1. Tabiiy resurslar / Er



[OKOZ:

1.03.00.00.00 Fuqarolik qonunchiligi / 03.08.00.00 Mulk huquqi va boshqa ashyoviy huquqlar / 03.08.03.00 Xususiy mulk;

2.03.00.00.00 Fuqarolik qonunchiligi / 03.08.00.00 Mulk huquqi va boshqa ashyoviy huquqlar / 03.08.05.00 Davlat tasarrufidan chiqarish va xususiylashtirish (shuningdek, 08.01.06.00ga qarang) / 03.08.05.01 Umumiy qoidalar;

3.11.00.00.00 Atrof tabiiy muhit va tabiiy resurslar / 11.03.00.00 Erdan foydalanish va muhofaza qilish / 11.03.09.00 Er uchastkasiga nisbatan huquqlarning vujudga kelishi / 11.03.09.03 Auksion va shartnomalar va boshqa bitimlarga asosan yerga bo‘lgan huquqlarning paydo bo‘lishi]

[TSZ:

1.Tabiiy resurslar / Er;

2.Fuqarolik qonunchiligi. Tadbirkorlik / Davlat tasarrufidan chiqarish va xususiylashtirish]

O‘zbekiston Respublikasi Vazirlar Mahkamasining
qarori
“Qishloq xo‘jaligiga mo‘ljallanmagan yer uchastkalarini xususiylashtirish to‘g‘risida”gi O‘zbekiston Respublikasi Qonunini amalga oshirish chora-tadbirlari haqida
“Qishloq xo‘jaligiga mo‘ljallanmagan yer uchastkalarini xususiylashtirish to‘g‘risida”gi O‘zbekiston Respublikasi Qonuni hamda O‘zbekiston Respublikasi Prezidentining “Yer munosabatlarida tenglik va shaffoflikni ta’minlash, erga bo‘lgan huquqlarni ishonchli himoya qilish va ularni bozor aktiviga aylantirish chora-tadbirlari to‘g‘risida” 2021-yil 8-iyundagi PF-6243-son Farmoni ijrosini ta’minlash maqsadida Vazirlar Mahkamasi qaror qiladi:
1. Quyidagilar:
“Qishloq xo‘jaligiga mo‘ljallanmagan yer uchastkalarini xususiylashtirish to‘g‘risida”gi O‘zbekiston Respublikasi Qonuniga muvofiq yer uchastkalarini xususiylashtirish O‘zbekiston Respublikasi fuqarolari va yuridik shaxslari tomonidan ularga doimiy foydalanish (egalik qilish), ijara yoxud meros qilib qoldiriladigan umrbod egalik qilish huquqi asosida tegishli bo‘lgan yer uchastkalarini sotib olish, shuningdek, yer uchastkalarini elektron onlayn-auksion orqali sotish yo‘li bilan amalga oshirilishi;
O‘zbekiston Respublikasi Prezidentining “Yer munosabatlarida tenglik va shaffoflikni ta’minlash, erga bo‘lgan huquqlarni ishonchli himoya qilish va ularni bozor aktiviga aylantirish chora-tadbirlari to‘g‘risida” 2021-yil 8-iyundagi PF-6243-son Farmoniga muvofiq qishloq xo‘jaligiga mo‘ljallanmagan yerlar mulk huquqi va ijara huquqi asosida elektron onlayn-auksion orqali realizatsiya qilinishi;
Vazirlar Mahkamasining “Sirdaryo viloyatida qishloq xo‘jaligiga mo‘ljallanmagan yer uchastkalarini xususiylashtirish tartib-taomillarini aprobatsiya qilish bo‘yicha huquqiy eksperiment o‘tkazish to‘g‘risida” 2019-yil 2-dekabrdagi 963-son qaroriga muvofiq Sirdaryo viloyatida “Yerxususiylasntirish” avtomatlashtirilgan axborot tizimi (keyingi o‘rinlarda — “Yerxususiylasntirish” AAT) orqali qishloq xo‘jaligiga mo‘ljallanmagan yer uchastkalarini xususiylashtirish tartib-taomillarini aprobatsiya qilish bo‘yicha huquqiy eksperiment o‘tkazilganligi ma’lumot uchun qabul qilinsin.
2. O‘zbekiston Respublikasi Prezidenti huzuridagi Loyiha boshqaruvi milliy agentligi ikki hafta muddatda Axborot texnologiyalari va kommunikatsiyalarini rivojlantirish vazirligi, Kiberxavfsizlik markazi, O‘zbekiston Respublikasi Davlat aktivlarini boshqarish agentligining (keyingi o‘rinlarda — Davaktiv agentligi) rahbar xodimlaridan iborat ishchi guruh tashkil etgan holda “Yerxususiylashtirish” AATni, uni ishlab chiqish hamda amaliyotga joriy etish bo‘yicha tasdiqlangan texnik hujjatlar va ekspertiza xulosalari bilan birgalikda Davaktiv agentligiga operativ boshqaruv huquqi asosida topshirilishini ta’minlasin.
Davaktiv agentligi “Yerxususiylashtirish” AATni zaruratga ko‘ra takomillashtirib borsin, bunda “Yerxususiylashtirish” AATni qayta ishlab chiqish, takomillashtirish, texnik qo‘llab-quvvatlash, jarayonlarga malakali mutaxassislarni jalb qilish va u bilan bog‘liq boshqa barcha xarajatlar Davlat aktivlarini boshqarish, transformatsiya va xususiylashtirish jamg‘armasi mablag‘lari hisobidan amalga oshirilsin.
