Allayarov A. I. O’rmonov H. B. O‘zbekistondagi ziyoratgoh obidalar

Jizzax Davlat pedagogika instituti “tarix o’qitish metodikasi” kafedrasi katta o’qituvchisi Aqchayev Farrux Shavkatovichning “Jizzax vohasi muqaddas qadamjolari va ziyoratgohlari” (etnosotsiologik tadqiqot) deb nomlangan dissertatsiya materiallaridan foydalanildi.

Sayfin ota ziyoratgohi. G‘allaorol tumani Sayfin ota qishlog‘idagi eski qabriston hududida joylashgan ziyoratgoh. Mahalliy aholining bergan axborotiga ko‘ra qadimda ushbu qishloq hududida shahar ko‘rinishidagi katta qo‘rg‘on bo‘lgan. Ziyoratgohning chap tomonida hozir ham arxeologik tepalik, qo‘rg‘on qoldiqlari, bir qancha sopol buyumlar qoldiqlari saqlanib qolgan. Ziyoratgoh obodonlashtirishga muxtoj bo‘lib, ilmiy izlanishlar olib borishni taqozo qiladi. Qabriston hududidagi beshta katta marmarga naqshinkor bezaklar va arabiy yozuvlar bilan bezatilgan, bir nechta kichik qabr toshlar mavjud. Beshbuloq soyining o‘ng tomonida joylashgan qabr toshlardagi yozuvlar mutaxassislar tomonidan o‘qilganda ularda Sayfin yoki Sayfiddin, degan ismga duch kelinmadi. Bu shundan dalolat beradiki Sayfiddin biror bir kishining ismi emas balki laqabi yoki unvonidir. Sayfiddin so‘zi arabchadan tarjima qilinganda “Dinning qilichi” degan ma’noni anglatadi.