Buyuruvchining farmoni va taqiqiga e’tirozsiz bo’ysunish hamda uni buyurilganidek bajarish

Hanafiy mazhabi ta’limoti, ilmiy merosi, mazhab izdoshlari

Abu Hanifaning huquqiy nazariyasi shaxs erkinligini hurmatlagan va shu bilan o’zga huquqshunoslardan farq qiladi. U birinchi bo’lib bitimlarga oid qoidalarni ishlab chiqqan. Ular salam va murobaha bitimlarida o’z aksini topgan. Salam bitimi keyinchalik yetkazib beriladigan mol-mahsulotga darhol pul to’lashni ruxsat etgan. Murobaha bitimi esa bir savdogar ikkinchisiga biron narsani sotishda oldingi, o’zi olgan narx ustiga shartlangan foyda bilan sotishni ruxsat etgan va shu tariqa sudxo’rlikning oldi olingan. Shaxsiy huquq doirasida Abu Hanifa erkin qizcha vositachilarsiz turmushga chiqishni ruxsat berdi, biroq keyinchalik hanafiylik mazhabi bu huquqni faqat ilgari erga tekkan ayolga kafolatladi. Abu Hanifa fikricha, balog’at yoshiga yetgan inson mustaqil bo’lib, o’z mulkini o’zi xohlagan tarzda tasaruf etishi mumkindir. Uning shogirdlaridan biri Assobihon deb nomlangan Abu Yusuf va Muhammad ibn Hasan ash-Shayboniylar mazhabi ta’sirini o’z asarlari va Abbosiylar davlatidagi yuksak maqomlari tufayli keng masofalarga yoyishga erishdilar. Abu Yusuf (731-798) Bog’dodda qozi etib tayinlangan, keyinchalik birinchi Qoziy al-quzot (bosh qozi) sifatida xalifalik hududlarida qozilar tayinlash huquqiga ega bo’lgan. Uning “Kitob al-Xaroj” asari xalifa Xorun ar-Rashid uchun soliqlar to’plash va davlatning moliyaviy masalalari bo’yicha qarorlar to’plami vazifasini o’tagan. Muhammad ibn al-Hasan ash-Shayboniy (749-804) hanafiy mazhabining huquqiy nazariyasini yozib qoldirgan allomadir. U hanafiy fiqhi hamda Madinada Molik ibn Anas qo’lida ta’lim olgan. Muhammad ash-Shayboniy qisqa muddat qozi bo’lgan, so’ngra xalifa Xorun ar-Rashid bilan Xurosonga borib, o’sha yerda vafot etgan. U yozgan oltita kitob (“Al-Mabsut”, “Al-jomi al-kabir”, “Al-jomi as-sag’ir”, “As-siyar al-kabir”, As-siyar as-sag’ir” va “Az-ziyodot”) X asrda Abu Fard al-Marvarziy (Al-Hokim ash-Shahid nomi bilan ma’lum alloma) tomonidan “Al-Kofiy” unvoni bilan bir jildga to’planadi.