1. Tabiiy resurslar / Er

O‘ZBEKISTON RESPUBLIKASI DAVLAT
AKTIVLARINI BOShQARISh AGENTLIGINING
____________________________ HUDUDIY BOShQARMASI

(hudud nomi)

ER UChASTKASIGA MULK HUQUQINI BERUVChI DAVLAT ORDERI № ______

Mulkdorning nomi___________________________________________________________________________

(nodavlat yuridik shaxsning nomi yoki jismoniy shaxsning F.I.O.)

Mulkdorning manzili (yashash joyi)______________________________________________________________ pasport seriyasi ________ raqami __________ kim tomonidan va qachon berilgan ________________________

(jismoniy shaxslar uchun)

________________________________________________________________________________ STIR ____________________________, JShShIR__________________________________________________

(jismoniy shaxslar uchun)

_________________________________________________________________________________manzilidagi o‘ziga _____________________________________________________________ huquqi asosida tegishli bo‘lgan

(doimiy foydalanish (egalik qilish), ijara yoxud meros qilib qoldiriladigan umrbod egalik qilish)

_________________________________________________________________________________qiymatidagi

(summa raqam va so‘z bilan yoziladi)

umumiy _____________kv m yer maydoniga mulk huquqi berildi. Ushbu order_________________________________________________________________________________

(orderni bergan davlat organining nomi)

____________________________________________________________________________ga asosan berildi.

(orderni berishning asosi)

Order ro‘yxatdan o‘tkazilgan sana ___________________________________

Hududiy boshqarma boshlig‘i

QR-kodi

F.I.O.