3. Belgilansinki:
a) O‘zbekiston Respublikasi fuqarolari va yuridik shaxslari tomonidan ularga doimiy foydalanish (egalik qilish), ijara yoxud meros qilib qoldiriladigan umrbod egalik qilish huquqi asosida tegishli bo‘lgan yer uchastkalarini xususiylashtirish “Yerxususiylasntirish” AAT orqali amalga oshiriladi;
b) Davaktiv agentligi “Yerxususiylasntirish” AATning texnik qo‘llab-quvvatlash bo‘yicha operatori hisoblanadi;
v) qishloq xo‘jaligiga mo‘ljallanmagan bo‘sh turgan yer uchastkalarini tadbirkorlik va shaharsozlik faoliyatini amalga oshirish uchun mulk yoki ijara huquqlari asosida, yakka tartibda uy-joy qurish uchun mulk huquqi asosida realizatsiya qilish “E-auksion” elektron savdo platformasi orqali amalga oshiriladi, bunda:
bo‘sh turgan yer uchastkasiga doir ma’lumotlarni shakllantirish va kelishish “Yerelektron” avtomatlashtirilgan axborot tizimi (keyingi o‘rinlarda — “Yerelektron” AAT) orqali amalga oshiriladi;
bo‘sh turgan yer uchastkasining zaxiraga olinganligi hamda ko‘chmas mulkka bo‘lgan huquqlarni ro‘yxatdan o‘tkazuvchi kadastr organlari tomonidan tegishli tuman (shahar) hokimligi nomiga davlat ro‘yxatidan o‘tkazilganligi ushbu yer uchastkasini “Yerelektron” AATga kiritishning majburiy sharti hisoblanadi;
g) “Yerxususiylashtirish” AATni texnik qo‘llab-quvvatlash, xususiylashtirilgan yer uchastkasiga mulk huquqini davlat ro‘yxatidan o‘tkazish, shuningdek, yagona billing hisob-kitob tizimi xizmatlari uchun to‘lovlar yer uchastkalarini xususiylashtirishdan tushgan mablag‘lar hisobidan qoplanadi.
4. Quyidagilar:
O‘zbekiston Respublikasi fuqarolari va yuridik shaxslariga doimiy foydalanish (egalik qilish), ijara va meros qilib qoldiriladigan umrbod egalik qilish huquqi asosida tegishli bo‘lgan yer uchastkalarini xususiylashtirish bo‘yicha davlat xizmatlari ko‘rsatishga doir ma’muriy reglament 1-ilovaga muvofiq;
Tadbirkorlik va shaharsozlik faoliyatini amalga oshirish uchun yer uchastkalarini mulk huquqi va ijara huquqi asosida elektron onlayn-auksion orqali realizatsiya qilish tartibi to‘g‘risidagi nizom 2-ilovaga muvofiq;
Yakka tartibda uy-joy qurish va uy-joyni obodonlashtirish uchun yer uchastkalarini mulk huquqi asosida elektron onlayn-auksion orqali realizatsiya qilish tartibi to‘g‘risidagi nizom 3-ilovaga muvofiq;
“Yerxususiylashtirish” AATga ulanadigan vazirliklar, idoralar va tashkilotlar ro‘yxati 4-ilovaga muvofiq;
“Yerelektron” AATga ulanadigan vazirliklar, idoralar va tashkilotlar ro‘yxati 5-ilovaga muvofiq tasdiqlansin.
5. O‘zbekiston Respublikasi Markaziy banki va tijorat banklariga bir oy muddatda xususiylashtirilgan yer uchastkalari garov ta’minoti sifatida qabul qilinishi mumkinligini inobatga olib o‘z idoraviy normativ-huquqiy hujjatlari va kredit siyosatlariga o‘zgartirish kiritish tavsiya etilsin.
O‘zbekiston Respublikasi Adliya vazirligi Notarial palata bilan birgalikda bir oy muddatda barcha notariuslarga xususiylashtirilgan yer uchastkalari bilan bog‘liq notarial harakatlarni amalga oshirishning xususiyatlarini tushuntirish bo‘yicha o‘quv-amaliy seminarlar tashkil etsin.
6. O‘zbekiston Respublikasi Davlat soliq qo‘mitasi, Davaktiv agentligi ikki oy muddatda qishloq xo‘jaligiga mo‘ljallanmagan yer uchastkalari uchun yuridik va jismoniy shaxslardan undiriladigan yer solig‘i stavkalari ma’lumotlar bazasining kadastr raqami bo‘yicha “Yerxususiylasntirish” AAT bilan integratsiya qilinishini ta’minlasin.
