Glossariy 1-mavzu. Marketing va uni rivojlanishining asosiy bosqichlari

ДРАМАТУРГИЯ (юн. dramaturgia) – 1) муайян санъаткор, давр ва халққа мансуб драматик асарлар мажмуи. Мас., Ҳамза, Фитрат Д.си, антик давр Д.си, Уйғониш даври Д.си, инглиз Д.си, ўзбек Д.си ва б.; 2) кино ва спектаклнинг образли талқини концепцияси. Театр Д.си бадиий драма асосида юзага келган, лекин ҳоз. театрда у режиссёр сценарийси ёрдамида амалга оширилади. Кино санъати Д.си сценарий шаклида бўлади.


ЁЗУВ – муайян бир тилда қабул этилган ва кишилар ўртасидаги мулоқатга хизмат қиладиган ёзма белгилар ёки тасвирлар тизими. Ё.– кишилик жамияти маданий тараққиётининг том маънодаги ибтидоси, башариятнинг узоқ ва мураккаб тадрижий такомили жараёнидаги омилларнинг энг асосийларидан бири. Ё. тилдан анча кейин пайдо бўлган (товуш тили 400– 500 минг йиллар илгари юзага келган, Ё.нинг пайдо бўлганига эса 4– 5 минг йиллар бўлган).


ЁР-ЁР – никоҳ тўйи маросимлари жараёнида айтиладиган халқ қўшиғи. Қадим замонлардан ўзбек, тожик, уйғур ва туркман халқлари орасида кенг тарқалган. Иккилик ёки тўртлик шаклидаги термалардан иборат бўлиб, ҳар банднинг охири, баъзан ўртасида «Ёр-ёр, айланаман» каби сўзлар қўшиб айтилади.


ЖАНР (фр.jenre – тур, услуб) – мусиқа асарларининг турлари. Асарнинг тузилиши, ижрочиларнинг таркиби, характери ва бошқа ҳолатлар билан Ж. бир-биридан ажралади ва турлича бўлади.


ЖЎРНАВОЗЛИК – ўзбек ижрочилигида бир соз(лар) билан бошқа соз(лар)га жўр бўлиш; Хоразмда мақомларнинг чертим йўлларини танбур, ғижжак, буламон ва доирада ижро қилиши.


ЗАРГАРЛИК – бадиий ҳунармандлик сохаси; олтин, кумуш, мис, қалай каби рангли металлардан зеб-зийнат буюмлари (тақинчоқлар), безак буюмлари ясаш касби. Заргарлар безак буюмлари тайёрлашда қуйиш, болғалаб (зарб бериб) ясаш, ҳаллаш (олтин ва кумуш суви юритиш), ўйиб ёки бўрттириб нақш ясаш, босма, зиғирак, совоткори, қолипаки, шабака каби усуллардан кенг фойдаланади.


ИБТИДОИЙ САНЪАТ – ибтидоий жамоа тузуми даври санъати. Илк намуналари ҳозирги типдаги одам пайдо бўлган сўнгги палеолит даври (тахминан мил. ав. 30-минг йилликлар) га мансуб. И. с. ибтидоий жамоа кишисига дунёни ўзгартиришда орттирган тажрибаларини авлоддан авлодга узатувчи куч, дунё тўғрисидаги тушунча ва билимларини акс эттирувчи восита бўлиб хизмат қилган.