Vazirlar Mahkamasining 2022-yil 14-fevraldagi 71-son qaroriga
2-ILOVA
Tadbirkorlik va shaharsozlik faoliyatini amalga oshirish uchun yer uchastkalarini mulk huquqi va ijara huquqi asosida elektron onlayn-auksion orqali berish tartibi to‘g‘risida
NIZOM
1-bob. Umumiy qoidalar
1. Ushbu Nizom tadbirkorlik va shaharsozlik faoliyatini amalga oshirish uchun qishloq xo‘jaligiga mo‘ljallanmagan bo‘sh turgan yer uchastkalarini mulk va ijara huquqi asosida elektron onlayn-auksion orqali realizatsiya qilish tartibini belgilaydi.
2. Ushbu Nizom talablari yer uchastkalarini mulk huquqi va ijara huquqi asosida ajratishga nisbatan:
yakka tartibda uy-joy qurish va uy-joyni obodonlashtirish uchun;
ko‘chmas mulk obyektlari joylashgan yer uchastkalari uchun;
qishloq xo‘jaligiga mo‘ljallangan yer uchastkalari uchun;
“K — savdo” avtomatlashtirilgan axborot tizimi orqali ijaraga berish nazarda tutilgan hollarda;
chet el investitsiyalari ishtirokidagi korxonalarga, xalqaro birlashmalar va tashkilotlarga, chet el jismoniy va yuridik shaxslariga berish uchun;
davlat-xususiy sheriklik va ijtimoiy sheriklik loyihalarini amalga oshirish uchun;
maxsus iqtisodiy zonalar hududidagi yer uchastkalari uchun;
kichik sanoat, yoshlar sanoat va tadbirkorlik zonalari hududidagi yer uchastkalari uchun — qonunchilikda ushbu zonalar ishtirokchilariga yerlarni realizatsiya qilishning alohida tartibi belgilangan hollarda tatbiq etilmaydi.
3. Ushbu Nizomda quyidagi asosiy tushunchalardan foydalaniladi:
“E-auksion” elektron savdo platformasi (keyingi o‘rinlarda — savdo platformasi) — elektron onlayn-auksion tashkil etish va o‘tkazish uchun zarur axborotni kiritish, saqlash va qayta ishlash, shuningdek, istagi bo‘lgan jismoniy va yuridik shaxslarning bunday auksion jarayoniga kirish va ularda qatnashish imkonini ta’minlaydigan axborot tizimi;
“Yerelektron” avtomatlashtirilgan axborot tizimi (keyingi o‘rinlarda — “Yerelektron” AAT) — yer uchastkalari berish bo‘yicha materiallarni to‘plash, ko‘rib chiqish va vakolatli organlar va tashkilotlar bilan kelishish tartibotlarini amalga oshirishga mo‘ljallangan avtomatlashtirilgan axborot tizimi;
bo‘sh turgan yer uchastkasi (keyingi o‘rinlarda — yer uchastkasi) — binolar va inshootlar joylashmagan, hech qanday majburiyatlar yoki taqiqlar o‘rnatilmagan hamda jismoniy va yuridik shaxslarga qonunchilikka muvofiq ajratib berilmagan, davlat mulki bo‘lgan, qishloq xo‘jaligiga mo‘ljallanmagan yer uchastkasi;
vakolatli tashkilotlar — xulosa beradigan organlar — Qoraqalpog‘iston Respublikasi Ekologiya va atrof muhitni muhofaza qilish qo‘mitasi, viloyatlar va Toshkent shahar ekologiya va atrof muhitni muhofaza qilish boshqarmalari, materiallarini kelishadigan tashkilotlar — tegishli hududlar va inshootlardan rejim asosida foydalanadigan hamda ularni ekspluatatsiya qiladigan tashkilotlar, yong‘in xavfsizligi bo‘yicha — yong‘in xavfsizligi bo‘limlari, Toshkent shahrida — yong‘in xavfsizligi boshqarmasi, davlat yo‘l harakati xavfsizligi xizmati hududiy organlari, Turizm va sport vazirligi huzuridagi Madaniy meros agentligi Qoraqalpog‘iston Respublikasi, viloyatlar va Toshkent shahar madaniy meros boshqarmalari, Transport vazirligi huzuridagi Avtomobil yo‘llari qo‘mitasining Qoraqalpog‘iston Respublikasi va viloyatlar avtomobil yo‘llari bosh boshqarmalari;
yer uchastkasining boshlang‘ich narxi — yer uchastkasiga mulk va ijara huquqining auksionga qo‘yish uchun belgilangan narxi;
ijarachi — yer uchastkasining ijara shartnomasini ushbu Nizomda belgilangan shartlar asosida va tartibda tuzgan nodavlat yuridik yoki jismoniy shaxs;
ishtirokchi — savdo platformasida ushbu Nizomda belgilangan tartibda ro‘yxatdan o‘tib, auksionda qatnashish uchun ariza bergan jismoniy yoki yuridik shaxs;
loyiha-qidiruv tashkiloti — “O‘zGAShKLITI” MChJ yoki tegishli ravishda Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan qonunda belgilangan tartibda jalb qilinadigan boshqa loyiha-qidiruv tashkiloti;
operator — savdo platformasida auksion tashkil etish xamda o‘tkazish vakolati berilgan “Elektron onlayn-auksionlarni tashkil etish markazi” davlat unitar korxonasi;
xabarnoma — savdo platformasida muayyan bo‘sh turgan yer uchastkasini mulk huquqi yoki ijara huquqi asosida realizatsiya qilish bo‘yicha auksion o‘tkazilishi haqidagi axborot;
shaxsiy kabinet — ishtirokchiga auksion buyurtma berish, ularda qatnashish, shaxsiy hisobni boshqarish, uning holati va boshqa statistik ma’lumotlarni ko‘rish hamda operator tomonidan jo‘natilayotgan xabarlar bilan tanishib borish imkonini beruvchi savdo platformasining maxsus bo‘limi;
elektron onlayn-auksion (keyingi o‘rinlarda — auksion) — savdo platformasi orqali jismoniy va yuridik shaxslarga auksion obyektini realizatsiya qilish (ijaraga berish) bo‘yicha narxni oshirib borish tamoyilida onlayn o‘tkaziladigan savdo shakli.
4. Hududlar va aholi punktlari, ularni rivojlantirishni shaharsozlik jihatidan rejalashtirish to‘g‘risidagi hamda ularni qurish haqidagi tasdiqlangan hujjatlar mavjud bo‘lganda yer uchastkalari auksionga mulk huquqi bilan chiqariladi.