7. O‘zbekiston Respublikasi Davlat soliq qo‘mitasi huzuridagi Kadastr agentligi:
Davaktiv agentligi bilan birgalikda bir oy muddatda “Kadastr va ro‘yxatdan o‘tkazish integratsiyalashgan axborot tizimi”ning “Yerxususiylasntirish” AAT bilan integratsiya qilinishini;
bir oy muddatda yuridik va jismoniy shaxslar tomonidan ochiq ma’lumotlar portali orqali takliflar kiritishda yer uchastkasiga mulk huquqi yoki ijara huquqi turini tanlash imkoniyatini berishni nazarda tutgan holda “Yerelektron” AATning takomillashtirilishini;
ikki oy muddatda Kadastr agentligi va uning tizimidagi tashkilotlarning moddiy-texnika bazasini yanada mustahkamlash to‘g‘risidagi Hukumat qarori loyihasi Vazirlar Mahkamasiga kiritilishini;
Qurilish vazirligi bilan birgalikda uch oy muddatda davlat shaharsozlik kadastri va davlat yer kadastri ma’lumotlar bazalarining integratsiya qilinishini ta’minlasin.
8. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari O‘zbekiston Respublikasi Qurilish vazirligi, Moliya vazirligi hamda tegishli vazirliklar va idoralar bilan birgalikda ikki oy muddatda o‘z hududlarining ijtimoiy-iqtisodiy rivojlanishidan kelib chiqqan holda aholi punktlarining bosh rejalarini ishlab chiqish, mavjud bosh rejalarga belgilangan tartibda tuzatishlar kiritish yuzasidan Vazirlar Mahkamasiga taklif kiritsin.
9. Belgilansinki:
O‘zbekiston Respublikasi Prezidentining 2020-yil 7-sentabrdagi PQ-4819-son qaroriga 9-ilovada ko‘rsatilgan vazirliklar, idoralar va tashkilotlar rahbarlari — ushbu tashkilotlar foydalanishidagi yer uchastkalariga, Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlari — zaxira yerlar, obodonlashtirish yerlari va ko‘p kvartirali uy-joylarga tutash yer uchastkalariga bo‘lgan huquqlarning 2022-yil oxiriga qadar Milliy geografik axborot tizimida to‘liq davlat ro‘yxatidan o‘tkazilishi va ulardan belgilangan maqsadlarda foydalanilishi uchun shaxsan javobgar hisoblanadi;
vazirliklar va idoralar foydalanishidagi yer uchastkalari hamda dehqon xo‘jaliklarida 2022-yilda yer tuzish, geodeziya va xatlov ishlari, kadastr pasportlarini tayyorlash va erga bo‘lgan huquqlarni davlat ro‘yxatidan o‘tkazish uchun 6-ilovaga muvofiq talab etiladigan budjet mablag‘lari respublika budjetining 2022-yil 1 va 2-choraklari daromadlari prognozining oshirib bajarilishi hisobidan teng ulushlarda moliyalashtiriladi.
O‘rmon xo‘jaligi davlat qo‘mitasi, Ekologiya va atrof muhitni muhofaza qilish davlat qo‘mitasi hamda Turizm va sport vazirligi huzuridagi Madaniy meros agentligi mazkur bandda nazarda tutilgan tadbirlar uchun 6-ilovaga muvofiq budjetdan tashqari jamg‘armalar hisobidan moliyalashtirilishi lozim bo‘lgan mablag‘larning o‘z vaqtida ajratilishini ta’minlasin.
O‘zbekiston Respublikasi Moliya vazirligi har yili O‘zbekiston Respublikasining Davlat budjeti parametrlarini shakllantirishda mazkur bandning ikkinchi xatboshisida nazarda tutilgan tadbirlar hamda aholi punktlarining bosh rejalari, hududlarni rivojlantirish va qurish to‘g‘risidagi shaharsozlik hujjatlarini ishlab chiqish tadbirlari uchun tegishli mablag‘lar ajratilishini nazarda tutsin.
10. O‘zbekiston Respublikasi Adliya vazirligi huzuridagi Davlat xizmatlari agentligi:
Axborot texnologiyalari va kommunikatsiyalarini rivojlantirish vazirligi va Davaktiv agentligi bilan birgalikda ikki hafta muddatda O‘zbekiston Respublikasi fuqarolari va yuridik shaxslariga tegishli bo‘lgan qishloq xo‘jaligiga mo‘ljallanmagan yer uchastkalarini xususiylashtirish bo‘yicha arizalarni Davlat xizmatlari markazlari va O‘zbekiston Respublikasi Yagona interaktiv davlat xizmatlari portali orqali qabul qilish imkoniyatini yaratsin va ishga tushirsin;
davlat organlari va boshqa tashkilotlar tomonidan mazkur qarorga muvofiq davlat xizmatlari ko‘rsatilishining belgilangan tartibiga rioya etilishi bo‘yicha ularning faoliyati yuzasidan, shu jumladan, YIDXP orqali doimiy nazorat o‘rnatsin;
ushbu qaror bilan tasdiqlangan davlat xizmatlarini ko‘rsatish tartiblarini buzganlik uchun davlat organlari va boshqa tashkilotlar mansabdor shaxslariga nisbatan belgilangan tartibda ma’muriy jazolarni qo‘llasin.
11. Vazirlar Mahkamasining “Davlat mulki obyektlarini xususiylashtirish tartibi to‘g‘risidagi nizomlarni tasdiqlash haqida” 2014-yil 6-oktabrdagi 279-son qaroriga 7-ilovaga muvofiq o‘zgartirish va qo‘shimchalar kiritilsin.
