G.Dimitrov 1945-yil noyabrda Bolgariyaga qaytib keldi va Xalq majlisi raisligiga saylandi. " 1946-yilda u Bolgariya Vazirlar Kengashi raisi lavozimini egalladi. 1945-yil 18-noyabrdagi saylovlardan so’ng Xalq majlisi harbiy jinoyatchilar mulkini natsionalizatsiya qildi. Natijada 2300 ta sanoat korxonalari davlat ixtiyoriga o’tdi. 1946-yil mart oyida agrar islohot o’tkazilib, unga ko’ra haydaladigan shaxsiy yer mulkini 20 gektardan oshirish cheklandi. Barcha ortiqcha yer davlat tomonidan oz miqdordagi to’lov hisobiga olib qo’yildi. 1947-yilning oxirida 126 ming nafar dehqon yerga ega bo’ldi. Ular yangi hokimiyatning qishloqdagi ishonchli suyanchig’i bo’lib qoldi. 1946-yil 15-sentyabrda Bolgariya Xalq Respublikasi deb e’lon qilindi. Yangi hukumatni G .Dimitrov boshqardi. Hukumatning pul islohoti va bir yo’la olinadigan soliq to’g’risidagi Qonuni tufayli yirik mulkdorlarning pul jamg’armalari olib qo’yildi va davlat ixtiyoriga o’tkazildi. 1947 - yilning avgustida Bolgariya dehqonchilik xalq ittifoqi (BDXI) faoliyati taqiqlandi va bu BKP diktaturasiga yo’l ochib berdi. 1949-yil boshida boshqa partiyalar ham o’z faoliyatini to’xtatdi. 1947-yil dekabrda qabul qilingan qonunlar nafaqat yirik, shuningdek, o’rtahol kapital va ko’chmas mulk egalarini tugatdi.
Dimitrov Georgiy(1882-1949) - Bolgariya daviat arbobi. Nemis hokimiyati tomonidan reyxstagga o’t qo’yishda ayblangan, ammo sudda o’z aybsizllglni isbotlagach dunyoga tanildi. Ikkinchi jahon urushi yillarida Mamlakat frontiga rahbarlik qildi. 1946-1949-yillarda Bolgariya Vazirlar Kengashi Raisi. 1949-yilda G.Dimitrov vafotidan so’ng Vasil Kolarov, u ham vafot etgach, 1950-yildan V. Chervenkov rahbarlik qildi. Sotsializm qurilishi stalincha yo’ldan olib borildi: besh yillik rejalar ishlab chiqildi, industrlashtirish boshlandi, qishloqda esa ommaviy kollektivlashtirish siyosati yuritildi. 40-yillar oxiri-50-yillar boshida 700 dan ortiq sanoat korxonalari qurildi Kimyo, mashinasozlik, elektrotexnika, qora va rangli metallurgiya kabi yangi sanoat tarmoqlari paydo bo’ldi. Sanoat mahsulotlari hajmi 1955-yilda 1948-yilga qaraganda ikki baravar, 1939-yildagidan esa 4 baravar ko’paydi.
Kolarov Vasil (1877-1950) – Buyuk Xalq majlisi raisi (1946-1950). 1949-50 yillarda Bolgariya Xalq Respublikasi Vazirlar kengashi raisi. 1956-yilda Vazirlar Kengashi raisligini Anton Yugov egalladi. Biroq, hokimiyat amalda Todor Jivkov qo’lida edi. 1962-yilda u Yugov o’rnini egalladi va hukumat rahbari bo’lib qoldi. 1971-yil iyuldan esa Bolgariya prezidentligiga saylandi. Davlat sotsializmining totalitar rejimi Jivkoy urug’aymoqlari hukmronligi bilan yanada "kuchaydi". T. Jivkov o’z qo’liga ulkan hokimiyatni oldi. U ham BKP Bosh kotibi, ham Davlat Kengashi raisi va mamlakat prezidenti edi. T.Jivkov urug’-aymoqchilik davlat sotsializmining majruh simbiozini yaratdi. Chunki bunda davlat ishlari T.Jivkov oilasi va qarindoshurug’lari manfaatiga xizmat qilar edi. Mamlakat yo’lboshchisining rahbarlik usullarini tanqid qilishga bo’lgan har qanday urinish qattiq jazolandi. Ayni paytda industrlashtirish sur’ati kuchaydi, qishloq xo’jalik ishlab chiqarishida o’sish boshlandi, texnik progress tezlashib, iqtisodning barcha tarmoqlarida modernizatsiyalash olib borildi. 1970-yilning oxirida Bolgariya sanoatini boshqarish tizimi qayta tashkil etildi. Korxonalar huquqi va mustaqilligi kengaydi, korxonalarda xo’jalik qo’mitalari tashkil etilib, ular Yugoslaviyadagi kabi ishlab chiqarish boshqaruvida ishchilar ishtirokining organi bo’lib qoldi. 