Hududlar va aholi punktlari, ularni rivojlantirishni shaharsozlik jihatidan rejalashtirish to‘g‘risidagi hamda ularni qurish haqidagi tasdiqlangan hujjatlar mavjud bo‘lmagan taqdirda, yer uchastkalari auksionga faqat ijara huquqi bilan chiqariladi.
5. Yer uchastkalari tadbirkorlik va shaharsozlik faoliyatini amalga oshirish uchun mulk yoki ijara huquqi asosida auksion orqali ushbu Nizomga 1-ilovaga muvofiq sxema bo‘yicha realizatsiya qilinadi.
6. Yer uchastkasini tanlash materiallari Davlat soliq qo‘mitasi huzuridagi Kadastr agentligi Davlat kadastrlari palatasining tuman (shahar) filiallari (keyingi o‘rinlarda — filial) (yer uchastkasining bo‘sh yoki bo‘sh emasligi bo‘yicha ma’lumot hamda kadastr yig‘majildini tayyorlash), loyiha-qidiruv tashkiloti (yer uchastkasi va unga tutash hududning yer osti kommunikatsiyalari aks ettirilgan topografik xaritasini tayyorlash bo‘yicha), tuman (shahar) qurilish bo‘limlari (yer uchastkasi to‘g‘risida tegishli xulosani tayyorlash), tuman (shahar) hokimliklari (yer uchastkasiga bo‘lgan huquq turini aniqlash) tomonidan tayyorlanadi.
Yer uchastkasini tanlash materiallarini kelishish va (yoki) ular bo‘yicha xulosalar berish ushbu Nizomda nazarda tutilgan tartibda vakolatli tashkilotlar tomonidan amalga oshiriladi.
Vakolatli tashkilotlarning rahbarlari yer uchastkasini tanlash materiallari bo‘yicha o‘z vaqtida kelishilishi va xulosalar chiqarilishi, shuningdek, ularni o‘z vaqtida ko‘rib chiqmaslik oqibatlari uchun shaxsiy javobgarlikni o‘z zimmalariga oladi.
7. Sog‘liqni saqlash vazirligi hamda Davlat geologiya va mineral resurslar qo‘mitasi Davlat soliq qo‘mitasi huzuridagi Kadastr agentligi Davlat kadastrlari palatasiga (keyingi o‘rinlarda — Davlat kadastrlari palatasi) tadbirkorlik faoliyati uchun berilishi mumkin bo‘lmagan hududlar koordinatalarini ko‘rsatgan holda elektron xaritalarni Davlat kadastrlari yagona tizimiga taqdim etadi.
Taqdim etilgan elektron xaritalarda tadbirkorlik faoliyati uchun berilishi mumkin bo‘lmagan hududlar koordinatalari mavjud bo‘lmagan taqdirda, yer uchastkasini tanlash materiallari kelishilgan, ular bo‘yicha xulosalar esa ijobiy deb hisoblanadi.
Transport vazirligi huzuridagi Avtomobil yo‘llari qo‘mitasi Davlat kadastrlar palatasiga umumiy foydalanishdagi avtomobil yo‘llari hamda avtomobil yo‘llari hamda avtomobil yo‘llarining yo‘l bo‘yi mintaqasi hududining WGS-84 koordinatalar tizimida elektron xaritalarini Davlat kadastrlari yagona tizimiga taqdim etadi.
Elektron xaritalarni taqdim etish, shuningdek, vakolatli tashkilotlar tomonidan yer uchastkasini tanlash materiallarini kelishish va (yoki) ular bo‘yicha xulosalar berish, shu jumladan, Ekologiya va atrof muhitni muhofaza qilish davlat qo‘mitasi organlari tomonidan ekologik ekspertizadan o‘tkaziladigan obyektlarni qurishga yer uchastkasini tanlash materiallari bo‘yicha xulosa berish uchun to‘lov undirilmaydi.
8. O‘zbekiston Respublikasi Davlat aktivlarini boshqarish agentligi yer uchastkasini auksionga chiqarishda buyurtmachi hisoblanadi.
9. Auksion natijalari bo‘yicha pul mablag‘lari operatorning maxsus hisobvarag‘ida yig‘iladi va auksion g‘olibi tomonidan yer uchastkasi qabul qilinganligi tasdiqlangandan so‘ng buyurtmachi hisobvarag‘iga belgilangan tartibda operator xizmat haqi chegirilgan holda o‘tkazib beriladi.
2-bob. Auksionlarga chiqarish uchun yer uchastkasini tanlash materiallarini tayyorlash
1-§. Yer uchastkasini tanlash materiallarini kelishish va yer uchastkasini “Yerelektron” AATga joylashtirish tartibi
10. Tuman (shahar) qurilish bo‘limi hududlar va aholi punktlari, ularni rivojlantirishni shaharsozlik jihatidan rejalashtirish to‘g‘risidagi hamda ularni qurish haqidagi tasdiqlangan hujjatlar, shuningdek, jismoniy va yuridik shaxslarning “Yerelektron” AATning ochiq elektron portali orqali yuborilgan takliflarini ko‘rib chiqish natijalari asosida “Yerelektron” AAT orqali tuman (shahar) hokimligiga tadbirkorlik va shaharsozlik faoliyati uchun berish mumkin bo‘lgan yer uchastkalari bo‘yicha takliflarni kiritib boradi.
Hududlar va aholi punktlari, ularni rivojlantirishni shaharsozlik jihatidan rejalashtirish to‘g‘risidagi hamda ularni qurish haqidagi tasdiqlangan hujjatlar mavjud bo‘lmagan holatlarda yer uchastkalari bo‘yicha taklif tuman (shahar) qurilish bo‘limi tomonidan tegishli hududiy arxitektura va shaharsozlik kengashlari hamda tegishli ravishda “O‘zshaharsozlikLITI” DUK, “ToshkentboshplanLITI” DUK va “Qishloqqurilishloyiha” MChJ bilan kelishgan holda ishlab chiqiladi.
Taklifda quyidagilar aks ettiriladi:
yer uchastkasining WGS-84 (World Geodetic System 1984) ochiq koordinatalar tizimida shartli chegaralari;
yer uchastkasining joylashuv sxemasi;
hududning ijtimoiy infratuzilma obyektlari bilan ta’minlash normalariga muvofiqligi qismi bo‘yicha shaharsozlik qoidalari talablariga rioya qilgan holda yer uchastkasidan foydalanishning ruxsat berilgan turi;
mazkur yer uchastkasida qurilishga ruxsat berilgan yoki taqiqlangan obyektlar turlari ro‘yxati.