12. O‘zbekiston Respublikasi Hukumatining 8-ilovaga muvofiq ayrim qarorlari o‘z kuchini yo‘qotgan deb hisoblansin.
13. O‘zbekiston Respublikasi Iqtisodiy taraqqiyot va kambag‘allikni qisqartirish vazirligi manfaatdor vazirliklar va idoralar bilan birgalikda Vazirlar Mahkamasiga:
bir oy muddatda qonunchilik hujjatlariga mazkur qarordan kelib chiqadigan o‘zgartirish va qo‘shimchalar to‘g‘risida;
zaruratga ko‘ra mazkur qaror normalarini takomillashtirib borish to‘g‘risida takliflar kiritsin.
14. Mazkur qarorning bajarilishini nazorat qilish O‘zbekiston Respublikasi Bosh vazirining moliya-iqtisodiyot va kambag‘allikni qisqartirish masalalari bo‘yicha o‘rinbosari — iqtisodiy taraqqiyot va kambag‘allikni qisqartirish vaziri J.A. Qo‘chqorov zimmasiga yuklansin.
O‘zbekiston Respublikasining Bosh vaziri A. ARIPOV
Toshkent sh.,
2022-yil 14-fevral,
71-son
Vazirlar Mahkamasining 2022-yil 14-fevraldagi 71-son qaroriga
1-ILOVA
O‘zbekiston Respublikasi fuqarolari va yuridik shaxslariga doimiy foydalanish (egalik qilish), ijara va meros qilib qoldiriladigan umrbod egalik qilish huquqi asosida tegishli bo‘lgan yer uchastkalarini xususiylashtirish bo‘yicha davlat xizmatlari ko‘rsatishga doir
MA’MURIY REGLAMENT
1-bob. Umumiy qoidalar
1. Ushbu Reglament O‘zbekiston Respublikasi fuqarolari va yuridik shaxslariga doimiy foydalanish (egalik qilish), ijara va meros qilib qoldiriladigan umrbod egalik qilish huquqi asosida tegishli bo‘lgan qishloq xo‘jaligiga mo‘ljallanmagan yer uchastkalarini xususiylashtirish bo‘yicha davlat xizmatlarini ko‘rsatish tartibini belgilaydi.
2. Ushbu Reglamentda quyidagi asosiy tushunchalardan foydalaniladi:
“Yerxususiylasntirish” avtomatlashtirilgan axborot tizimi (keyingi o‘rinlarda — “Yerxususiylasntirish” AAT) — ushbu tizimga ulangan vakolatli organlar va tashkilotlar tomonidan yer uchastkalarini xususiylashtirish bo‘yicha ma’lumotlarni yig‘ish, ko‘rib chiqish va kelishish ishlarini amalga oshirish maqsadida foydalaniladigan avtomatlashtirilgan axborot tizimi;
“Kadastr va ro‘yxatdan o‘tkazish integratsiyalashgan axborot tizimi” — Davlat soliq qo‘mitasi huzuridagi Kadastr agentligining ko‘chmas mulklarni hisobga olish hamda ko‘chmas mulklarga bo‘lgan huquqlarni davlat ro‘yxatidan o‘tkazish ishlarini amalga oshirish maqsadida foydalaniladigan axborot tizimi;
ariza beruvchi — o‘ziga meros qilib qoldiriladigan umrbod egalik qilish huquqi, doimiy foydalanish (egalik qilish) yoki ijara huquqi asosida ajratilgan qishloq xo‘jaligiga mo‘ljallanmagan yer uchastkasini xususiylashtirish maqsadida ariza bergan O‘zbekiston Respublikasi fuqarosi yoki yuridik shaxsi;
yer uchastkasini xususiylashtirish — davlat mulki bo‘lgan qishloq xo‘jaligiga mo‘ljallanmagan yer uchastkasini O‘zbekiston Respublikasi fuqarolarining va (yoki) yuridik shaxslarining mulkiga o‘tkazish;
xususiylashtirilayotgan yer uchastkasini sotib olish qiymati — ariza beruvchi tomonidan yer uchastkasini xususiylashtirish maqsadida to‘lanadigan, xususiylashtirish paytida belgilangan yer solig‘i bazaviy stavkasining karrali miqdoridagi to‘lov;
qishloq xo‘jaligiga mo‘ljallanmagan yer uchastkasi (keyingi o‘rinlarda — yer uchastkasi) — qishloq xo‘jaligi ehtiyojlari uchun berilmagan yoki ushbu maqsadlar uchun mo‘ljallanmagan yer uchastkasi.
3. Yer uchastkalarini xususiylashtirish bo‘yicha davlat xizmatlari Davlat xizmatlari markazlari yoki O‘zbekiston Respublikasi Yagona interaktiv davlat xizmatlari portali (keyingi o‘rinlarda — YIDXP) orqali ko‘rsatiladi.
4. O‘zbekiston Respublikasi fuqarolari yoki yuridik shaxslariga doimiy foydalanish (egalik qilish), ijara yoki meros qilib qoldiriladigan umrbod egalik qilish huquqi asosida tegishli bo‘lgan qishloq xo‘jaligiga mo‘ljallanmagan yer uchastkalarini xususiylashtirish ushbu Reglamentga 1-ilovada keltirilgan sxemaga muvofiq amalga oshiriladi.
5. Ushbu Reglament kichik sanoat, yoshlar sanoat va tadbirkorlik zonalari ishtirokchilariga berilgan yer uchastkalariga nisbatan tatbiq etilmaydi.
