Guliston davlat universiteti o’zbek adabiyotshunosligi kafedrasi

O’quv fanining maqsadi va vazifalari

Fanni o’qitishning maqsadi – xalq og’zaki ijodida so’z san’atining san’at sifatidagi xususiyatlari mukammal uyg’unlashganini, unda o’zbek xalqining asrlar davomidagi ijtimoiy, maishiy, madaniy hayoti o’zining badiiy ifodasini topganini, xalqning o’z vatani uchun iftixor tuyg’usi aynan og’zaki ijod zaminida tashkil etishini talabaga anglatish.

Fanni o’qitishning vazifalari:

1. 
   Xalq og’zaki ijodining yozma adabiyotdan farqli jihatlarini ko’rsatib berish;
   
2. 
   O’zbek folklorining tarixiy taraqqiyot bosqichlari yuzasidan talabaga ilmiy ma’lumot berish;
   
3. 
   O’zbekiston mustaqillikka erishgandan so’ng xalq og’zaki ijodi davlat maqomiga erishganini ta’kidlash;
   
4. 
   Hayot haqiqati va badiiy to’qima tushunchalarining mohiyatini anglatish;
   
5. 
   Xalq og’zaki ijodi millat farzandlarining ma’rifiy dunyoqarashi, estetik didini shakllantirishda muhim tarbiyaviy asos vazifasini bajargani haqida tasavvur hosil qilish;
   
6. 
   Xalq og’zaki ijodidagi janrlar haqida ma’lumot berish, ularning janr xususiyatlarini aniq ko’rsatish, janrlararo munosabat mezonlarini belgilash;
   
7. 
   O’zbek xalq og’zaki ijodining, umuman, o’zbek milliy san’ati taraqqiyotidagi ahamiyatini ko’rsatish;
   
8. 
   O’zbek folklorining jahon xalqlari og’zaki ijodi rivojidagi o’ziga xosligi va insoniyat madaniy merosida tutgan o’rni haqida ma’lumot berish.
   

1.1. Fan bo’yicha talabalarning bilimi, ko’nikma va malakasiga
qo’yiladigan talablar

Talabalar xalq og’zaki ijodining haqiqiy so’z san’ati namunalari xazinasi ekanini qalbdan his qilishi kerak. Har bir talaba milliy o’zlikni anglash, qadriyatlarimiz madaniy xazinasida xalq og’zaki ijodining muhim ahamiyatga ega ekanini tushunishi lozim. Xalq og’zaki ijodiga xos xususiyatlar haqida mukammal ma’lumotga ega bo’lish, janrlarni bir-biridan farqlashi, ular haqida mustaqil fikr yuritishi talab etiladi. Folklorshunos olimlar ilmiy merosi yuzasidan ma’lumotlarni tahlil etish ko’nikmasi egallanishi kerak.