G‘o‘za kasalliklari va ularga qarshi kurash choralari Reja

Fenoksi va benzoik gerbitsidlardan 2,4-D, dikamba (banvel) qo‘shni dalalarda qo‘llanilganda shamol bilan yoki sepgich va mexanizmlar qismlari vositasida g‘o‘za ekinlarini zararlashi mumkin. G‘o‘za juda sezgir va chidamsiz bo‘lishi, bu gerbitsidlarning hatto juda kam miqdorlari ham ekinni kuchli zararlashi, o‘simlik barglari va bargdagi tomirlari g‘ijimlangan, burishgan shakl olishi, barg qismlari uzayishi, o‘q ildiz va poyaning pastki qismi yo‘g‘onlashishiga sabab bo‘lishi mumkin. Zararlangan barglar yelpig‘ich (dikamba) yoki latta (fenoksi gerbitsidlari) shakliga kirishi mumkin. Kuchli zararlangan o‘simliklarning ko‘saklari to‘kiladi va hosili pasayadi.

Glifosat (raundap). G‘o‘za glifosatga nisbatan chidamli, zarari faqat gerbitsid o‘simlik barglariga bevosita tushganda kuzatiladi: barglarda sarg‘ish dog‘lar paydo bo‘ladi, yosh barglar oqarishi, shakli buzilishi, qariroq barglar qizg‘ish tus olishi, poya bo‘g‘in oralari qisqa bo‘lib qolishi va o‘simlik bo‘yi pasayishi mumkin.

Oksifluorfen (goal). Keng bargli begona o‘tlarga qarshi qo‘llanilganda gerbitsid g‘o‘zaga tushsa, urug‘barg va chin barglarda nekrotik dog‘lar paydo bo‘lishi kuzatiladi.