11. Tuman (shahar) hokimligi tuman (shahar) qurilish bo‘limining takliflariga asosan kadastr yig‘majildini rasmiylashtirish uchun buyurtmani shakllantiradi va uni elektron hujjat almashinuvi yo‘li bilan filialga yuboradi.
12. Filial tuman (shahar) hokimligidan buyurtma olgandan keyin o‘n ish kunida:
ko‘chmas mulk obyektlariga bo‘lgan huquqlarning davlat reyestri ma’lumotlari asosida buyurtmada belgilangan yer uchastkasining bo‘sh yoki bo‘sh emasligini aniqlaydi;
yer uchastkasi bo‘sh bo‘lmagan taqdirda, tuman (shahar) hokimligi va tuman (shahar) qurilish bo‘limiga bu to‘g‘risida ma’lumot yuboradi;
bo‘sh yer uchastkasi bo‘yicha yer tanlash materiallarini tayyorlaydi va “Yerelektron” AATga joylashtiradi.
13. “Yerelektron” AATga joylashtiriladigan bo‘sh yer uchastkasi bo‘yicha yer tanlash materiallari quyidagilarni o‘z ichiga olishi kerak:
yer uchastkasining WGS-84 (World Geodetic System 1984) ochiq koordinatalar tizimida shartli chegaralari;
yer uchastkasining joylashuv sxemasi va geolokatsiyasi;
ushbu yer uchastkasidan foydalanish mumkin bo‘lgan faoliyat turlari;
yer uchastkasi, jumladan, uning maydoni (gektarda), yer uchastkasining yer fondi toifasi haqida qisqacha ma’lumot;
chegaradosh yer uchastkalaridan foydalanish turlari ko‘rsatilgan vaziyat bilan bog‘liq sxema;
yer uchastkasiga tutash hududlardagi obyektlarning belgilangan maqsadi va turlari;
yer uchastkasini kamida ikki tomondan o‘rab turgan obyektlarning raqamli fotosurati.
Har bir yer uchastkasiga o‘ziga xos raqam beriladi.
14. Loyiha-qidiruv tashkiloti bo‘sh yer uchastkasi bo‘yicha yer tanlash materiallari “Yerelektron” AATga joylashtirilgan so‘ng:
a) joyiga chiqqan holda yer uchastkasi va unga tutash hududning yer osti kommunikatsiyalari aks ettirilgan topografik xaritasini mahalliy koordinatalar tizimida elektron shaklda quyidagi muddatlarda tayyorlaydi:
umumiy yer maydoni 5 gektargacha bo‘lganda — 10 ish kunida;
umumiy yer maydoni 5 gektardan ko‘p bo‘lganda — 25 ish kunida;
b) elektron shaklda tayyorlangan topografik xaritani “Yerelektron” AATga joylashtiradi. Topografik xaritada loyiha-qidiruv tashkiloti tomonidan tuman (shahar) qurilish bo‘limi bilan birga ko‘chalarning qizil chiziqlari belgilab beriladi.
15. Tuman (shahar) qurilish bo‘limi loyiha-qidiruv tashkiloti tomonidan ishlab chiqilgan topografik xaritani olgandan so‘ng bir ish kunida topografik xaritani va bo‘sh yer uchastkasi bo‘yicha yer tanlash materiallarini ilova qilgan holda “Yerelektron” AAT orqali yer uchastkasining joylashuvi quyidagi talablarga muvofiqligini:
a) tegishli hududlar va inshootlardan rejim asosida foydalanish hamda ularni ekspluatatsiya qilish bo‘yicha — mazkur obyektlardan foydalanadigan hamda ularni ekspluatatsiya qiladigan tashkilotlar;
b) yong‘in xavfsizligi bo‘yicha — yong‘in xavfsizligi bo‘limlari, Toshkent shahrida — yong‘in xavfsizligi boshqarmasi;
v) yo‘l harakati xavfsizligi bo‘yicha — davlat yo‘l harakati xavfsizligi xizmati hududiy organlariga kelishish uchun yuboradi.
16. Ushbu Nizomning 15-bandida nazarda tutilgan tashkilotlar ularga so‘rov tushgan kundan boshlab uch ish kun ichida “Yerelektron” AATga tegishli belgini qo‘yish orqali elektron raqamli imzo bilan tasdiqlagan holda materiallarni kelishadi yoki kelishishni rad etadi.
Kelishuv hech qanday e’tiroz va shartlarsiz amalga oshiriladi.
Kelishuv rad etilganda sohaga oid qonunchilik hujjatlari normalariga havolalar qilingan holda yer uchastkasini tadbirkorlik va shaharsozlik faoliyati uchun ajratish imkoni yo‘qligining asoslangan sabablari ko‘rsatiladi hamda mazkur yer uchastkalari aynan qaysi jihatdan ushbu normalarga muvofiq emasligi aks ettiriladi.
17. Kelishuv natijalari “Yerelektron” AATga joylashtirilgandan so‘ng tuman (shahar) qurilish bo‘limi uch ish kuni ichida ushbu yer uchastkasi to‘g‘risida tegishli xulosani tayyorlaydi, bunda:
umumiy foydalanishdagi avtomobil yo‘llarigacha bo‘lgan masofa to‘g‘risidagi ma’lumotlar;
zarur hollarda loyiha-qidiruv tashkiloti tomonidan ishlab chiqilgan topografik xarita asosida yer uchastkasining chegaralariga o‘zgartirish kiritish yoxud yer uchastkasidan shaharsozlik cheklovlari quyilgan holda foydalanish bo‘yicha asoslangan taklif aks ettiriladi.
Tuman (shahar) qurilish bo‘limining xulosalari “Yerelektron” AATga elektron shaklda kiritiladi va elektron raqamli imzo bilan tasdiqlanadi.
Xulosalar ijobiy yoki salbiy bo‘lishi mumkin. Xulosaning sarlavhasida “Ijobiy xulosa” yoki “Salbiy xulosa” degan so‘zlar ko‘rsatiladi.
Ijobiy xulosada yer uchastkasining mulkdoriga yoki ijarachisiga nisbatan shaharsozlik hamda boshqa norma va qoidalarga rioya etish talablari bayon etiladi.
Salbiy xulosada sohaga oid qonunchilik hujjatlari normalariga havola qilingan holda tadbirkorlik yoki shaharsozlik faoliyatini amalga oshirish uchun yer uchastkalarini ajratish imkoni yo‘qligining asoslangan sabablari ko‘rsatiladi hamda mazkur yer uchastkalari aynan qaysi jihatdan ushbu normalarga muvofiq emasligi aks ettiriladi.
Shu bilan birga, rad etish sabablarini bartaraf etish yuzasidan mavjud bo‘lgan barcha imkoniyatlar va qayta kiritishni nazarda tutuvchi tavsiyalar taqdim etadi.