2-bob. Yer uchastkasini xususiylashtirishda davlat xizmatlarini ko‘rsatish tartibi
6. Yer uchastkalarini xususiylashtirish uchun ariza beruvchilar yer uchastkasi joylashgan tegishli hududdagi Davlat xizmatlari markazlariga o‘zlari kelgan holda murojaat qiladilar yoki davlat xizmatidan elektron tarzda foydalanish uchun YIDXPda ro‘yxatdan o‘tadilar.
7. Ariza beruvchi o‘zi kelib murojaat qilganda Davlat xizmatlari markazi xodimi ariza beruvchi nomidan, YIDXP orqali murojaat qilganda esa — ariza beruvchining o‘zi mustaqil ravishda ushbu Reglamentga 2 va 3-ilovalarga muvofiq shakllarda ariza to‘ldiradi.
Ariza to‘ldirish jarayonida:
yer uchastkasiga bo‘lgan huquqning davlat ro‘yxatidan o‘tkazilganligi Kadastr agentligining “Kadastr va ro‘yxatdan o‘tkazish integratsiyalashgan axborot tizimi” orqali;
xususiylashtirish obyektlari va subyektlari “Qishloq xo‘jaligiga mo‘ljallanmagan yer uchastkalarini xususiylashtirish to‘g‘risida”gi O‘zbekiston Respublikasi Qonunining 10, 12 va 13-moddalari talablariga mosligi “Yerxususiylasntirish” AATga ulangan tashkilotlarning axborot tizimlari orqali avtomatik ravishda tekshiriladi.
Agar xususiylashtiriladigan yer uchastkasi ulushli yoki birgalikdagi egalik qilishda (foydalanishda) bo‘lsa, ariza barcha egalarning (foydalanuvchilarning) fuqarolik qonun hujjatlariga muvofiq tuziladigan kelishuviga binoan, bunday kelishuvga erishilmagan taqdirda esa — sud tomonidan belgilangan tartibda ushbu Reglament talablari asosida beriladi.
Xususiylashtirilayotgan yer uchastkasida boshqa shaxslarga mulk huquqi asosida tegishli bino va inshootlar mavjud bo‘lgan taqdirda, ularning mazkur yer uchastkasiga doimiy foydalanish (egalik qilish), ijara yoki meros qilib qoldiriladigan umrbod egalik qilish huquqi mavjudligi tekshiriladi.
8. Yer uchastkasini xususiylashtirish to‘g‘risidagi arizaga quyidagilarning skaner qilingan nusxasi ilova qilinishi kerak:
belgilangan tartibda rasmiylashtirilgan ishonchnoma (ariza beruvchining vakili murojaat qilgan hollarda);
yuridik shaxsning tegishli boshqaruv organining yer uchastkasini xususiylashtirish to‘g‘risidagi qarori (ariza beruvchi — yuridik shaxsning ta’sis hujjatlariga muvofiq zarur bo‘lsa).
9. Davlat xizmatlari ko‘rsatish uchun bazaviy hisoblash miqdorining 10 foizi miqdorida yig‘im undiriladi.
Davlat xizmati ko‘rsatilishida YIDXP orqali murojaat etilganda, ushbu bandning birinchi xatboshisida ko‘rsatilgan yig‘im summasining 90 foizi undiriladi.
Arizani ko‘rib chiqish uchun undiriladigan yig‘imlar va xususiylashtirilayotgan yer uchastkasining sotib olish qiymati to‘langanligi tasdig‘i “Yerxususiylasntirish” AAT orqali davlat xizmatlari ko‘rsatganlik uchun to‘langan davlat bojlari va yig‘imlar summasini yurituvchi Yagona billing tizimidan (keyingi o‘rinlarda — Yagona billing tizimi) olingan ma’lumotlar asosida amalga oshiriladi.
10. Yig‘imlar summasi quyidagi tartibda taqsimlanadi:
a) Davlat xizmatlari markazlariga o‘zi kelib murojaat etganda:
20 foizi — O‘zbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamg‘armasining shaxsiy hisobvarag‘iga o‘tkaziladi;
0,5 foizi — to‘lovlarni tasdiqlash Yagona billing tizimi orqali amalga oshirilganligi uchun Axborot-kommunikatsiya texnologiyalarini rivojlantirish jamg‘armasining Elektron hukumat va raqamli iqtisodiyotning idoralararo loyihalarini moliyalashtirish bo‘yicha maxsus hisobvarag‘iga;
qolgan mablag‘larning:
50 foizi — O‘zbekiston Respublikasi Davlat soliq qo‘mitasi huzuridagi Kadastr agentligining Davlat kadastrlari palatasi (keyingi o‘rinlarda — Davlat kadastrlari palatasi) hududiy boshqarmalarining bank hisobvarag‘iga;
50 foizi — Qoraqalpog‘iston Respublikasi Qurilish vazirligi, viloyatlar va Toshkent shahar qurilish bosh boshqarmalari bank hisobvarag‘iga o‘tkaziladi;
b) YIDXP orqali murojaat qilinganda:
10 foizi — O‘zbekiston Respublikasi Adliya vazirligi huzuridagi Davlat xizmatlari agentligining budjetdan tashqari jamg‘armasi shaxsiy hisobvarag‘iga o‘tkaziladi;
11,25 foizi — Axborot-kommunikatsiya texnologiyalarini rivojlantirish jamg‘armasining elektron hukumat va raqamli iqtisodiyotning idoralararo loyihalarini moliyalashtirish bo‘yicha maxsus hisobvarag‘iga o‘tkaziladi;
0,5 foizi — to‘lovlarni tasdiqlash Yagona billing tizimi orqali amalga oshirilganligi uchun Axborot-kommunikatsiya texnologiyalarini rivojlantirish jamg‘armasining Elektron hukumat va raqamli iqtisodiyotning idoralararo loyihalarini moliyalashtirish bo‘yicha maxsus hisobvarag‘iga;
qolgan mablag‘larning:
50 foizi — Davlat kadastrlar palatasi hududiy boshqarmalarining bank hisobvarag‘iga;
50 foizi — Qoraqalpog‘iston Respublikasi Qurilish vazirligi, viloyatlar va Toshkent shahar qurilish bosh boshqarmalari bank hisobvarag‘iga o‘tkaziladi.