1970-1975-yillar davomida Bolgariyada sanoat mahsulotlari hajmi 55 foizga, milliy daromad 46 foizga o’sdi. Bolgariya jahondagi sanoati rivojlangan mamlakatlar qatoridan o’rin oldi. Bu yerda - Kozloduda mamlakatdagi energetik muammoni hal etuvchi birinchi atom elektrostansiyasi qurildi. Ammo, tez orada endi bunday sur’atda o’sishga Bolgariyaning qurbi yetmasligi ma’lum bo’ldi. 1976-1980-yillar mobaynida sanoat mahsulotlari hajmi va milliy daromad atigi 33 foizga o’sdi. Inflyatsiya, ishsizlik kuchaydi, oylik deyarli to’liq "muzlatilgani" holda narx-navo keskin ko’tarilib ketdi. Ko’pgina qurilish obyektlari to’xtab qoldi, korxonalar yopildi. T.Jivkov siyosati Bolgariya iqtisodini inqiroz yoqasiga olib keldi va mehnatkashlar turmush tarzi keskin pasayib ketdi. Mamlakatda muxolifat paydo bo’ldi. Islomga hujum boshlandi, musulmon urf-odatlari taqiqlab qo’yildi. Partiya safida korrupsiya kuchaygan edi. T. Jivkov shaxsi mashhur partiya obro’sini tushirib yubordi. Bolgariya iqtisodiy o’sish sur’ati bo’yicha sotsialistik mamlakatlar ichida birinchi, biroq rivojlangan Yevropa mamlakatlariga nisbatan oxirgi o’rinda edi.
1980-yil 1-yanvardan Bolgariya sanoatida sanoat korxonalari boshqaruvini markazlashtirmaslik va liberallashtirishga yo’naltirilgan yangi iqtisodiy tizim joriy etildi. Yangi tizim bo’yicha rejalashtirish organlarining roli qisqartirildi va sanoat korxonalarining ish darajasi ko’rsatkichlari daromadlar bo’lib qoldi. Joriy etilgan yangi qoidaga ko’ra mahsulot sifati va ilmiy-texnik yangiliklar rag’batlantirilar edi. Ish haqi miqdori korxona oladigan foydaga bog’liq bo’lib qoldi. Biroq, davlat korxona ishlariga haddan ziyod aralashar edi. 1986-yilda Bolgariyaning 2000-yilgacha bo’lgan ijtimoiy-iqtisodiy va madaniy rivojlanish rejasi ishlab chiqildi. Uning mohiyati ilg’or fan va texnika yutuqlarini va zamonaviy ishlab chiqarish infrastrukturasini tatbiq etgan holda sifatli yangi moddiy-texnik bazani yaratish edi. 2000-yilgacha milliy daromadni deyarli ikki baravar ko’paytirish mo’ljallandi. Bolgariya iqtisodining o’sha paytdagi ahvolini hisobga olgan holda aytish joizki, bu rejani amalga oshirish mumkin emas edi. Bundan maqsad bolgar xalqining ko’nglini ko’tarish va sovet tipidagi sotsializm g’oyasining kuchiga ishonchni tiklashga urinish bo’lgan. Bolgariya xalqi endi targ’ibot va’dalariga ishonmas va avvalo mamlakatni demokratlashtirishni talab qilar edi. T. Jivkov yetilib kelayotgan "to’lqin"ning oldini olish maqsadida 1987-yilning yozida "sotsializmning yangi modeli"ni yaratishni e’lon qildi, partiya apparatlarining barcha hokimligini tugatish va demokratik islohotlar o’tkazilishiga va’da berdi. Biroq bu totalitar tuzumning yemirilishiga olib kelmadi. Barcha hokimiyat avvalgidek Jivkov va uning qarindoshlari, oshna-og’aynilari qo’lida qolaverdi. 1989-yil yozda sharoit keskin og’irlashdi. T.Jivkov tomonidan e’lon qilingan "qayta qurish" kutilgan natijani bermadi. Tovar tanqisligi va inflyatsiya mavjud og’ir ahvolni yanada kuchaytirib yubordi. Mamlakatdan erkin chiqib ketish to’g’risidagi qonun musulmon va turkiy zabon aholining ommaviy ravishda Turkiyaga qochib o’tishiga sabab bo’ldi. Ular Bolgariya aholisining 15 foizini tashkil etib, asosan qishloq xo’jaligi bilan shug’ullanar edi. Shunday qilib, sotsializm yemirilishi ma’lum bo’ldi. Partiyada parchalanish yuz berdi va 1989-yil 10-noyabrda T. Jivkovning iste’foga chiqqanligi, bir oydan so’ng esa bir partiyali siyosiy tizim tugatilganligi e’lon qilindi.