Tuman (shahar) qurilish bo‘limi tomonidan xulosa tayyorlash haqi eng kam bazaviy hisoblash miqdorining ikki baravari miqdorida belgilanadi va mazkur haq lotni sotishdan tushgan mablag‘lar hisobidan qoplanadi.
18. “Yerelektron” AAT orqali tuman (shahar) qurilish bo‘limining ijobiy xulosasi olingandan so‘ng besh ish kuni ichida:
a) muhandislik-kommunikatsiya tarmoqlaridan foydalanuvchi tashkilotlar “Yerelektron” AAT orqali har bir yer uchastkasi bo‘yicha qurilish obyektini tashqi muhandislik-kommunikatsiya tarmoqlariga ulash mumkin bo‘lgan quvvatlar to‘g‘risida ma’lumotlar taqdim etadi;
b) Qoraqalpog‘iston Respublikasi Ekologiya va atrof muhitni muhofaza qilish qo‘mitasi, viloyatlar va Toshkent shahar ekologiya va atrof muhitni muhofaza qilish boshqarmalari yer uchastkasi bo‘yicha tegishli xulosa tuzadi hamda uni elektron shaklda “Yerelektron” AATga kiritadi va elektron raqamli imzo bilan tasdiqlaydi.
Xulosalar ijobiy yoki salbiy bo‘lishi mumkin. Xulosaning sarlavhasida “Ijobiy xulosa” yoki “Salbiy xulosa” degan so‘zlar ko‘rsatiladi.
Ijobiy xulosada yer uchastkasining mulkdoriga yoki ijarachisiga nisbatan shaharsozlik hamda boshqa norma va qoidalarga rioya etish talablari bayon etiladi.
Salbiy xulosada sohaga oid qonunchilik hujjatlari normalariga havolalar qilingan holda tadbirkorlik yoki shaharsozlik faoliyatini amalga oshirish uchun yer uchastkalarini ajratish imkoni yo‘qligining asoslangan sabablari ko‘rsatiladi hamda mazkur yer uchastkalari aynan qaysi jihatdan ushbu normalarga muvofiq emasligi aks ettiriladi;
v) Turizm va sport vazirligi huzuridagi Madaniy meros agentligi Qoraqalpog‘iston Respublikasi, viloyatlar va Toshkent shahar madaniy meros boshqarmalari materiallarni kelishadi yoki kelishishni rad etadi;
g) Transport vazirligi huzuridagi Avtomobil yo‘llari qo‘mitasining Qoraqalpog‘iston Respublikasi va viloyatlar avtomobil yo‘llari bosh boshqarmalari avtomobil yo‘llarining yo‘l bo‘yi mintaqasi hududida joylashgan yer uchastkalari bo‘yicha materiallarni kelishadi yoki kelishishni rad etadi.
Bunda “Yerelektron” AATda qabul qilingan qaror haqida elektron raqamli imzo bilan tasdiqlanadigan tegishli belgi qo‘yiladi.
Kelishuv hech qanday e’tiroz va shartlarsiz amalga oshiriladi.
Kelishish rad etilganda sohaga oid qonunchilik hujjatlari normalariga havolalar qilingan holda tadbirkorlik yoki shaharsozlik faoliyatini amalga oshirish uchun yer uchastkalarini ajratish imkoni yo‘qligining asoslangan sabablari ko‘rsatiladi hamda mazkur yer uchastkalari aynan qaysi jihatdan ushbu normalarga muvofiq emasligi aks ettiriladi.
Shu bilan birga, rad etish sabablarini bartaraf etish yuzasidan mavjud bo‘lgan barcha imkoniyatlar va qayta kiritishni nazarda tutuvchi tavsiyalar taqdim etiladi.
19. “Yerelektron” AATga koordinatalari kiritilgan tadbirkorlik va shaharsozlik faoliyati uchun berilishi mumkin bo‘lmagan hududlarda joylashgan, salbiy xulosalar berilgan yer uchastkalari auksionga chiqarilmaydi va ajratish imkoni yo‘qligining asoslangan sabablari ko‘rsatilgan holda “Yerelektron” AATda ushbu xulosa olingan kundan boshlab bir ish kuni ichida e’lon qilinadi.
20. Yer uchastkasi bo‘yicha tuman (shahar) qurilish bo‘limi va barcha vakolatli tashkilotlardan ijobiy xulosa “Yerelektron” AATga joylashtirilgandan so‘ng filial o‘n ish kunida kadastr yig‘majildini tayyorlaydi va tuman (shahar) hokimligiga yuboradi.
Filialning kadastr yig‘majildini tayyorlash hamda hududiy boshqarmaning yer uchastkasiga bo‘lgan huquqni davlat ro‘yxatidan o‘tkazish bo‘yicha xarajatlari Vazirlar Mahkamasining “Davlat kadastri sohasida davlat xizmatlari narxlarini belgilashda tabaqalashtirilgan yondashuv tartibini takomillashtirish to‘g‘risida” 2014-yil 10-iyuldagi 186-son qarori talablariga muvofiq belgilanadi va tuman (shahar) mahalliy budjeti mablag‘lari hisobidan qoplanadi.
21. Tuman (shahar) hokimligi ikki ish kunida “E-qaror” tizimida qaror loyihasini ishlab chiqadi, kelishadi va ro‘yxatdan o‘tkazadi hamda “Kadastr va ro‘yxatdan o‘tkazish integratsiyalashgan axborot tizimi” orqali mulk huquqi bilan yer uchastkasiga bo‘lgan huquqni davlat ro‘yxatidan o‘tkazish uchun tegishli Davlat kadastrlari palatasining Qoraqalpog‘iston Respublikasi, viloyatlar va Toshkent shahar boshqarmalariga (keyingi o‘rinlarda — Davlat kadastrlari palatasining hududiy boshqarmasi) yuboradi.
22. Davlat kadastrlari palatasi hududiy boshqarmasi ikki ish kunida:
buyurtmada ko‘rsatilgan yer uchastkasi ma’lumotlarining Ko‘chmas mulkka bo‘lgan huquqlarning davlat reyestridagi ma’lumotlarga muvofiqligini tekshiradi;
yer uchastkasiga nisbatan taqiqning yoki xatlovning mavjudligini tekshiradi;
tegishli tuman (shahar) hokimligi nomiga yer uchastkasiga bo‘lgan mulk huquqini davlat ro‘yxatidan o‘tkazadi va ko‘chirmani “Yerelektron” AAT kiritadi.
23. Yer uchastkasiga bo‘lgan huquq davlat ro‘yxatidan o‘tkazilganidan va kelishuv natijalari va ijobiy xulosalar olinganidan so‘ng tuman (shahar) hokimligi ikki ish kuni ichida quyidagilarni:
auksionga chiqariladigan bo‘sh turgan yer uchastkasining huquq turini;
yer uchastkasi bo‘yicha yoki undan foydalanishga nisbatan mavjud cheklovlarni;