11. Ariza beruvchi davlat xizmatlaridan foydalanishdan yer uchastkasiga mulk huquqini beruvchi davlat orderi (keyingi o‘rinlarda — davlat orderi) berilguniga qadar uni ko‘rsatishning har qanday bosqichida bosh tortish huquqiga ega.
Ariza beruvchi davlat xizmatlaridan foydalanishdan bosh tortganda uning arizasi ko‘rib chiqilmaydi yoki davlat xizmatini ko‘rsatish to‘xatiladi. Bunda davlat xizmatlarini ko‘rsatish uchun qabul qilingan ariza ko‘rib chiqilganligi uchun to‘langan yig‘im qaytarilmaydi.
12. O‘zi kelib murojaat etganda Davlat xizmatlari markazlari ariza to‘ldirilgan vaqtdan boshlab real vaqt rejimida uni “Yerxususiylasntirish” AAT orqali tuman (shahar) qurilish bo‘limi hamda O‘zbekiston Respublikasi Davlat soliq qo‘mitasi huzuridagi Kadastr agentligining Davlat kadastrlari palatasi (keyingi o‘rinlarda — Davlat kadastrlari palatasi) tuman (shahar) filialiga kelishish uchun yuboradi.
YIDXP orqali murojaat qilinganda ariza avtomatik ravishda “Yerxususiylasntirish” AAT orqali tuman (shahar) qurilish bo‘limi va Davlat kadastrlari palatasi tuman (shahar) filialiga yuboriladi.
13. Tuman (shahar) qurilish bo‘limi uch ish kuni ichida arizada ko‘rsatilgan yer uchastkasi joylashgan hududning (aholi punkti yoki ular orasidagi hududni) rivojlantirishni shaharsozlik jihatidan rejalashtirish to‘g‘risidagi hamda ularni qurish haqidagi tasdiqlangan hujjatlarga yer uchastkasi joylashuvining muvofiqligini ko‘rib chiqadi.
Aholi punktlarining tasdiqlangan bosh rejalarida, aholi punkti qismlarini batafsil rejalashtirish loyihalarida, hududlarni kompleks rivojlantirish va qurishga doir boshqa hujjatlarda yer uchastkalarini xususiylashtirishga bevosita monelik qiladigan ma’lumotlarning mavjudligi tuman (shahar) qurilish bo‘limi tomonidan yer uchastkalarini xususiylashtirishni rad etish uchun asos hisoblanadi.
Agar ariza bo‘yicha xususiylashtirish uchun berilgan yer uchastkasi hududida tasdiqlangan shaharsozlik hujjatlari mavjud bo‘lmagan taqdirda, tuman (shahar) qurilish bo‘limi ushbu bandning birinchi qismida ko‘rsatilgan muddat ichida arizada ko‘rsatilgan yer uchastkasi joylashgan hududda tasdiqlangan shaharsozlik hujjatlari mavjud emasligini tasdiqlovchi xulosa taqdim etadi. Bunda ariza beruvchiga 2021-yil 16-noyabrga qadar yuzaga kelgan doimiy foydalanish (egalik qilish), ijara yoxud meros qilib qoldiriladigan umrbod egalik qilish huquqi asosida tegishli bo‘lgan yer uchastkalari ulardan foydalanishning asosiy maqsadini shaharsozlik hujjatlari tasdiqlanguniga qadar saqlab qolish sharti bilan xususiylashtirilishi mumkin.
14. Davlat kadastrlari palatasi tuman (shahar) filiali ariza tushgan kundan boshlab besh ish kuni ichida quyidagilarni o‘rganadi:
yer uchastkalari bo‘yicha topografik rejaning mavjudligi;
arizada ko‘rsatilgan yer uchastkasi va huquq egasi to‘g‘risidagi ma’lumotlarning Ko‘chmas mulkka bo‘lgan huquqlarning davlat reyestridagi ma’lumotlarga muvofiqligi;
xususiylashtirilayotgan yer uchastkasiga bo‘lgan huquq egasi haqidagi ma’lumotlarning ushbu yer uchastkasida joylashgan bino va inshootlarning mulkdori haqidagi ma’lumotlarga muvofiqligi;
xususiylashtirilayotgan yer uchastkasida joylashgan ko‘chmas mulk obyektlariga nisbatan taqiqning yoki xatlovning mavjudligi;
yer uchastkasi joylashgan joyga chiqqan holda yer uchastkasi chegaralarini kadastr hujjatlari ma’lumotlariga mosligini aniqlash.
