Glossariy axloq har bir shaxs ma’naviyatining uning xulqida, o’zga insonlarga munosabatida aks etishi, yuzaga chiqishi. Ma’naviyat va siyosat sohalarining kesishuvida namoyon bo’ladi. Milliy adolat

GLOSSARIY
Axloq - har bir shaxs ma’naviyatining uning xulqida, o’zga insonlarga munosabatida aks etishi, yuzaga chiqishi. Ma’naviyat va siyosat sohalarining kesishuvida namoyon bo’ladi.
Milliy adolat – o’z millatiga mehr tuyg’usi o’zga millat namoyandasiga nisbatan noxolis yondoshuvga sabab (bahona) bo’lmasligi.
“Hayvon ruhi” – milliy ma’naviyatimiz an’analarida ruhshunoslik ilmiga oid timsol-tushuncha, tirik mavjudotlar (hayvonlar va insonlar) uchun umumiy bo’lgan erkin harakatlanish va nafs (ya’ni, moddiy mayllar)ga ega bo’lish xususiyati, “quyi olamdan” (Azizuddin Nasafiyning “Zubdatul haqoyiq” risolasi asosida).
“Inson ruhi” - milliy ma’naviyatimiz an’analarida ruhshunoslik ilmiga oid timsol-tushuncha, barcha inson zoti uchun umumiy bo’lgan tafakkur (fikrlash, aql ishlata bilish) va nutq (fikrini erkin bayon eta bilish) xususiyati, (Azizuddin Nasafiyning “Zubdatul haqoyiq” risolasi asosida).
“Muqaddas ruh” – milliy ma’naviyatimiz an’analarida ruhshunoslik ilmiga oid timsol-tushuncha, haqiqiy imon egalari, payg’ambarlar va valiylar (orif insonlar) ruhiyatiga aloqador g’ayb olami bilan tutashlikni anglatuvchi atama, “yuqori olamdan” (Azizuddin Nasafiyning “Zubdatul haqoyiq” risolasida “osmoniy farishtalar jinsidan” deb ta’riflanadi).
Axloqiy fazilatlar – shaxs ma’naviyati turli qirralarining inson amaliy faoliyatida doimiy asosda namoyon bo’lishi, inson qalbidagi ma’naviyat nurining jilolari.
Adolat tarozusi – ijtimoiy-ma’naviy ahamiyatga ega bo’lgan timsol-tushuncha bo’lib, har bir zamon va makonda o’ziga xos ko’rsatkichlarni namoyon etadi va har bir insonning barcha fazilat va nuqsonlarini, iste’dod va kamchiliklarini aniq "vaznini" belgilab, o’shanga yarasha har bir shaxsning ijtimoiy qiymatini o’lchash va baholashga xizmat qiladi.
Axloqiy qusurlar - insonning ko’ngil ko’zgusidagi zang va chirklarning o’zgalar nigohiga namoyon bo’lishi.
Axloqshunoslik (Etika) - Ma’naviyat sohasiga aloqador fanlar tizimiga mansub bo’lib, inson xulqi, uning axloqiy fazilatlari va qusurlarining xolis tahlili bu fanning asosiy mavzusi (predmetini) tashkil etadi.