auksionga ijara huquqi bilan chiqariladigan yer uchastkasi bo‘yicha ijara muddati va tegishli hokim tomonidan ERI orqali imzolangan ijara shartnomasining loyihasini belgilaydi va “Yerelektron” ATTga kiritadi.
24. Tuman (shahar) hokimligi tomonidan ma’lumotlar “Yerelektron” ATTga kiritilganidan so‘ng:
a) yer uchastkasi mulk huquqi bilan auksionga chiqarilganda Davlat aktivlarini boshqarish agentligining hududiy boshqarmasi:
barcha hujjatlar to‘liq taqdim etilgandan boshlab o‘n besh ish kuni ichida eng yaxshi takliflarni tanlash orqali baholovchi tashkilotni aniqlash, u bilan shartnoma tuzish, yer uchastkasining bozor qiymatini aniqlash ishlarining tashkil etilishini ta’minlaydi;
o‘n ish kuni ichida shartnoma asosida mustaqil ekspertni (baholovchi, auditorlik, moliyaviy, konsalting tashkilotini) shartnoma asosida jalb etgan holda baholash to‘g‘risidagi hisobotning ishonchliligi ekspertizadan o‘tkazilishini ta’minlaydi;
bir ish kunida baholash tashkiloti tomonidan tayyorlangan hisobot va ekspertiza xulosasi asosida “Yerelektron” AATga yer uchastkasining boshlang‘ich narxini kiritadi;
b) yer uchastkasi ijara huquqi bilan auksionga chiqarilganda “Yerelektron” ATT avtomatik ravishda tegishli tuman (shahar) uchun belgilangan yer uchastkasiga ijara huquqining minimal qiymati asosida auksionga chiqarilayotgan yer uchastkasini ijaraga olish huquqining boshlang‘ich qiymatini belgilaydi.
25. Yer uchastkasini ijaraga olish huquqining minimal qiymati har bir tuman (shahar) uchun Qoraqalpog‘iston Respublikasi Vazirlar Kengashi, viloyatlar, Toshkent shahar hokimlari qarorlari bilan quyidagi mezonlar bo‘yicha tasdiqlanadi:
yer solig‘ining yillik miqdori;
yer uchastkasini ijaraga berish muddati;
yer uchastkasini tanlash materiallarini tayyorlash ishlarining qiymati va yer uchastkasiga bo‘lgan huquqlarni davlat ro‘yxatidan o‘tkazishga oid xarajatlar;
muhandislik-kommunikatsiya tarmoqlariga ulanish nuqtalarining mavjudligi.
Har bir tuman (shahar) uchun yer uchastkasiga ijara huquqining minimal qiymati u tasdiqlangan sanadan e’tiboran ikki ish kuni ichida davlat soliq xizmati organlari tomonidan “Yerelektron” AATga kiritiladi.
Oxirgi tasdiqlangan yer uchastkasini ijaraga olish huquqining minimal qiymati uning yangi qiymati tasdiqlangunga qadar amalda bo‘ladi.
2-§. Tadbirkorlik va shaharsozlik faoliyatini amalga oshirish uchun taqdim etilmaydigan hududlarning koordinatalarini taqdim etish va ularni yangilash tartibi
26. Davlat kadastrlarini yuritish sohasidagi vakolatli tashkilotlar “Yerelektron” AAT orqali tadbirkorlik va shaharsozlik faoliyati uchun berilishi mumkin bo‘lmagan muhofaza zonalari hududlarning koordinatalarini Kadastr agentligiga taqdim etib borishlari shart.
Tadbirkorlik va shaharsozlik faoliyatini amalga oshirish uchun berilishi mumkin bo‘lmagan hududlarning koordinatalari “Yerelektron” AAT orqali Kadastr agentligi tomonidan belgilanadigan shaklda taqdim etiladi.
Hududlarning koordinatalari zaruratga qarab, lekin har oyda kamida bir marta yangilanadi.
3-§. Yer uchastkasini auksionga chiqarishga tayyorlash
27. Tadbirkorlik va shaharsozlik faoliyatini amalga oshirish uchun mo‘ljallangan bo‘sh yer uchastkalarini auksionga chiqarish bo‘yicha materiallar kelishilgandan, bozor qiymati yoki ijara huquqi qiymati to‘g‘risidagi ma’lumotlar “Yerelektron” AATga kiritilganidan, shuningdek, ijara huquqi bilan chiqariladigan yer uchastkasi bo‘yicha ijara shartnomasining loyihasi shakllantirilganidan so‘ng yer uchastkasi yoki yer uchastkasiga ijara huquqi buyurtmachi tomonidan avtomatik ravishda auksionga qo‘yish uchun operatorga yuboriladi.
28. Yer uchastkasi ushbu Nizom bilan belgilangan tartibda kelishuv amalga oshirilganligi va ijobiy xulosa olinganligiga qarab har bir yer uchastkasi bo‘yicha alohida auksionga chiqariladi.
Auksionga chiqarishda yer uchastkasi to‘g‘risida ko‘rsatilishi shart bo‘lgan ma’lumotning minimal hajmi quyidagilarni o‘z ichiga olishi lozim:
yer uchastkasining o‘ziga xos raqami va joylashgan joyi;
yer uchastkasiga bo‘lgan huquq turi;
yer uchastkasi kiradigan yerlar toifasi;
yer uchastkasidan foydalanish mumkin bo‘lgan faoliyat turlari;
yer uchastkasi maydoni (gektarda);
yer uchastkasini kamida ikki tomondan o‘rab turgan obyektlarning raqamli fotosurati;
yer uchastkasiga tutash hududlarning (obyektlarning) belgilangan maqsadi va turlari;
qurilish obyektini tashqi muhandislik-kommunikatsiya tarmoqlariga ulash mumkin bo‘lgan quvvatlar to‘g‘risidagi ma’lumotlar;
umumiy foydalanishdagi avtomobil yo‘llarigacha bo‘lgan masofa;
mazkur yer uchastkasida qurilishga ruxsat berilgan yoki taqiqlangan obyektlar turlari ro‘yxati;
yer uchastkalarining boshlang‘ich narxi;
yer uchastkasi bo‘yicha yoki undan foydalanish huquqiga nisbatan mavjud cheklovlar;
yer uchastkasidan foydalanish shartlari va tartibiga taalluqli boshqa axborot.
Auksionga ijara huquqi bilan chiqariladigan yer uchastkasi bo‘yicha qo‘shimcha ravishda ijara muddati ko‘rsatiladi va ijara shartnomasining loyihasi ilova qilinadi.