Davlat kadastrlari palatasi tuman (shahar) filiali yer uchastkasining topografik xaritasi mavjud bo‘lmagan taqdirda, Vazirlar Mahkamasining 2021-yil 22-iyundagi 389-son qarori bilan tasdiqlangan Ko‘chmas mulk obyektlariga kadastr yig‘majildini tayyorlash tartibi to‘g‘risidagi nizomning 8-bandida belgilangan muddatlarda topografik rejani tayyorlaydi.
Yer uchastkasi va unga tutash hududning topografik rejasini tayyorlash uchun to‘lov summasi bir gektar yer maydoni uchun bazaviy hisoblash miqdorining besh baravari hisobidan kelib chiqib hisoblanadi va yer uchastkasini xususiylashtirishdan tushgan mablag‘lar hisobidan qoplanadi.
15. Arizani va unga ilova qilingan hujjatlarni ko‘rib chiqish natijalari bo‘yicha tuman (shahar) qurilish bo‘limi, Davlat kadastrlari palatasi tuman (shahar) filiali yer uchastkasini xususiylashtirish to‘g‘risidagi arizani kelishadi yoki uni kelishish maqsadga muvofiq emasligi to‘g‘risida xabar beradi.
Kelishuv hech qanday eslatma va shartlarsiz, tegishli yer uchastkasi bo‘yicha vakolatli tashkilot mas’ul xodimining elektron raqamli imzosi bilan tasdiqlanadigan rozilik rezolyutsiyasi orqali amalga oshiriladi.
Kelishish rad etilgan taqdirda yer uchastkasini xususiylashtirish mumkin emasligi haqida normativ-huquqiy hujjatning aniq normasiga asoslangan sabablar ko‘rsatilgan xabarnoma tayyorlanadi.
16. “Yerxususiylasntirish” AAT arizani ko‘rib chiqish natijalari bo‘yicha ariza kelishilganligi yoki rad etilganligi to‘g‘risidagi ma’lumotni o‘z ichiga olgan xabarnomani shakllantiradi va uni YIDXP yoki Davlat xizmatlari markazi orqali ariza beruvchiga yuboradi.
Ariza kelishilgan taqdirda, Yagona billing tizimi “Yerxususiylasntirish” AAT ma’lumotlari asosida xususiylashtirilayotgan yer uchastkasini sotib olish uchun hisobvaraqni shakllantiradi va xabarnomaga ilova qiladi hamda to‘langan mablag‘lar hisobini yuritadi.
17. Xususiylashtirilayotgan yer uchastkasini sotib olish qiymati milliy valyutada mazkur Reglamentga 4-ilovada ko‘rsatilgan tegishli me’yorlar bo‘yicha hisoblanadi.
18. Ariza beruvchi to‘lov yuzasidan xabarnomani olgan kundan boshlab o‘n ish kuni ichida yer uchastkasini xususiylashtirish uchun to‘lovni amalga oshirishi zarur.
19. Ariza beruvchi xususiylashtirilayotgan yer uchastkasini sotib olish qiymatini to‘liq va o‘z vaqtida amalga oshirmagan taqdirda, “Yerxususiylasntirish” AAT avtomatik ravishda xususiylashtirishni rad etish to‘g‘risida xabarnomani tayyorlaydi va uni ariza beruvchiga Davlat xizmatlari markazi yoki YIDXP orqali yuboradi.
20. Ariza beruvchi rad javobini olgan kundan boshlab bir oy ichida, agar rad etish sababi faqat xususiylashtirilayotgan yer uchastkasini sotib olish davlat xizmatlarini ko‘rsatish uchun yig‘imni to‘lamasdan yer uchastkasini xususiylashtirishni rad etish uchun asos bo‘lgan sabablarni bartaraf etgan holda qayta ariza topshirishga haqli.
21. Xususiylashtirilayotgan yer uchastkasini sotib olish uchun to‘lov quyidagi tartibda avtomatik taqsimlanadi:
a) Vazirlar Mahkamasining “Davlat kadastri sohasida davlat xizmatlari narxlarini belgilashda tabaqalashtirilgan yondashuv tartibini takomillashtirish to‘g‘risida” 2014-yil 10-iyuldagi 186-son qaroriga muvofiq mulk huquqini davlat ro‘yxatidan o‘tkazish bo‘yicha davlat xizmatlarini ko‘rsatganlik uchun — tegishli Davlat kadastrlari palatasi hududiy boshqarmasiga, uning 10 foizi O‘zbekiston Respublikasi Davlat soliq qo‘mitasi huzuridagi Kadastr agentligining budjetdan tashqari jamg‘armasining maxsus g‘aznachilik hisobvarag‘iga (4014);
b) ushbu Reglamentning 14-bandiga muvofiq yer uchastkasi va unga tutash hududning topografik rejasini tayyorlash bo‘yicha davlat xizmatlarini ko‘rsatganlik uchun — tegishli Davlat kadastrlari palatasi hududiy boshqarmasi hisobvarag‘iga;
v) 3 foizi — “Yerxususiylasntirish” AATni texnik qo‘llab-quvvatlash ishlari uchun Davlat aktivlarini boshqarish agentligining hisobvarag‘iga;
g) 0,5 foizi — to‘lovlarni tasdiqlash Yagona billing tizimi orqali amalga oshirilganligi uchun Axborot-kommunikatsiya texnologiyalarini rivojlantirish jamg‘armasining Elektron hukumat va raqamli iqtisodiyotning idoralararo loyihalarini moliyalashtirish bo‘yicha maxsus hisobvarag‘iga o‘tkaziladi;
d) qolgan mablag‘lar Qoraqalpog‘iston Respublikasi respublika budjeti, viloyatlarning viloyat budjetlari va Toshkent shahrining shahar budjeti maxsus g‘azna hisobvaraqlariga ularning qo‘shimcha manbalari sifatida yo‘naltiriladi va quyidagicha taqsimlanadi:
30 foizi — davlat va jamoat ehtiyojlari uchun yer uchastkalarining olib qo‘yilishi munosabati bilan jismoniy va yuridik shaxslarga yetkazilgan zararlarni qoplash bo‘yicha hududiy jamg‘armaga;
70 foizi — Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari huzuridagi Tadbirkorlik infratuzilmasini rivojlantirish jamg‘armasiga.
