qonunning 36-moddasi.

62-modda.

Notarial harakatlar buning uchun zarur bo‘lgan barcha hujjatlar taqdim etilgan, konsullik yig‘imlari to‘langan va amaldagi xarajatlar qoplangan kuni bajariladi.

Notarial harakatlarni bajarish qo‘shimcha ma’lumotlar yoki hujjatlar talab qilinganda yoxud hujjatlarni ekspertizaga jo‘natish zarurati bo‘lganda, shuningdek O‘zbekiston Respublikasining qonun hujjatlarida nazarda tutilgan boshqa asoslarga ko‘ra kechiktirilishi mumkin.

 LexUZ sharhi

Qarang: O‘zbekiston Respublikasi “Notariat to‘g‘risida”gi Qonunning 31-moddasi.

63-modda.

Notarial tartibda tasdiqlanadigan bitimlar, shuningdek ariza va boshqa hujjatlar notarial harakatlarni bajarayotgan konsul huzurida imzolanadi. Agar bitim, ariza yoki boshqa hujjat konsul yo‘qligida imzolangan bo‘lsa, imzo chekkan shaxs hujjatni o‘zi imzolaganligini shaxsan tasdiqlashi lozim.

64-modda.

Konsul notarial harakatlarni bajarayotgan vaqtda O‘zbekiston Respublikasining fuqarolariga ularning huquq va majburiyatlarini tushuntirishi, bajarilayotgan notarial harakatlarning oqibatlari to‘g‘risida ogohlantirishi shart.

65-modda.

Konsul o‘z nomiga va o‘z nomidan, xotini (eri) nomiga va uning nomidan, xotinining (erining) va o‘zining yaqin qarindoshlari nomiga va ularning nomidan notarial harakatlarni bajarishi mumkin emas.

66-modda.

Konsullik muassasasida notarial ish yuritishlar O‘zbekiston Respublikasining davlat tilida amalga oshiriladi.

 LexUZ sharhi

O‘zbekiston Respublikasining “Davlat tili haqida”gi Qonuniga muvofiq O‘zbekiston Respublikasida davlat tili bo‘lib o‘zbek tili hisoblanadi.

Agar notarial harakatni bajarish iltimosi bilan murojaat qilgan shaxs ish yuritilayotgan tilni bilmasa, notarial harakatni bajarayotgan konsul yoki konsul taniydigan tarjimon rasmiylashtirilayotgan hujjatlarning matnlarini unga tarjima qilib berishi lozim.

67-modda.

Agar O‘zbekiston Respublikasida istiqomat qilayotgan O‘zbekiston Respublikasi fuqarolari foydasiga meros ochilganligi konsulga ma’lum bo‘lib qolsa, konsul meros va ehtimol tutilgan merosxo‘rlar to‘g‘risida o‘zi bilgan barcha ma’lumotlarni O‘zbekiston Respublikasi Tashqi ishlar vazirligiga darhol xabar qilishi shart.

68-modda.

Agar notarial harakatni bajarish O‘zbekiston Respublikasining qonun hujjatlariga zid bo‘lsa, konsul bunday harakatlarni bajarishni rad etadi.

Agar hujjatlar O‘zbekiston Respublikasining qonun hujjatlari talablariga mos kelmasa yoki o‘z mazmuniga ko‘ra O‘zbekiston Respublikasining davlat manfaatlariga zarar yetkazishi mumkin bo‘lsa yoxud fuqarolarning sha’ni va qadr-qimmatiga putur yetkazuvchi ma’lumotlarga ega bo‘lsa, konsul bunday hujjatlarni notarial harakatlarni bajarish uchun qabul qilmaydi.

Notarial harakatni bajarish to‘g‘risidagi murojaati rad etilgan shaxsning iltimosiga binoan unga rad etishning sabablari bayon qilinishi va rad etish ustidan shikoyat qilish tartibi tushuntirib berilishi lozim.