Yer uchastkasi bo‘yicha tegishli ma’lumotlar, shu jumladan, fotosuratlar, uning geolokatsiya va koordinatalari to‘liq ko‘rsatilmagan holda auksionga chiqarish uchun buyurtma taqdim etilganda, operator tomonidan kamchiliklarni bartaraf etish uchun qaytariladi.
Buyurtmachi operator tomonidan qayd etilgan barcha kamchiliklarni bir hafta muddatda bartaraf etib, elektron buyurtmani ushbu band talablariga muvofiq takroran yuboradi.
29. Yer uchastkasini auksionga chiqarish to‘g‘risidagi ma’lumotlar ikki ish kunida ommaviy axborot vositalarida hamda tuman (shahar) hokimligi va Davlat aktivlarini boshqarish agentligi Internet jahon axborot tarmog‘idagi rasmiy veb-saytlarida e’lon qilinishi lozim.
30. “E-auksion” platformasida elektron onlayn-auksion tashkil etish hamda o‘tkazish tartibi Vazirlar Mahkamasining alohida qarori bilan belgilangan tartibda amalga oshiriladi.
Yer uchastkalarini xususiylashtirish bo‘yicha auksionda O‘zbekiston Respublikasi fuqarolari va yuridik shaxslari ishtirok etish huquqiga ega (chet el investitsiyalari ishtirokidagi korxonalar bundan mustasno.)
Yuridik va jismoniy shaxslar ijaraga berish huquqi asosida yer uchastkalarini sotib olish bo‘yicha auksionda qatnashish huquqiga ega.
4-§. Ijara huquqi asosida berilgan yer uchastkalari bo‘yicha auksion natijalarini rasmiylashtirish tartibi
31. Auksion g‘olibi auksion natijalari to‘g‘risidagi bayonnoma tushgan kundan boshlab o‘n ish kuni mobaynida ijara shartnomasini elektron raqamli imzo bilan tasdiqlaydi. Ijara shartnomasi taraflar tomonidan imzolagandan so‘ng avtomatik ravishda “Yerelektron” AAT orqali Davlat kadastrlari palatasining hududiy boshqarmasiga yuboriladi.
32. Yer uchastkalariga bo‘lgan huquqlarni davlat ro‘yxatidan o‘tkazish Davlat kadastrlar palatasining hududiy boshqarmasi tomonidan ijara shartnoma tushgan kundan boshlab ikki ish kuni ichida amalga oshiriladi. Ko‘chmas mulk obyektlariga bo‘lgan huquqlarning davlat reyestridan yer uchastkasiga ijara huquqi davlat ro‘yxatidan o‘tkazilganligi to‘g‘risidagi ko‘chirma operatorga “Yerelektron” AAT orqali auksion g‘olibiga belgilangan tartibda taqdim etish uchun yuboriladi.
Bunda Davlat kadastrlar palatasining hududiy boshqarmasi tomonidan yer uchastkasi joylashgan joydagi davlat soliq xizmati organlariga qonunchilik hujjatlarida belgilangan tartibda ma’lumot yuboriladi.
Davlat kadastrlar palatasining hududiy boshqarmasi yer uchastkasiga bo‘lgan ijara huquqini davlat ro‘yxatidan o‘tkazish bo‘yicha xarajatlari Vazirlar Mahkamasining “Davlat kadastri sohasida davlat xizmatlari narxlarini belgilashda tabaqalashtirilgan yondashuv tartibini takomillashtirish to‘g‘risida” 2014-yil 10-iyuldagi 186-son qarori talablariga muvofiq belgilanadi va lotni sotishdan tushgan mablag‘lar hisobidan qoplanadi.
33. Operator yer uchastkasiga bo‘lgan ijara huquqini davlat ro‘yxatidan o‘tkazish to‘g‘risidagi ko‘chirmani olgandan so‘ng uni avtomatik ravishda g‘olibning shaxsiy kabinetiga yuboradi.
5-§. Davlat orderini rasmiylashtirish va yer uchastkasiga bo‘lgan mulk huquqini ro‘yxatdan o‘tkazish tartibi
34. Davlat aktivlarini boshqarish agentligining hududiy boshqarmasi auksion savdosi natijalari to‘g‘risidagi bayonnomani olgan kundan boshlab bir ish kuni ichida ushbu Nizomga 2-ilovada keltirilgan shaklda yer uchastkasiga mulk huquqini beruvchi davlat orderini (keyingi o‘rinlarda — davlat orderi) rasmiylashtiradi, belgilangan shaklda uni ERI bilan tasdiqlaydi va auksion g‘olibining shaxsiy kabinetiga hamda “Yerelektron” ATT orqali Davlat kadastrlari palatasining hududiy boshqarmasiga yuboradi.
Davlat orderi g‘olib nomiga yer uchastkasini mulk huquq asosida ro‘yxatdan o‘tkazish uchun asos hisoblanadi. Shu bilan birga, davlat orderi berish uchun davlat boji undirilmaydi.
35. Yer uchastkalariga bo‘lgan huquqlarni davlat ro‘yxatidan o‘tkazish Davlat kadastrlari palatasining hududiy boshqarmasi tomonidan davlat orderi tushgan kundan boshlab ikki ish kuni ichida amalga oshiriladi.
Ko‘chmas mulk obyektlariga bo‘lgan huquqlarning davlat reyestridan yer uchastkasidan mulk huquqi davlat ro‘yxatidan o‘tkazilganligi to‘g‘risidagi ko‘chirma operatorga “Yerelektron” AAT orqali auksion g‘olibiga belgilangan tartibda taqdim etish uchun yuboriladi.
Bunda Davlat kadastrlari palatasining hududiy boshqarmasi tomonidan yer uchastkasi joylashgan joydagi davlat soliq xizmati organlariga qonunchilik hujjatlarida belgilangan tartibda ma’lumot yuboriladi.
Davlat kadastrlari palatasining hududiy boshqarmasi yer uchastkasiga bo‘lgan mulk huquqini davlat ro‘yxatidan o‘tkazish bo‘yicha xarajatlari Vazirlar Mahkamasining “Davlat kadastri sohasida davlat xizmatlari narxlarini belgilashda tabaqalashtirilgan yondashuv tartibini takomillashtirish to‘g‘risida” 2014-yil 10-iyuldagi 186-son qarori talablariga muvofiq belgilanadi va lotni sotishdan tushgan mablag‘lar hisobidan qoplanadi.
36. Operator yer uchastkasiga bo‘lgan mulk huquqini davlat ro‘yxatidan o‘tkazish to‘g‘risidagi ko‘chirmani olgandan so‘ng uni avtomatik ravishda g‘olibning shaxsiy kabinetiga yuboradi.
6-§. Yer uchastkasini berish