22. Ariza beruvchi xususiylashtirilayotgan yer uchastkasining sotib olish qiymati to‘lovini to‘liq amalga oshirganidan so‘ng “Yerxususiylasntirish” AAT avtomatik ravishda ushbu Reglamentga 5-ilovada keltirilgan shaklga muvofiq jismoniy shaxs bo‘yicha — familiyasi, ismi, otasining ismi, pasport raqami, JShShIR, yuridik shaxs bo‘yicha — yuridik shaxs nomi, STIR raqamini ko‘rsatgan holda yer uchastkasiga mulk huquqini beruvchi davlat orderini belgilangan tartibda shakllantiradi va Davlat aktivlarini boshqarish agentligining tegishli hududiy boshqarmalariga imzolash uchun yuboradi.
Davlat aktivlarini boshqarish agentligining tegishli hududiy boshqarmalari “Yerxususiylasntirish” AAT orqali olgan davlat orderiga bir ish kuni ichida elektron raqamli imzo qo‘yadi va uni Kadastr agentligining “Kadastr va ro‘yxatdan o‘tkazish integratsiyalashgan axborot tizimi” orqali Davlat kadastrlari palatasining tegishli hududiy boshqarmasiga yuboradi.
23. Davlat kadastrlari palatasi hududiy boshqarmalari davlat orderi taqdim etilgandan so‘ng ikki ish kuni ichida davlat orderiga asosan yer uchastkasiga bo‘lgan mulk huquqini davlat ro‘yxatidan o‘tkazadi va Ko‘chmas mulk obyektlariga bo‘lgan huquqlarning davlat reyestridan ko‘chirmani davlat orderi bilan birga “Yerxususiylasntirish” AAT orqali YIDXP orqali ariza beruvchiga yoki Davlat xizmatlari markaziga yuboradi.
24. Davlat xizmatlari markazi davlat orderi va Ko‘chmas mulk obyektlariga bo‘lgan huquqlarning davlat reyestridan ko‘chirma olganidan so‘ng real vaqt rejimida ularni ariza beruvchining elektron manziliga yuboradi va bu haqida ariza beruvchini axborot-kommunikatsiya texnologiyalari orqali xabardor qiladi.
Ko‘chmas mulk obyektlariga bo‘lgan huquqlarning davlat reyestridan ko‘chirma va davlat orderi YIDXP orqali ariza beruvchiga yuborilganda avtomatik ravishda xabarnoma beriladi.
Arizani ko‘rib chiqish natijalari bo‘yicha QR-kod (matrik shtrix-kod) qo‘yilgan elektron hujjatlar asliga tenglashtiriladi.
3-bob. Yakunlovchi qoidalar
25. O‘zbekiston Respublikasi Adliya vazirligi huzuridagi Davlat xizmatlari agentligi, uning hududiy boshqarmasi va Davlat xizmatlari markazlari, shu jumladan, YIDXP orqali, ushbu Reglamentning talablari ijrosi yuzasidan davlat organlari va boshqa tashkilotlar faoliyatini doimiy ravishda nazorat qiladi va monitoring olib boradi.
26. Ariza beruvchi davlat organlari va boshqa tashkilotlarning harakati (harakatsizligi) ustidan qonunchilik hujjatlarida belgilangan tartibda shikoyat qilishi mumkin.
27. Ushbu Reglament talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.
O‘zbekiston Respublikasi fuqarolari va yuridik shaxslariga doimiy foydalanish (egalik qilish), ijara va meros qilib qoldiriladigan umrbod egalik qilish huquqi asosida tegishli bo‘lgan yer uchastkalarini xususiylashtirish bo‘yicha davlat xizmatlari ko‘rsatishga doir ma’muriy reglamentga
1-ILOVA
O‘zbekiston Respublikasi fuqarolari va yuridik shaxslarga doimiy foydalanish (egalik qilish), ijara yoxud meros qilib qoldiriladigan umrbod egalik qilish huquqi asosida tegishli bo‘lgan qishloq xo‘jaligiga mo‘ljallanmagan yer uchastkalarini xususiylashtirish
SXEMASI