37. Davlat orderi yoki yer uchastkasining ijara shartnomasi asosida filial tuman (shahar) qurilish bo‘limi bilan birgalikda uch ish kuni mobaynida yer uchastkasi chegaralarini joyida (naturada) belgilaydi.
Yer uchastkasi chegaralarini kiritgan holda yer uchastkasi chegaralarini joyida (naturada) belgilash dalolatnomasini tayyorlash ishlarini bajarish uchun bazaviy hisoblash miqdorining ikki baravari miqdorida haq undiriladi va lotni sotishdan tushgan mablag‘lar hisobidan qoplanadi.
38. Ajratilgan yer uchastkasida qurilishni boshlashga faqat yer uchastkasiga bo‘lgan huquq davlat ro‘yxatidan o‘tkazilgandan keyin yo‘l qo‘yiladi.
3-bob. Auksiondan tushadigan mablag‘larni taqsimlash
39. Buyurtmachi operatordan yer uchastkalarini ijara va mulk huquqi asosida sotishdan tushgan mablag‘larni bir ish kuni ichida quyidagilarga yo‘naltiradi:
a) ushbu Nizomning 17-bandida nazarda tutilgan miqdorda — tegishli ravishda Qoraqalpog‘iston Respublikasi Qurilish vazirligi, viloyatlar va Toshkent shahar qurilish bosh boshqarmalari bank hisobvarag‘iga;
b) ushbu Nizomning 32 va 35-bandlarida nazarda tutilgan miqdorda — tegishli Davlat kadastrlari palatasining hududiy boshqarmasiga, uning 10 foizi Kadastr agentligining budjetdan tashqari jamg‘armasining maxsus g‘aznachilik hisobvarag‘iga (4014);
v) yer uchastkasi chegaralarini kiritgan holda yer uchastkasi chegaralarini joyida (naturada) belgilash dalolatnomasini tayyorlash ishlarini bajarish uchun mazkur Nizomning 37-bandida nazarda tutilgan mablag‘lar quyidagicha taqsimlanadi:
bazaviy hisoblash miqdorining bir baravari miqdoridagi mablag‘ — tegishli ravishda Qoraqalpog‘iston Respublikasi Qurilish vazirligi, viloyatlar va Toshkent shahar qurilish bosh boshqarmalari bank hisobvarag‘iga;
bazaviy hisoblash miqdorining bir baravari miqdoridagi mablag‘ — tegishli Kadastr agentligi Davlat kadastrlari palatasining hududiy boshqarmasi hisobvarag‘iga;
g) 10 foizi — “Yerelektron” AATni texnik ko‘llab-quvvatlash va uni yuritish bilan bog‘liq shtat birliklarini saqlash uchun Davlat kadastrlari palatasining bank hisobvarag‘iga (bunda mazkur xarajatlar uchun yer uchastkalarini elektron onlayn-auksion orqali realizatsiya qilish hisobidan yo‘naltirilgan mablag‘lar miqdori bir kalendar yilda bazaviy hisoblash miqdorining yuz ming baravaridan oshmasligi lozim);
d) baholash va ekspertizadan o‘tkazish bo‘yicha ko‘rsatgan xizmatlari uchun mustaqil baholovchi va ekspert tashkilot bilan tuzilgan shartnomaga muvofiq ularning bank hisobvarag‘iga;
e) qolgan mablag‘lar Qoraqalpog‘iston Respublikasi respublika budjeti, viloyatlarning viloyat budjetlari va Toshkent shahrining shahar budjeti maxsus g‘azna hisobvaraqlariga ularning qo‘shimcha manbalari sifatida yo‘naltiriladi va quyidagicha taqsimlanadi:
30 foizi — yer uchastkalari davlat organlari, muassasalari va korxonalari foydalanishida bo‘lgan va ularning tashabbusi bilan elektron onlayn-auksionga qo‘yilgan taqdirda — ushbu davlat organlari va tashkilotlariga, qolgan hollarda — davlat va jamiyat ehtiyojlari uchun yer uchastkalarining olib qo‘yilishi munosabati bilan jismoniy va yuridik shaxslarga yetkazilgan zararlarni qoplash bo‘yicha hududiy jamg‘armaga;
70 foizi — Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari huzuridagi Tadbirkorlik infratuzilmasini rivojlantirish jamg‘armasiga.
4-bob. Ushbu Nizom talablariga rioya etilishini tizimli nazorat va monitoring qilish
40. Prokuratura organlari va adliya organlari ushbu Nizom talablariga davlat organlari va boshqa tashkilotlar tomonidan so‘zsiz rioya etilishi bo‘yicha tizimli nazorat va monitoringni amalga oshiradi.
Tizimli nazorat va monitoring yer uchastkasi materiallarini tayyorlash jarayoniga aralashmasdan, “Yerelektron” AAT orqali amalga oshiriladi.
41. Prokuratura va adliya organlari yer uchastkasi materiallarini tayyorlashning qonuniyligini ta’minlaydi va yer uchastkasi materiallarini tayyorlash jarayonining huquqni qo‘llash amaliyotini, shu jumladan, vakolatli tashkilotlar tomonidan kelishuvni rad etish va salbiy xulosa berishning qonuniyligini, normativ-huquqiy hujjatlarni noto‘g‘ri yoki qarama-qarshi qo‘llash amaliyotini, shuningdek, huquqni qo‘llash amaliyotida huquqbuzarlik sodir etilishiga olib keladigan salbiy omillarni, sabab va sharoitlarni bartaraf etish usullarini o‘rganadi.
42. Ushbu Nizomda nazarda tutilgan tartibni buzish davlat xizmatlari ko‘rsatish talablari va tartibini buzish hisoblanadi.
43. Ushbu Nizomda nazarda tutilgan tartib buzilishi aniqlangan taqdirda, adliya organlari Adliya vazirligi huzuridagi Davlat xizmatlari agentligi yoki uning hududiy boshqarmalariga yoxud prokuratura organlariga buzilish holatini tasdiqlovchi zarur materiallarni yuboradi.
5-bob. Yakunlovchi qoidalar
44. Ushbu Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.
Tadbirkorlik va shaharsozlik faoliyatini amalga oshirish uchun yer uchastkalarini mulk huquqi va ijara huquqi asosida elektron onlayn-auksion orqali realizatsiya qilish tartibi to‘g‘risidagi nizomga
1-ILOVA
Tadbirkorlik va shaharsozlik faoliyatini amalga oshirish uchun yer uchastkalarini mulk huquqi va ijara huquqi asosida elektron onlayn-auksion orqali realizatsiya qilish
SXEMASI